ഈ മരുന്നിന്റെ ഉപയോഗം വൃക്ക, മസ്തിഷ്കം, ശ്വാസകോശം എന്നിവയ്ക്ക് തകരാറുണ്ടാക്കുകയും ചില ഘട്ടങ്ങളില് മരണത്തിനുപോലും കാരണമായേക്കാമെന്നും തമിഴ്നാട് ഡ്രഗ് കണ്ട്രോള് ഡയറക്ടറേറ്റ് നൽകുന്ന മുന്നറിയിപ്പ്
ചെന്നൈ: ആല്മണ്ട് കിറ്റ് എന്ന കഫ് സിറപ്പിന്റെ വിൽപനയും നിർമാണവും വിതരണവും നിരോധിച്ച് തമിഴ്നാട് സർക്കാർ. ശാസ്ത്രീയ പരിശോധനയില് ഉയര്ന്ന വിഷാംശമുള്ള ഈതലീന് ഗ്ലൈക്കോള് കണ്ടെത്തിയതിന്റെ പശ്ചാത്തലത്തിലാണ് നടപടി. ബിഹാറിൽ നിന്നായിരുന്നു ഈ കഫ് സിറപ്പ് നിർമ്മിച്ചിരുന്നു. ഗുരുതര ആരോഗ്യ പ്രശ്നങ്ങളും ചിലപ്പോൾ മരണത്തിന് വരെ കാരണമാകുന്നതാണ് ഈതലീന് ഗ്ലൈക്കോള്. ഈ മരുന്നിന്റെ ഉപയോഗം വൃക്ക, മസ്തിഷ്കം, ശ്വാസകോശം എന്നിവയ്ക്ക് തകരാറുണ്ടാക്കുകയും ചില ഘട്ടങ്ങളില് മരണത്തിനുപോലും കാരണമായേക്കാമെന്നും തമിഴ്നാട് ഡ്രഗ് കണ്ട്രോള് ഡയറക്ടറേറ്റ് നൽകുന്ന മുന്നറിയിപ്പ്. എഎൽ 24002 എന്ന ബാച്ച് മരുന്ന് ഉപയോഗിക്കുന്നതും വിൽക്കുന്നതിനും കർശന വിലക്കാണ് പ്രഖ്യാപിച്ചിട്ടുള്ളത്. അടുത്തിടെ വിഷമയമുള്ള കഫ് സിറപ്പ് ഉപയോഗിച്ചതിന്റെ പേരില് രാജ്യത്ത് കുട്ടികള് മരണപ്പെട്ടതിന്റെ പശ്ചാത്തലത്തിലാണ് കര്ശന നടപടി.
ആല്മണ്ട് കിറ്റ് സിറപ്പിന്റെ വില്പ്പന ഉടനടി നിര്ത്തിവെക്കണമെന്ന് ആവശ്യപ്പെട്ട് സംസ്ഥാനത്തെ എല്ലാ മെഡിക്കല്ഷോപ്പുകള്ക്കും ആശുപത്രികള്ക്കും ഫാര്മസികള്ക്കും തമിഴ്നാട് ഡ്ര ഗ് കണ്ട്രോള് ഡയറക്ടറേറ്റ് നിര്ദേശം നല്കിയിട്ടുണ്ട്. നിലവില് മരുന്ന് കൈവശമുള്ളവര് അവ സുരക്ഷിതമായി ഒഴിവാക്കാൻ അധികൃതരെ ബന്ധപ്പെടണമെന്നും ആരോഗ്യവകുപ്പ് വിശദമാക്കിയിട്ടുണ്ട്. ഇതുസംബന്ധിച്ച പരാതികള് അറിയിക്കുന്നതിനോ, വിശദീകരണം ലഭ്യമാക്കുന്നതിനോ 94458 65400 എന്ന വാട്സാപ്പ് നമ്പറില് ബന്ധപ്പെടാനും ഡയറക്ടറേറ്റ് നിര്ദേശിച്ചിട്ടുണ്ട്.
