ദില്ലി ചലോ ; നാളത്തെ ചര്‍ച്ചയും പരാജയപ്പെട്ടാല്‍ രാജ്യവ്യാപക സമരമെന്ന് കര്‍ഷക സംഘടനകള്‍

ഏതാണ്ട് മൂന്നുലക്ഷത്തോളം കര്‍ഷകരാണ് സമരത്തിന്‍റെ ഒമ്പതാം ദിവസം ദില്ലി അതിര്‍ത്തികളില്‍ ഭക്ഷണമുണ്ടാക്കിയും പാട്ടുപാടിയും സമരം നയിക്കുന്നത്. ചില കര്‍ഷകരുടെ കുടുംബങ്ങളും സമരത്തിനൊപ്പമുണ്ട്. സമരം തുടങ്ങിയ അവസരത്തില്‍ തന്നെ ബിജെപി നേതൃത്വത്തിലുള്ള കേന്ദ്രസര്‍ക്കാര്‍ സമവായത്തിന് തയ്യാറാകാന്‍ സാധ്യതയില്ലെന്ന തിരിച്ചറിവില്‍ ഒരു മാസത്തേക്കുള്ള ഭക്ഷ്യസാധനങ്ങളുമായാണ് കര്‍ഷകര്‍ "ദില്ലി ചലോ"  മാര്‍ച്ചിനെത്തിയത്. 

കര്‍ഷകരുടെ കണക്കുക്കൂട്ടല്‍ തെറ്റിയില്ല. സമരത്തിന്‍റെ ഒമ്പതാം ദിവസം അവസാനിക്കുമ്പോഴും വിവാദമായ ബില്ല് പിന്‍വലിക്കുന്നത് സംബന്ധിച്ച ഒരു ചര്‍ച്ചയ്ക്കുള്ള ഒരു ആലോചനയെ കേന്ദ്രസര്‍ക്കാറിന് മുന്നിലില്ലെന്ന് വേണം മനസിലാക്കാന്‍. 

എന്നാല്‍ സമരം തുടരേണ്ടിവന്നാല്‍ കൂടുതല്‍ ശക്തമാക്കാനാണ് കര്‍ഷക സംഘടനകളുടെ തീരുമാനം. ഇതിനിടെ ഇന്നലെ മൂന്ന് കേന്ദ്രമന്ത്രിമാർ പങ്കെടുത്ത യോ​ഗത്തിൽ മന്ത്രിമാർക്കൊപ്പം ഉച്ചഭക്ഷണം കഴിക്കാൻ കർഷക നേതാക്കൾ തയ്യാറായില്ല. അവരുടെ ഗുരുദ്വാരകളിലെ അടുക്കളയിൽ (ലം​ഗാർ) തയ്യാറാക്കിയ ആഹാരം കൊണ്ട് വന്നാണ് കര്‍ഷക നേതാക്കള്‍ ഉച്ച ഭക്ഷണം കളിച്ചത്. സര്‍ക്കാര്‍ വാഗ്ദാനം ചെയ്ത വൈകീട്ടത്തെ ചായ സല്‍ക്കാരവും നേതാക്കള്‍ ബഹിഷ്ക്കരിച്ചു. 'അവർ ഞങ്ങൾക്ക് ആഹാരം വാ​ഗ്ദാനം ചെയ്തു. എന്നാൽ ഞങ്ങൾ അത് നിരസിക്കുകയും ഗുരുദ്വാരകളിലെ അടുക്കളയിൽ നിന്ന് കൊണ്ടുവന്ന  ആഹാരം കഴിക്കുകയുമാണ് ചെയ്തത്' - കർഷകർ പറഞ്ഞു. 

ചർച്ചയ്ക്ക് കർഷക വിദഗ്ധർ എത്തിയിട്ടുണ്ടെന്ന് പറഞ്ഞ കൃഷിമന്ത്രിയെ കർഷക സം‌ഘടനാ നേതാക്കൾ ചോദ്യം ചെയ്തു. നിയമത്തിലെ ആശങ്കകൾ പരിഹരിക്കാൻ വിദഗ്ധർ എത്തിയിട്ടുണ്ടെന്നാണ് മന്ത്രി പറയുന്നത്. എന്നാൽ നിയമത്തെക്കുറിച്ച് മന്ത്രിക്ക് കർഷകരോട് വിശദീകരിക്കാനാവില്ലെങ്കിൽ പിന്നെ എങ്ങനെ നിയമം കൊണ്ടുവന്നുവെന്ന് കർഷക സംഘടനാ നേതാക്കൾ ചോദിച്ചു. 

