വിഷരഹിത ചീര കൃഷി; നൂറുമേനി കൊയ്യാൻ എളുപ്പവഴികൾ
മലയാളിയുടെ നിത്യഭക്ഷണത്തിൽ ഒഴിവാക്കാനാവാത്ത ഒന്നാണ് ചീര. എന്നാൽ വിപണിയിൽ ലഭിക്കുന്ന ചീരയിൽ അമിതമായി കീടനാശിനികൾ ഉപയോഗിക്കുന്നുണ്ടെന്ന ആശങ്ക പലർക്കുമുണ്ട്. അടുക്കളത്തോട്ടത്തിലും ടെറസിലും ലളിതമായ രീതിയിൽ വിഷരഹിതമായ ചീര കൃഷി ചെയ്താം.
കാലാവസ്ഥ
കേരളത്തിലെ കാലാവസ്ഥയിൽ വർഷം മുഴുവനും ചീര കൃഷി ചെയ്യാമെങ്കിലും ജൂൺ-ജൂലൈ, ഒക്ടോബർ-നവംബർ മാസങ്ങളാണ് ഏറ്റവും അനുയോജ്യം.
ഇനങ്ങൾ
അരുൺ, കണ്ണാറ ലോക്കൽ (ചുവപ്പ്), മോഹിനി (പച്ച) തുടങ്ങിയ ഇനങ്ങളാണ് നമ്മുടെ നാട്ടിൽ മികച്ച വിളവ് നൽകുന്നത്.
ഇടകലർത്തി കൃഷി
പച്ചച്ചീരയും ചുവന്ന ചീരയും ഇടകലർത്തി നടുന്നത് രോഗബാധ കുറയ്ക്കാൻ സഹായിക്കുമെന്ന് വിദഗ്ധർ ചൂണ്ടിക്കാട്ടുന്നു.
നിലമൊരുക്കൽ
നല്ല സൂര്യപ്രകാശം ലഭിക്കുന്ന സ്ഥലമാണ് ചീര കൃഷിക്ക് തിരഞ്ഞെടുക്കേണ്ടത്. ഗ്രോബാഗിലായാലും നിലത്തായാലും മണ്ണ് നന്നായി കിളച്ചിളക്കി കല്ലും പുല്ലും നീക്കം ചെയ്യണം.
അടിവളം
അടിവളമായി ചാണകപ്പൊടിയോ കമ്പോസ്റ്റോ ചേർക്കാം. വിത്ത് പാകുമ്പോൾ ഉറുമ്പ് ശല്യം ഒഴിവാക്കാൻ അല്പം മഞ്ഞൾപ്പൊടി ചേർക്കുന്നത് നല്ലതാണ്.
വിത്ത്
വിത്തുകൾ കട്ടപിടിക്കാതെ വീഴാൻ മണലുമായി കലർത്തി വിതറുന്നതാണ് ഉചിതം
പരിചരണം
വിത്ത് മുളച്ച് രണ്ടാഴ്ചയായാൽ മേൽവളം നൽകി തുടങ്ങാം. പുളിപ്പിച്ച കടലപ്പിണ്ണാക്ക് ലായനി, ജീവാമൃതം, അല്ലെങ്കിൽ മീൻ അമിനോ ആസിഡ് എന്നിവ പത്ത് ദിവസത്തിലൊരിക്കൽ നൽകുന്നത് ചീര തഴച്ചു വളരാൻ സഹായിക്കും.
ജലസേചനം
നനയ്ക്കുമ്പോൾ വെള്ളം കെട്ടിക്കിടക്കാതെ ശ്രദ്ധിക്കണം, ഇത് വേരുചീയൽ തടയും.
രോഗപ്രതിരോധം
ഇലപ്പുള്ളി രോഗം, കൂടുകെട്ടി പുഴുക്കൾ എന്നിവയാണ് പ്രധാന ഭീഷണികൾ. കീടബാധയുടെ തുടക്കത്തിൽ തന്നെ ബാധിച്ച ഇലകൾ നുള്ളി നശിപ്പിക്കണം.
വേപ്പെണ്ണ മിശ്രിതം
രാസകീടനാശിനികൾക്ക് പകരം വേപ്പെണ്ണ മിശ്രിതം ഉപയോഗിക്കുന്നത് ജൈവരീതിയിൽ കീടങ്ങളെ അകറ്റാൻ സഹായിക്കും. വിത്ത് പാകി 30 ദിവസത്തിനുള്ളിൽ വിളവെടുക്കാം.
മുറിച്ചെടുക്കുക
ചീര ചുവടോടെ പിഴുതെടുക്കാതെ മുറിച്ചെടുത്താൽ കൂടുതൽ ശാഖകൾ വരികയും പലതവണ വിളവെടുക്കാൻ സാധിക്കുകയും ചെയ്യും.