ഭ്രാന്തൻ പ്രതികാരം! സി​ഗരറ്റ് വലിക്കുന്നത് തടഞ്ഞതിന് പെട്രോൾ പമ്പിന് തീയിട്ട് യുവാവ്, സംഭവം റായ്പൂരിൽ

ഛത്തീസ്ഗഡിലെ റായ്പൂരിൽ പെട്രോൾ പമ്പിന് തീ വെച്ച് യുവാവ്. പമ്പിനുള്ളിൽ പുകവലിക്കരുതെന്ന് പറഞ്ഞതിന് പിന്നാലെ യുവാവ് ഫ്യുവൽ നോസിലിന് ലൈറ്റർ ഉപയോഗിച്ച് തീയിടുകയായിരുന്നു. 

Image Credit : X

പെട്രോൾ പമ്പിന് തീയിട്ട് യുവാവ്

പെട്രോൾ പമ്പിൽ പുകവലിക്കരുതെന്ന് പറഞ്ഞതിൽ പ്രകോപിതനായ യുവാവ് കയ്യിലുണ്ടായിരുന്ന ലൈറ്റർ ഉപയോഗിച്ച് പമ്പിന് തീയിടാൻ ശ്രമിച്ചു. ഛത്തീസ്ഗഡിന്റെ തലസ്ഥാനമായ റായ്പൂരിലെ ഉർല എന്ന സ്ഥലത്താണ് സംഭവം. ഇതിന്റെ വീഡിയോ സോഷ്യൽ മീഡിയയിൽ വൈറലാണ്.

Image Credit : X

പുകവലിക്കരുതെന്ന് പറഞ്ഞതിന് പ്രതികാരം

പെട്രോൾ അടിക്കുന്നതിനിടെ ഒരാൾ സിഗരറ്റ് വലിക്കുന്നത് കണ്ട ബൈക്ക് യാത്രക്കാരൻ പുകവലിക്കരുതെന്ന് ആവശ്യപ്പെട്ടു. ഇതിൽ ദേഷ്യം വന്നയാൾ ലൈറ്റർ കത്തിച്ച് ഫ്യുവൽ നോസിലിൽ കാണിച്ചു. ഇതോടെ ബൈക്കിലേക്കും പമ്പിലേക്കും തീ പടർന്നു. പമ്പ് ജീവനക്കാർ ഉടൻ ഫയർ എക്സ്റ്റിംഗ്യൂഷർ ഉപയോഗിച്ച് തീ അണച്ചതിനാൽ വൻ ദുരന്തം ഒഴിവായി.

Image Credit : X

സംഭവം ഉർല ഏരിയയിലെ പെട്രോൾ പമ്പിൽ

ഫെബ്രുവരി 19ന് വൈകുന്നേരം ഉർല ഏരിയയിലെ പെട്രോൾ പമ്പിലാണ് സംഭവം. ധർമേന്ദ്ര ക്ഷത്രി, ഇമ്രാൻ എന്നിങ്ങനെ രണ്ട് പേർ ബൈക്കിൽ ഇന്ധനം നിറയ്ക്കാനെത്തി. ഇമ്രാൻ ബൈക്കിൽ ഇരിക്കുമ്പോൾ ധർമേന്ദ്ര അരികിൽ നിൽക്കുകയായിരുന്നു. പെട്രോൾ ടാങ്ക് തുറന്നപ്പോൾ ധർമേന്ദ്ര സിഗരറ്റ് കത്തിക്കാൻ ശ്രമിച്ചു. പുകവലിക്കരുതെന്ന് പറഞ്ഞപ്പോൾ, അയാൾ ദേഷ്യത്തിൽ ലൈറ്റർ ഉപയോഗിച്ച് ഫ്യുവൽ നോസിലിന് തീയിടുകയായിരുന്നു.

Image Credit : X

ജീവൻ രക്ഷിക്കാൻ ഭയന്ന് ഓടി ആളുകൾ

തീ വേഗത്തിൽ ബൈക്കിന്റെ പെട്രോൾ ടാങ്കിലേക്കും പമ്പിംഗ് മെഷീനിലേക്കും പടർന്നു. ഇതോടെ അവിടെയുണ്ടായിരുന്നവർ ഭയന്ന് ഓടി. തീ പടർന്നതോടെ പ്രതികളും ബൈക്ക് യാത്രക്കാരനും പമ്പ് ജീവനക്കാരനും രക്ഷപ്പെടാനായി ഓടി. പമ്പിലെ ജീവനക്കാരൻ വേഗത്തിൽ പ്രവർത്തിച്ച് ഫ്യുവൽ പൈപ്പ് മാറ്റുകയും പ്രധാന ഇന്ധന വിതരണം നിർത്തുകയും ചെയ്തുവെന്ന് അധികൃതർ പറയുന്നു.

Image Credit : X

രക്ഷപ്പെടാൻ ശ്രമിച്ച പ്രതികൾ പിടിയിൽ

പിന്നീട് പമ്പിലുണ്ടായിരുന്ന ഫയർ സേഫ്റ്റി കിറ്റ് ഉപയോഗിച്ച് ജീവനക്കാർ തീ അണച്ചു. ഇതോടെ വലിയൊരു സ്ഫോടനമോ തീപിടിത്തമോ ഒഴിവായി. ഈ ബഹളത്തിനിടയിൽ, കത്തുന്ന ഇന്ധനം പ്രതിയുടെ ദേഹത്തും തെറിച്ചതായി റിപ്പോർട്ടുണ്ട്. സംഭവത്തിന് ശേഷം ഇരുവരും രക്ഷപ്പെടാൻ ശ്രമിച്ചെങ്കിലും പമ്പ് ജീവനക്കാർ പിടികൂടി പൊലീസിൽ വിവരമറിയിക്കുകയായിരുന്നു.

Image Credit : X

പെട്രോൾ പമ്പ് ജീവനക്കാരുടെ സമയോചിതമായ ഇടപെടൽ

പമ്പ് മാനേജരുടെ പരാതിയുടെയും സിസിടിവി ദൃശ്യങ്ങളുടെയും അടിസ്ഥാനത്തിൽ ഉർല പൊലീസ് രണ്ട് പ്രതികളെയും അറസ്റ്റ് ചെയ്തു. തീവെപ്പ്, പൊതുസുരക്ഷയ്ക്ക് അപകടമുണ്ടാക്കൽ തുടങ്ങിയ കുറ്റങ്ങൾ ചുമത്തി കേസെടുത്തതായി ഉർല ഇൻസ്പെക്ടർ രോഹിത് മഹേൽക്കർ പറഞ്ഞു. തീ അടുത്തുള്ള വാഹനങ്ങളിലേക്കും ഇന്ധന സംഭരണ ടാങ്കുകളിലേക്കും പടരാൻ സാധ്യതയുണ്ടായിരുന്നു. പമ്പ് ജീവനക്കാരുടെ പെട്ടെന്നുള്ള ഇടപെടലാണ് വൻ ദുരന്തം ഒഴിവാക്കിയതെന്നും പൊലീസ് പറഞ്ഞു.

Man lights fire at petrol pump in Raipur. Staff rush to stop disaster...
🚨 CCTV footage shows a man setting fire near a petrol pump nozzle at Sangeeta Fuels, Raipur, Chhattisgarh. Staff acted fast to prevent disaster. Both accused arrested. pic.twitter.com/3r6ey6uFtU

— contentkikamii (@contentkikamii) February 20, 2026