നിയമം റദ്ദാക്കുന്നത് പ്രായോഗികമല്ലെന്ന് കേന്ദ്രസർക്കാരിന്‍റെ നിലപാട്. എന്നാല്‍ എന്താണ് ആ അപ്രായോഗിക എന്ന് വ്യക്തമാക്കാന്‍ കേന്ദ്ര സര്‍ക്കാര്‍ തയ്യാറായില്ല. നിലവിലെ നിയമത്തിൽ താങ്ങു വില ഉറപ്പാക്കാം. ഇതിനായി എക്‌സിക്യൂട്ടീവ് ഓർഡർ പുറത്തിറക്കും. സമരത്തിൽ പങ്കെടുത്തതിന്‍റെ പേരിൽ കേസുകൾ ഒഴിവാക്കുന്ന കാര്യം പരിഗണനയിലുണ്ടെന്നും കേന്ദ്രസർക്കാർ ചർച്ചയിൽ വ്യക്തമാക്കി. 

രാവിലെ പഞ്ചാബ് മുഖ്യമന്ത്രി അമരീന്ദർ സിംഗ് കേന്ദ്ര ആഭ്യന്തരമന്ത്രി അമിത് ഷായെ കണ്ടു. അടിയന്തരമായി കർഷകരുടെ ആവശ്യങ്ങൾ അംഗീകരിച്ചേ തീരൂവെന്നും, ഇത് രാജ്യത്തിന്‍റെ സാമ്പത്തിക സുരക്ഷയുടെ പ്രശ്നമാണെന്നും അമരീന്ദർ സിംഗ് അമിത് ഷായോട് പറഞ്ഞു. ഇതിനിടെ കര്‍ഷകര്‍ക്കുള്ള പിന്തുണ ഏറുകയാണ്. കർഷക സമരത്തിന് പിന്തുണയുമായി പഞ്ചാബ് മുൻ മുഖ്യമന്ത്രിയും മുൻ എൻഡിഎ സഖ്യകക്ഷിയായ അകാലിദളിന്‍റെ മുതിർന്ന നേതാവുമായ പ്രകാശ് സിംഗ് ബാദൽ പദ്മവിഭൂഷൻ തിരികെ നൽകുമെന്ന് പ്രഖ്യാപിച്ചു.

ശിരോമണി അകാലിദൾ നേതാവ് സുഖ് ദേവ് സിങ് ധിൻസയും പത്മഭൂഷൺ പുരസ്കാരം തിരികെ നൽകുമെന്ന് പ്രഖ്യാപിച്ചു. ഭീം ആർമി നേതാവ് ചന്ദ്രശേഖർ ആസാദ് സിംഘു അതിർത്തിയിൽ സമരം ചെയ്യുന്ന കർഷകരെ കാണാനെത്തി. പഞ്ചാബിലെ പ്രശസ്തരായ സാംസ്കാരിക, കലാപ്രവർത്തകർ സമരത്തിന് പിന്തുണയേകാനെത്തി. കർഷക സമരത്തിന് പിന്തുണയുമായി നിരവധി നേതാക്കളാണ് ദില്ലി അതിർത്തികളിലെ സമരപ്പന്തലുകളിലേക്ക് എത്തുന്നത്. തൃണമൂൽ കോൺഗ്രസ് എംപി ഡെറക് ഒബ്രയൻ, ദില്ലി മന്ത്രി സത്യേന്ദർ ജയിന്‍ എന്നിവര്‍ കര്‍ഷകരെ സന്ദര്‍ശിച്ചു.

ഗായകൻ ജാസി ബി, അമരീന്ദർ ഗിൽ, ഗിപ്പി ഗ്രേവാൾ, കരംജീത് അൻമോൾ എന്നിവരും, ഹാസ്യതാരം ഗുർപ്രീത് ഖുഗ്ഗിയും കർഷകസമരത്തിന് പിന്തുണയുമായി സന്ദേശങ്ങൾ പുറത്തുവിട്ടു. ദില്ലി ചലോ മാർച്ചിന്‍റെ പശ്ചാത്തലത്തിൽ നിയമത്തിൽ കാര്യമായ മാറ്റങ്ങൾ ആലോചിക്കാൻ കേന്ദ്രസർക്കാരിന് മേൽ കടുത്ത സമ്മർദ്ദമേറുകയാണ്.  സിംഗൂരിൽ 2006-ൽ നടന്ന ഭൂസമരത്തിന്‍റെ വലിയ രൂപമാണ് ദില്ലിയിൽ കാണുന്നതെന്ന് പറഞ്ഞ പശ്ചിമബംഗാൾ മുഖ്യമന്ത്രി മമതാ ബാനർജി കർഷകസമരത്തിന് എല്ലാ പിന്തുണയും ഇന്നലെ പ്രഖ്യാപിച്ചിരുന്നു. വിവാദനിയമഭേദഗതി പിൻവലിച്ചില്ലെങ്കിൽ പശ്ചിമബംഗാളിലും സമരം തുടങ്ങുമെന്നും മമത വ്യക്തമാക്കി. 

