രാവിലെ എണീറ്റ ഉടൻ മൊബെെൽ ഫോൺ നോക്കുന്ന ശീലം ചിലർക്കുണ്ട്. ആ ശീലം നല്ലതല്ലെന്നാണ് സ്വീഡനിലെ ഗോഥെൻബർഗ് സർവകലാശാലയിലെ ​ഗവേഷകർ നടത്തിയ പഠനം വ്യക്തമാക്കുന്നത്. ദിവസം തുടങ്ങുന്നതിന് മുൻപേ തന്നെ നിങ്ങൾ കഴിഞ്ഞ ദിവസം ചെയ്യാൻ വിട്ടുപോയ കാര്യങ്ങൾ നോക്കുകയും, ഇന്ന് ചെയ്യാനുള്ള കാര്യങ്ങൾ പരിശോധിക്കുകയും ചെയ്താൽ, അത് നിങ്ങളിൽ അമിതമായ ആകാംക്ഷയും സമ്മർദ്ദവും ഉണ്ടാക്കുമെന്ന് പഠനം.

 ജോലി സംബന്ധമായ ഇ-മെയിലുകൾ, ചെയ്യേണ്ട കാര്യങ്ങൾ, മറ്റ് പല ഓർമ്മക്കുറിപ്പുകൾ, എന്തിനേറെ, സഞ്ചാരികളായ സുഹൃത്തുക്കളുടെ ഇൻസ്റ്റാഗ്രാം പോസ്റ്റുകൾ എന്നിവ പോലും രാവിലെ നിങ്ങളുടെ മനസ്സിനെ മറ്റ് പല ചിന്തകളിലേക്കും സമ്മർദ്ദത്തിലേക്കും നയിച്ചേക്കാമെന്ന് സൈക്യാട്രിസ്റ്റ് ഡോ. നിക്കോൾ ബെൻഡേഴ്‌സ്-ഹാഡി പറയുന്നു.

ഫോൺ തുറന്നപാടെ പല വിവരങ്ങളുടെ കുത്തൊഴുക്ക് വരുന്നതിനാൽ, നിങ്ങളുടെ തലച്ചോറിന് തന്നെ ആശയക്കുഴപ്പം വരുന്നു. ഇതുമൂലം, പ്രധാനമായി ചെയ്യേണ്ട കാര്യങ്ങളിൽ നിന്ന് നിങ്ങളുടെ ശ്രദ്ധ തിരിയുകയും, ആവശ്യമില്ലാത്ത മെസേജുകൾക്കും ഇ-മെയിലുകൾക്കും മറുപടി അയച്ച് നിങ്ങളുടെ സമയം നഷ്ടപ്പെടുകയും ചെയ്യുന്നു. ഇതുമൂലം, നിങ്ങളുടെ കാര്യക്ഷമതയിൽ കോട്ടം തട്ടുകയും, നിങ്ങളുടെ ശ്രദ്ധ പലതിലേക്കും തിരിയുകയും ചെയ്യുന്നു.