- Home
- Sports
- Cricket
- ടി20 ലോകകപ്പ്: 'ചതിച്ചു ഗയ്സ്! റിസ്വാനും ബാബറും ചതിച്ചു ഗയ്സ്'; കോലിപ്പടയ്ക്ക് ട്രോള്മഴ, ധോണിക്കും പരിഹാസം
ടി20 ലോകകപ്പ്: 'ചതിച്ചു ഗയ്സ്! റിസ്വാനും ബാബറും ചതിച്ചു ഗയ്സ്'; കോലിപ്പടയ്ക്ക് ട്രോള്മഴ, ധോണിക്കും പരിഹാസം
ലോകകപ്പില് 13 മത്സരങ്ങള്ക്കൊടുവില് ഇന്ത്യ, പാകിസ്ഥാനോട് ആദ്യമായി പരാജയപ്പെട്ടു. ഇന്നലെ ടി20 ലോകകപ്പില് 10 വിക്കറ്റിനായിരുന്നു ഇന്ത്യയുടെ പരാജയം. ടോസ് നഷ്ടപ്പെട്ട് ബാറ്റിംഗിന് ഇറങ്ങിയ ഇന്ത്യ നിശ്ചിത ഓവറില് ഏഴ് വിക്കറ്റ് നഷ്ടത്തില് 151 റണ്സ് നേടി. മറുപടി ബാറ്റിംഗില് പാകിസ്ഥാന് 17.5 ഓവറില് ലക്ഷ്യം മറികടന്നു. ഇതോടെ സോഷ്യല് മീഡിയയില് ട്രോളുകളും നിറഞ്ഞു.
ആദ്യമായിട്ടാണ് ലോകകപ്പില് ഇന്ത്യ, പാകിസ്ഥാന് മുന്നില് അടിയറവ് പറയുന്നത്. ട്വന്റി 20- ഏകദിന ലോകകപ്പുകളില് പാകിസ്ഥാനെതിരെ ഇതുവരെ കളിച്ച എല്ലാ മത്സരങ്ങളിലും ഇന്ത്യ ജയിച്ചു.
ഏകദിന ലോകകപ്പുകളില് ഏഴ് തവണ നേര്ക്കുനേര് വന്നപ്പോള് ഏഴിലും പാകിസ്ഥാന് അടിതെറ്റി. ടി20 ഇന്നലെ വരെ ഇന്ത്യ 5-0ത്തിന്റെ ആധിപത്യം നേടിയിരുന്നു.
ട്വന്റി 20 ലോകകപ്പില് അയല്ക്കാര് ആദ്യം നേര്ക്കുനേര് വന്നത് 2007 സെപ്റ്റംബര് 14ന്. ഇരുടീമും 141 റണ്സ് വീതം നേടി ഒപ്പത്തിനൊപ്പം. ജേതാക്കളെ നിശ്ചയിച്ചത് ബൗള് ഔട്ടിലൂടെ.
ഇങ്ങനെയൊരു നിയമത്തെക്കുറിച്ച് അറിവില്ലാതിരുന്ന പാക് നിരയിലെ യാസിര് അറാഫത്തിനും ഉമര് ഗുല്ലിനും ഷാഹിദ് അഫ്രീദിക്കും പിഴച്ചു.
ബൗള്ഔട്ടിന് മുന്പ് പരിശീലനം നടത്തിയെത്തിയ ഇന്ത്യക്കായി വിരേന്ദര് സെവാഗും ഹര്ഭജന് സിംഗും റോബിന് ഉത്തപ്പയും ലക്ഷ്യം കണ്ടു.
ഫൈനലിലെ എതിരാളികള് വീണ്ടും പാകിസ്ഥാന്. ഗൗതം ഗംഭീറിന്റെ 75 റണ്സിന്റെ കരുത്തില് ഇന്ത്യ 157ല് എത്തി. ആര് പി സിംഗും ഇര്ഫാന് പഠാനും മുന്നിരയെ വീഴ്ത്തിയെങ്കിലും ഇന്ത്യയെ ഭയപ്പെടുത്തി മിസ്ബ ഉള് ഹഖ്.
ധോണി അവസാന ഓവര് ജൊഗീന്ദര് ശര്മ്മയെ ഏല്പ്പിക്കുമ്പോള് പാകിസ്ഥാന് വേണ്ടത് 13 റണ്സ്. മിസ്ബ എസ് ശ്രീശാന്തിന്റെ കൈയില് കുടുങ്ങിയപ്പോള് ട്വന്റി 20 ക്രിക്കറ്റില് പുതുയുഗപ്പിറവി.
ഇന്ത്യയും പാകിസ്ഥാനും പിന്നെ മുഖാമുഖം വരുന്നത് 2012ല് കൊളംബോയില്. ആദ്യം ബാറ്റ് ചെയത് പാകിസ്ഥാന് 128ല് ഒതുങ്ങി. ലക്ഷ്മിപതി ബാലാജിക്ക് മൂന്ന് വിക്കറ്റ്.
