ബൂത്തിലെത്തിയാല് സംശയമൊന്നും വേണ്ട; വോട്ട് ചെയ്യേണ്ടത് ഇങ്ങനെ
കേരളം നാളെ പോളിങ് ബൂത്തിൽ എത്തും. രാവിലെ 7 മുതൽ വൈകിട്ട് 6 മണി വരെയാണ് വോട്ടെടുപ്പ്. ബൂത്തിലെത്തിയാല് ക്യൂ നിൽക്കുന്നത് മുതൽ ബട്ടൻ അമർത്തുന്നതുവരെ ചെയ്യേണ്ട കാര്യങ്ങള് എന്തൊക്കെയാണെന്ന് നോക്കാം.
ബൂത്തിലെത്തിയാല് സംശയമൊന്നും വേണ്ട; വോട്ട് ചെയ്യേണ്ടത് ഇങ്ങനെ
ബൂത്തിലെത്തിയാല് ക്യൂ നിൽക്കുന്നത് മുതൽ ബട്ടൻ അമർത്തുന്നതുവരെ ചെയ്യേണ്ട കാര്യങ്ങള് എന്തൊക്കെയാണെന്ന് നോക്കാം.
ക്യൂ പാലിക്കണം
പോളിങ് ബൂത്തിലെത്തിയാല് ആദ്യം ക്യൂ പാലിക്കുക. സുരക്ഷാ ഉദ്യോഗസ്ഥര് ക്രമമനുസരിച്ച് വോട്ടര്മാരെ കടത്തിവിടും.
വോട്ടര് പട്ടികയില് പേരുണ്ടെന്ന് ഉറപ്പാക്കും
ഫസ്റ്റ് പോളിങ് ഓഫിസറുടെ മുന്നിലാണ് ആദ്യമെത്തുക. വോട്ടറുടെ തിരിച്ചറിയല് കാര്ഡും സ്ലിപ്പിലെ ക്രമനമ്പറും പരിശോധിച്ച് വോട്ടര് പട്ടികയില് പേരുണ്ടെന്ന് ഉറപ്പാക്കും. തുടര്ന്ന് ക്രമനമ്പറും പേരും ഉറക്കെ വിളിച്ചുപറയും. ഈ സമയം പോളിങ് ഏജന്റുമാര് അവരുടെ പക്കലുള്ള പട്ടിക പരിശോധിച്ച് ശരിയായ വോട്ടറാണെന്ന് ഉറപ്പുവരുത്തുന്നു.
ചൂണ്ടുവിരലില് മഷി പുരട്ടും
വോട്ടര് സെക്കന്ഡ് പോളിങ് ഓഫിസറുടെ അടുത്തെത്തുമ്പോള് ഇടതുകയ്യിലെ ചൂണ്ടുവിരലില് മഷി പുരട്ടും. തുടര്ന്ന് വോട്ടര്മാരുടെ റജിസ്റ്ററില് വോട്ടറുടെ ക്രമനമ്പര് എഴുതും. ഒപ്പം വോട്ടര് തിരിച്ചറിയല് കാര്ഡ് നമ്പറും എഴുതും. തുടര്ന്ന് വോട്ടറെക്കൊണ്ട് റജിസ്റ്ററില് ഒപ്പുവയ്പിക്കുകയോ വിരലടയാളം രേഖപ്പെടുത്തുകയോ ചെയ്യും. തുടര്ന്ന് വോട്ടേഴ്സ് സ്ലിപ് നല്കും.
ബാലറ്റ് ബട്ടന്
അടുത്തതായി വോട്ടര് എത്തുന്നത് വോട്ടിങ് യന്ത്രത്തിന്റെ കണ്ട്രോള് യൂണിറ്റിന്റെ ചുമതലയുള്ള തേര്ഡ് പോളിങ് ഓഫിസറുടെ മുന്നിലാണ്. കൈവിരലിലെ മഷി പരിശോധിച്ചശേഷം ഓഫിസര് കണ്ട്രോള് യൂണിറ്റിലെ ബാലറ്റ് ബട്ടന് അമര്ത്തും.
നീല ബട്ടന് അമര്ത്തുക
തുടര്ന്ന് വോട്ടര് കൗണ്ടറില് പ്രവേശിച്ച് താന് തെരഞ്ഞെടുക്കുന്ന സ്ഥാനാര്ഥിയുടെ പേരും ഫോട്ടോയും ചിഹ്നവും രേഖപ്പെടുത്തിയിരിക്കുന്നതിന് നേരെയുള്ള നീല ബട്ടന് അമര്ത്തണം. ഇതോടെ സ്ഥാനാര്ഥിയുടെ പേരിന് സമീപത്തെ നീല ബട്ടന് അരികിലുള്ള ലൈറ്റ് ചുവപ്പ് നിറത്തില് പ്രകാശിക്കും.
ബീപ് ശബ്ദം
ഈ സമയം കണ്ട്രോള് യൂണിറ്റില് നിന്ന് ബീപ് ശബ്ദം കേള്ക്കും. ഇതോടെ വോട്ട് രേഖപ്പെടുത്തിയതായി മനസിലാക്കാം. ബട്ടണ് അമര്ത്തിയ ശേഷം മെഷീന് സമീപമുള്ള വിവിപാറ്റ് ബോക്സിനുള്ളിലെ ഗ്ലാസിലൂടെ നിങ്ങള് വോട്ട് ചെയ്ത സ്ഥാനാര്ത്ഥിയുടെ പേരും ചിഹ്നവും അടങ്ങിയ സ്ലിപ്പ് ഏഴ് സെക്കന്ഡ് നേരത്തേക്ക് കാണാന് സാധിക്കും. വോട്ട് കൃത്യമായി രേഖപ്പെടുത്തി എന്ന് ഇതിലൂടെ ഉറപ്പാക്കാം.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam