വിൽപ്പന പൊടിപൊടിക്കുന്നു; മെഗാ പ്ലാനുമായി ആപ്പിൾ, ഇന്ത്യയിൽ ആറാമത്തെ റീട്ടെയിൽ സ്റ്റോർ വരുന്നു

ടെക് ഭീമനായ ആപ്പിൾ ഇന്ത്യയിൽ പുതിയ റീട്ടെയിൽ സ്റ്റോർ തുറക്കുന്നു. മുംബൈയിലെ ബോറിവലിയിൽ 2026 ഫെബ്രുവരി 26-നാണ് ആറാമത്തെ സ്റ്റോർ വരുന്നത്. ഇതോടെ മുംബൈ നഗരത്തിൽ മാത്രം ആപ്പിളിന് രണ്ട് സ്റ്റോറുകളാകും.

Image Credit : Asianet News

മുംബൈയിൽ ആപ്പിളിന്റെ പുതിയ സ്റ്റോർ വരുന്നു

ലോകത്തെ മുൻനിര ടെക് കമ്പനിയായ ആപ്പിൾ, ഇന്ത്യയിലെ തങ്ങളുടെ സാന്നിധ്യം കൂടുതൽ ശക്തമാക്കാൻ ഒരുങ്ങുന്നു. ഇതിന്റെ ഭാഗമായി, 2026 ഫെബ്രുവരി 26-ന് മുംബൈയിലെ ബോറിവലിയിൽ തങ്ങളുടെ ആറാമത്തെ റീട്ടെയിൽ സ്റ്റോർ തുറക്കുമെന്ന് കമ്പനി അറിയിച്ചു. നിലവിൽ മുംബൈയിലെ ബികെസി (BKC) ഏരിയയിൽ ആപ്പിളിന് ഒരു സ്റ്റോറുണ്ട്. ബോറിവലിയിലേത് നഗരത്തിലെ രണ്ടാമത്തെ സ്റ്റോറായിരിക്കും.

Image Credit : Getty

ഇന്ത്യയിൽ ചുവടുറപ്പിച്ച് ആപ്പിൾ

ഇന്ത്യയിൽ നേരിട്ടുള്ള സ്റ്റോറുകൾ തുറക്കുന്നതിൽ ആപ്പിൾ വലിയ ശ്രദ്ധയാണ് നൽകുന്നത്. 2023-ൽ മുംബൈയിലെ ബികെസിയിലും ദില്ലിയിലെ സാകേതിലുമാണ് ആദ്യത്തെ രണ്ട് സ്റ്റോറുകൾ തുറന്നത്. ഇതിന് പിന്നാലെ 2025-ൽ ബെംഗളൂരുവിലെ ഹെബ്ബാൾ, പൂനെയിലെ കൊറേഗാവ് പാർക്ക്, നോയിഡ എന്നിവിടങ്ങളിലായി മൂന്ന് പുതിയ സ്റ്റോറുകൾ കൂടി വന്നു. ഇതിന്റെ തുടർച്ചയായാണ് ഇപ്പോൾ ആറാമത്തെ സ്റ്റോർ ബോറിവലിയിൽ വരുന്നത്.

Image Credit : Asianet News

അടുത്ത ലക്ഷ്യം ഹൈദരാബാദ്?

പുറത്തുവരുന്ന റിപ്പോർട്ടുകൾ അനുസരിച്ച്, ആപ്പിളിന്റെ ഏഴാമത്തെ സ്റ്റോർ ഹൈദരാബാദിൽ തുറക്കാൻ സാധ്യതയുണ്ട്. ഇക്കാര്യത്തിൽ ഔദ്യോഗിക പ്രഖ്യാപനം വന്നിട്ടില്ലെങ്കിലും, സ്റ്റോറിലേക്കുള്ള മാനേജർമാരെയും മറ്റ് പ്രധാന ജീവനക്കാരെയും കണ്ടെത്താനുള്ള ശ്രമങ്ങൾ കമ്പനി തുടങ്ങിയതായാണ് വിവരം. അതുകൊണ്ട് തന്നെ ഹൈദരാബാദുകാർക്കും വൈകാതെ ഒരു സന്തോഷവാർത്ത പ്രതീക്ഷിക്കാം.

Image Credit : Getty

ഇന്ത്യ ഒരു പ്രധാന വിപണിയെന്ന് ആപ്പിൾ സിഇഒ ടിം കുക്ക്

കഴിഞ്ഞ ദിവസം നടന്ന നിക്ഷേപകരുടെ യോഗത്തിൽ ആപ്പിൾ സിഇഒ ടിം കുക്ക് ഇന്ത്യയെക്കുറിച്ച് സംസാരിച്ചിരുന്നു. ഇന്ത്യ തങ്ങൾക്ക് വളരെ പ്രധാനപ്പെട്ട ഒരു വിപണിയാണെന്ന് അദ്ദേഹം പറഞ്ഞു. കഴിഞ്ഞ പാദത്തിൽ ആഗോളതലത്തിൽ റീട്ടെയിൽ വിൽപ്പനയിൽ ആപ്പിൾ റെക്കോർഡ് നേട്ടം കൈവരിച്ചിരുന്നു. പ്രത്യേകിച്ച് ഇന്ത്യയിൽ ഐഫോൺ, മാക്, ഐപാഡ് എന്നിവയുടെ വിൽപ്പന മികച്ച രീതിയിലാണ് മുന്നോട്ട് പോകുന്നതെന്നും സർവീസ് രംഗത്തും നല്ല വരുമാനം ലഭിക്കുന്നുണ്ടെന്നും ടിം കുക്ക് വ്യക്തമാക്കി.

Image Credit : Getty

വിൽപ്പന കേന്ദ്രങ്ങൾ മാത്രമല്ല, മികച്ച ഉപഭോക്തൃ അനുഭവവും

ആപ്പിൾ സ്റ്റോറുകൾ വെറും സാധനങ്ങൾ വിൽക്കുന്ന കടകൾ മാത്രമല്ല, ആളുകൾക്ക് ഒത്തുകൂടാനും പുതിയ സാങ്കേതികവിദ്യകൾ പഠിക്കാനുമുള്ള ഒരിടം കൂടിയായി മാറുകയാണ്. പഴയ ഫോണുകൾ മാറ്റി പുതിയത് വാങ്ങാനുള്ള സൗകര്യം (Trade-in deals), പ്രത്യേക ഓഫറുകൾ, മികച്ച ഉപഭോക്തൃ സേവനം എന്നിവയെല്ലാം ഇന്ത്യക്കാർക്കിടയിൽ വലിയ സ്വീകാര്യത നേടിയിട്ടുണ്ട്. ഈ തുടർച്ചയായ വിപുലീകരണം, ഇന്ത്യൻ വിപണിയിൽ ആപ്പിളിനുള്ള വലിയ പ്രതീക്ഷയാണ് കാണിക്കുന്നത്.