വിരാട് കോലിയുടെ അപരാജിത അര്ധസെഞ്ച്വറി മൂന്നോവര് ബാക്കിനില്ക്കേ ഇന്ത്യയെ ലക്ഷ്യത്തിലെത്തിച്ചു. ജയം എട്ട് വിക്കറ്റിന്. എന്നാല് ഇന്ത്യക്ക് കിരീടം നേടാനായില്ല.
2014ല് ധാക്കയിലും പാകിസ്ഥാന് തലകുനിച്ചു. ആദ്യം ക്രീസിലെത്തിയ പാകിസ്ഥാന് നേടാനായത് 7 വിക്കറ്റിന് 130 റണ്സ്. ഒന്പത് പന്ത് ശേഷിക്കേ ഇന്ത്യക്ക് അനായാസ വിജയം. അപരാജിതരായി കോലിയും സുരേഷ് റെയ്നയും.
ട്വന്റി 20 ലോകകപ്പില് ഇരുടീമും അവസാനം ഏറ്റുമുട്ടിയത് 2016 മാര്ച്ച് 19ന്. ഇന്ത്യന് ബൗളിംഗിന് മുന്നില് പതറിയ പാകിസ്ഥാന് കിതച്ചെത്തിയത് 118ല്.
അല്പമൊന്ന് പതറിയെങ്കിലും വിശ്വസതനായി ഒരിക്കല്കൂടി വിരാട് കോലി. 37 പന്തില് 55 നോട്ടൗട്ട്. 13 പന്ത് ശേഷിക്കേ ഇന്ത്യക്ക് ആറ് വിക്കറ്റ് വിജയം.
ടി20 ക്രിക്കറ്റ് ചരിത്രത്തില് ഇന്ത്യയുടെ 116-ാം മത്സരമായിരുുന്നു ഇന്നലത്തേത്. 73 കളിയില് ജയിച്ചപ്പോള് 38ല് തോറ്റു. രണ്ട് മത്സരം ടൈയായി. ഫലമില്ലാതെ പോയത് മൂന്ന് കളികള്.
പാകിസ്ഥാന് ഇന്നലെ 130 ട്വന്റി 20 മത്സരങ്ങള് പൂര്ത്തിയാക്കി. 78 ജയം നേടിയപ്പോള് 45 കളിയില് തോറ്റു. രണ്ട് മത്സരം ടൈയായി. മത്സര ഫലമില്ലാതെ പോയത് അഞ്ച് കളിയില്.
ഇന്ത്യയുടെ വിജയശതമാനം 63.5. പാകിസ്ഥാന്റെ വിജയശതമാനം 59.7. രണ്ട് സന്നാഹമത്സരങ്ങളിലും ഇന്ത്യ ജയിച്ചപ്പോള് പാകിസ്ഥാന് ഓരോ ജയവും തോല്വിയും രുചിച്ചു.
ഇന്നലെ തോറ്റതോടെ ട്രോളുകളില് നിറയുകയാണ് ഇന്ത്യ. കോലിയുടെ ക്യാപ്റ്റന്സി, ഹാര്ദിക് പാണ്ഡ്യയുടേയും ഭുവനേശ്വര് കുമാറിന്റേയും ഫോം ഔട്ട് ഇവയെല്ലാം പരിഹസിക്കപ്പെടുന്നുണ്ട്.
തുടക്കത്തില് തന്നെ ഇന്ത്യ പ്രതിരോധത്തിലായി. ഫോമിലുള്ള രോഹിത് ശര്മയും കെ എല് രാഹുലും ഷഹീന് അഫ്രീദിയുടെ പന്തുകള്ക്ക് മുന്നില് കീഴടങ്ങി.
ഷഹീന് അഫ്രീദിയുടെ ആദ്യ ഓവറിലെ നാലാം പന്തില് ഹിറ്റ്മാന് രോഹിത് ശര്മ എല്ബിയില് പുറത്താവുകയായിരുന്നു. നേരിട്ട ആദ്യ പന്തില് തന്നെ ഇന്ത്യയുടെ ഉപനായകന് പവലിയനില് തിരിച്ചെത്തി.
മൂന്നാം ഓവറില് വീണ്ടും പന്തെടുത്തപ്പോള് ആദ്യ പന്തില് തന്നെ കെ എല് രാഹുലിനെ ഒന്നാന്തരമൊരു ഇന്-സ്വിങ്ങറില് അഫ്രീദി കുറ്റി പിഴുതു.
രാഹുലിന് മൂന്ന് റണ്സെടുക്കാന് മാത്രമാണ് സാധിച്ചത്. അവിടംകൊണ്ടും അവസാനിച്ചില്ല. തന്റെ ആദ്യ ഓവര് എറിയാനെത്തിയ ഹസന് അലി നാലാം പന്തില് സൂര്യകുമാറിനെ(11) വിക്കറ്റിന് പിന്നില് റിസ്വാന്റെ കൈകളിലെത്തിച്ചു.