- Home
- Magazine
- Agriculture (Magazine)
- ഓർമ്മശക്തിക്കും മുടിവളർച്ചയ്ക്കും നല്ലത്, റോസ്മേരി അടുക്കളത്തോട്ടത്തിൽ വളർത്താം
ഓർമ്മശക്തിക്കും മുടിവളർച്ചയ്ക്കും നല്ലത്, റോസ്മേരി അടുക്കളത്തോട്ടത്തിൽ വളർത്താം
റോസ്മേരി എങ്ങനെ നമ്മുടെ അടുക്കളത്തോട്ടത്തില് വളര്ത്തിയെടുക്കാം. നല്ല വിളവെടുക്കാം. എന്തൊക്കെ കാര്യങ്ങള് ശ്രദ്ധിക്കണം? കുറഞ്ഞ പരിചരണത്തിൽ മികച്ച വിളവ് ലഭിക്കുമെന്നതാണ് ഈ ഔഷധച്ചെടിയെ അടുക്കള കൃഷിയിലെ താരമാക്കി മാറ്റുന്നത്.
മലയാളിയുടെ അടുക്കളത്തോട്ടങ്ങൾ ഇപ്പോൾ വെറും പച്ചക്കറികളിൽ മാത്രം ഒതുങ്ങുന്നില്ല. വിദേശ വിഭവങ്ങളിലെ സുഗന്ധ സാന്നിധ്യമായ 'റോസ്മേരി' ഇന്ന് കേരളത്തിലെ വീടുകളിലും സജീവമാകുകയാണ്. കുറഞ്ഞ പരിചരണത്തിൽ മികച്ച വിളവ് ലഭിക്കുമെന്നതാണ് ഈ ഔഷധച്ചെടിയെ അടുക്കള കൃഷിയിലെ താരമാക്കി മാറ്റുന്നത്.
മെഡിറ്ററേനിയൻ കാലാവസ്ഥയിൽ വളരുന്ന ചെടിയാണെങ്കിലും കേരളത്തിലെ ചൂടുള്ള കാലാവസ്ഥയിലും റോസ്മേരി മികച്ച രീതിയിൽ വളരും. വിത്തുകൾ മുളപ്പിക്കുന്നതിനേക്കാൾ നഴ്സറികളിൽ നിന്ന് ലഭിക്കുന്ന തൈകളോ, വളർച്ചയെത്തിയ ചെടിയുടെ കൊമ്പുകളോ നട്ടുപിടിപ്പിക്കുന്നതാണ് എളുപ്പം. വെള്ളം കെട്ടിക്കിടക്കാത്ത മണൽ കലർന്ന മണ്ണാണ് ഇതിന് ഏറ്റവും അനുയോജ്യം.
ചട്ടികളിലും ഗ്രോബാഗുകളിലും വളർത്താം എന്നതിനാൽ സ്ഥലപരിമിതിയുള്ളവർക്കും ഇത് അനുഗ്രഹമാണ്. പ്ലാസ്റ്റിക് ചട്ടികളേക്കാൾ മൺചട്ടികളാണ് റോസ്മേരിക്ക് നല്ലത്. കാരണം മൺചട്ടികൾ മണ്ണിലെ അധിക ഈർപ്പം വലിച്ചെടുക്കാൻ സഹായിക്കും. ചട്ടിയുടെ അടിയിൽ ധാരാളം സുഷിരങ്ങൾ ഉണ്ടെന്ന് ഉറപ്പുവരുത്തുക.
ദിവസവും ആറ് മണിക്കൂറെങ്കിലും നേരിട്ട് വെയിൽ ലഭിക്കുന്ന സ്ഥലത്തായിരിക്കണം റോസ്മേരി വളർത്തേണ്ടത്. അമിതമായ വെള്ളം നന ചെടിയുടെ നാശത്തിന് കാരണമാകും. മണ്ണിലെ ഈർപ്പം പൂർണ്ണമായും മാറിയെന്ന് ഉറപ്പുവരുത്തിയ ശേഷം മാത്രം നനയ്ക്കുക എന്നതാണ് ഇതിന്റെ വിജയമന്ത്രം. കീടശല്യം തീരെ കുറവാണെന്നത് ഇതിന്റെ പ്രത്യേകതയാണ്.
കനത്ത മഴക്കാലത്ത് ചെടികൾക്ക് മുകളിൽ വെള്ളം കെട്ടിനിൽക്കാതെ സംരക്ഷിക്കണം. റോസ്മേരിയുടെ ഇലകൾ ഇടയ്ക്കിടെ നനയ്ക്കുന്നത് ഒഴിവാക്കുക, ഇത് കുമിൾ രോഗങ്ങൾ വരാൻ കാരണമാകും. പകരം ചുവട്ടിൽ മാത്രം നനയ്ക്കുക.
ഭക്ഷണത്തിന് രുചിയും സുഗന്ധവും നൽകുന്നതിലുപരി, ഔഷധഗുണങ്ങളുടെ കലവറയാണിത്. ഓർമ്മശക്തി വർദ്ധിപ്പിക്കാനും മുടി വളർച്ചയ്ക്കും റോസ്മേരി ഇലകൾ ഏറെ ഫലപ്രദമാണ്. വീടിനുള്ളിലെ വായു ശുദ്ധീകരിക്കാനും ഇതിന്റെ സുഗന്ധം സഹായിക്കും. കുറഞ്ഞ ചിലവിൽ വീട്ടിൽ തന്നെ വളർത്താവുന്ന ഒന്നാണ് ഇത്.