ദില്ലി അതിർത്തിയിലാകട്ടെ കടുത്ത ഗതാഗത സ്തംഭനത്തിലാണ്. ഉത്തർപ്രദേശ് - ദില്ലി അതിർത്തിയായ ഗാസിപൂരിലെ എൻഎച്ച് 24 പൂർണമായും അടഞ്ഞു കിടക്കുകയാണ്. അപ്സര/ ഭോപ്‍ര/ ഡിഎൻഡി ഫ്ലൈ ഓവറുകൾ ഉപയോഗിച്ച് മാത്രമേ ഇപ്പോൾ ദില്ലിയിലേക്ക് കടക്കാനാകുന്നുള്ളൂ. 

അവിടങ്ങളിൽത്തന്നെ കടുത്ത ഗതാഗതസ്തംഭനമാണ്. സിംഖു, ലാംപൂർ, ഔചാണ്ഡി, സഫിയബാദ്, പിയാവോ മനിയാരി, സബോലി എന്നീ അതിർത്തി റോഡുകൾ പൂർണമായും അടഞ്ഞുകിടക്കുന്നു. ടിക്‍രി, ഝരോഡ ബോർഡറും അടച്ചിട്ടിരിക്കുകയാണ്. ബഡുസരായ് അതിർത്തി റോഡുകൾ വഴി കാറുകളും ഇരുചക്രവാഹനങ്ങളും മാത്രമേ കടത്തിവിടുന്നുള്ളൂ. ഝാടികാര ബോർഡർ റോഡിലൂടെ ഇരുചക്രവാഹനങ്ങൾ മാത്രമേ കടത്തിവിടുന്നുള്ളൂ.

അതേസമയം, സമരം ചെയ്യുന്ന കർഷകർക്കെതിര്‍ക്കെതിരെ അപകീർത്തികരമായ പരാമർശം നടത്തിയതിന് നടി കങ്കണ റണൗത്തിനെതിരെ ദില്ലി സിഖ് ഗുരുദ്വാര മാനേജ്മെന്‍റ് കമ്മിറ്റി വക്കീൽ നോട്ടീസയച്ചു. സമരത്തിന് വന്ന വൃദ്ധയായ ഒരു സ്ത്രീയുടെ ചിത്രം പങ്കുവച്ച്, ഇവർ എല്ലാ സമരത്തിനുമെത്തുമെന്നും, നൂറ് രൂപ കൊടുത്താൽ മതിയെന്നുമുള്ള കങ്കണയുടെ ട്വീറ്റ് വിവാദമായിരുന്നു. 

ഷഹീൻബാഗ് സമരത്തിലണിനിരന്ന ദാദിയാണ് ഇവരും എന്ന വ്യാജപ്രചാരണമാണ് കങ്കണ ട്വീറ്റിലൂടെ നടത്തിയത്. വൃദ്ധരായ മനുഷ്യരെക്കുറിച്ച് മോശം പരാമർശം നടത്തുകയും, കർഷകരെ ദേശദ്രോഹികളായി ചിത്രീകരിക്കുകയും ചെയ്ത കങ്കണ റണൗത്ത് പ്രസ്താവന പിൻവലിച്ച് മാപ്പ് പറയണമെന്നാണ് വക്കീൽ നോട്ടീസിൽ ആവശ്യപ്പെട്ടിരിക്കുന്നത്. അതല്ലെങ്കിൽ നിയമനടപടികളുമായി മുന്നോട്ടുപോകുമെന്നും ദില്ലി സിഖ് ഗുരുദ്വാര മാനേജ്മെന്‍റ് കമ്മിറ്റി അധ്യക്ഷൻ മഞ്ജീന്ദർ സിംഗ് സിർസ വ്യക്തമാക്കി.