കുട്ടികൾക്ക് ഈ 5 ഭക്ഷണങ്ങൾ നിർബന്ധമായും നൽകണം, കാരണം
ഇന്നത്തെ കാലത്ത് 90 ശതമാനം കുട്ടികളിലും ഏതെങ്കിലും തരത്തിലുള്ള കാഴ്ച വൈകല്യങ്ങൾ കണ്ടുവരാറുണ്ട്. കാഴ്ച വൈകല്യങ്ങളിൽ പലതിൽ നിന്നും പോഷകസമൃദ്ധമായ ഭക്ഷണത്തിലൂടെ നിങ്ങളുടെ കുട്ടിയുടെ കണ്ണുകളെ സംരക്ഷിക്കാവുന്നതാണ്.
കുട്ടികൾക്ക് ഭക്ഷണം നൽകുന്ന കാര്യത്തിൽ അമ്മമാർ എപ്പോഴും അതീവ ശ്രദ്ധാലുക്കളാണ്. ഭൂരിഭാഗം അമ്മമാരും കുട്ടികൾക്ക് ഇഷ്ടമുള്ളത് എന്തായാലും അത് നൽകി അവരെ സംതൃപ്താരാക്കുന്നവരാണ്. എന്നാൽ അവരുടെ ഓരോ അവയവങ്ങളുടെ വളർച്ചയ്ക്കും ആവശ്യമായ പോഷകങ്ങൾ അറിഞ്ഞ് അവ ഉൾപ്പെട്ട ഭക്ഷണം നൽകുന്നതിലാണ് മിടുക്ക്.
ഇന്നത്തെ കാലത്ത് 90 ശതമാനം കുട്ടികളിലും ഏതെങ്കിലും തരത്തിലുള്ള കാഴ്ച വൈകല്യങ്ങൾ കണ്ടുവരാറുണ്ട്. കാഴ്ച വൈകല്യങ്ങളിൽ പലതിൽ നിന്നും പോഷകസമൃദ്ധമായ ഭക്ഷണത്തിലൂടെ നിങ്ങളുടെ കുട്ടിയുടെ കണ്ണുകളെ സംരക്ഷിക്കാവുന്നതാണ്. നിങ്ങളെ അലട്ടുന്ന കാഴ്ച പ്രശ്നങ്ങൾ പലതും പോഷകാഹാര കുറവിന്റെ അടയാളമാണ്.
മാനസികവും ശാരീരികവുമായ സമ്മർദ്ദം മുതൽ പോഷകാഹാരക്കുറവ്, അമിതമായ പഞ്ചസാരയുടെ ഉപയോഗം, അമിതമായി മാംസം, പ്രോട്ടീൻ, കൊഴുപ്പ്, ജങ്ക് ഫുഡ് എന്നിവയുടെ ഉപയോഗവും ശരിയായ തോതിൽ വ്യായാമമില്ലാത്തതുമെല്ലാം കാഴ്ച വൈകല്യങ്ങൾക്ക് കാരണമാകുന്നുവെന്ന് പ്രശസ്ത ന്യൂട്രീഷ്യനിസ്റ്റായ നമാമി അഗർവാർ പറയുന്നു. കാഴ്ചക്കായി കുഞ്ഞുങ്ങളുടെ ഭക്ഷണത്തിൽ പ്രധാനമായി ഉൾപ്പെടുത്തേണ്ട അഞ്ച് ഭക്ഷണങ്ങൾ താഴേ ചേർക്കുന്നു...
ഒന്ന്...
കുട്ടികളുടെ ഭക്ഷണത്തിൽ ആഴ്ചയിൽ രണ്ടു തവണയെങ്കിലും മത്സ്യങ്ങൾ ഉൾപ്പെടുത്താം. മത്തി, അയല, ട്യൂണ,കോര എന്നിവ ഒമേഗ 3 ഫാറ്റി ആസിഡുകളുടെ ഉറവിടങ്ങളാണ്. കണ്ണുകളിലെ വരൾച്ച,ഉയർന്ന രക്ത സമ്മർദ്ദം എന്നിവ കുറയ്ക്കുന്നതിൽ ഒഗേമ 3 ഫാറ്റി ആസിഡുകൾക്ക് കഴിവുണ്ട്. ഭക്ഷണത്തിൽ മത്സ്യം ഉൾപ്പെടുത്തുന്നത് മാക്യുലാറിന്റെ നാശം തടയുകയും തിമിരം വരാതെ സംരക്ഷിക്കുകയും ചെയ്യും.
രണ്ട്...
തോരനായോ സാലഡായോ ചീരയും കാബേജും ബ്രൊക്കോളിയുമെല്ലാം കുഞ്ഞിന് ശീലമാക്കണം. വിറ്റാമിൻ എയുടേയും വൈറ്റമിൻ സിയുടെ കലവറകളായ പച്ചിലകൾ കണ്ണുകളുടെ ആരോഗ്യം നിലനിർത്തുന്നതിൽ പ്രധാന പങ്കു വഹിക്കുന്നവയാണ്.
മൂന്ന്...
ക്യാരറ്റ് ജ്യൂസായോ വിവിധ ആകൃതികളിൽ മുറിച്ചെടുത്തോ ക്യാരറ്റ് തോരനായോ കുഞ്ഞുങ്ങളെ കഴിപ്പിക്കാൻ ശ്രമിക്കണം. വിറ്റാമിൻ എ, ബീറ്റാ കരോട്ടിൻ എന്നിവയാൽ സമ്പുഷ്ടമാണ് ക്യാരറ്റ്. കണ്ണിലെ കോശങ്ങൾ സംരക്ഷിക്കുന്നതിനും കോർണിയയുടെ ആരോഗ്യത്തിനും വിറ്റാമിൻ എ ഉൾപ്പെട്ട ഭക്ഷണം കഴിക്കുന്നത് ഫലപ്രദമാണ്.
നാല്...
ഓറഞ്ച്, മുസംബി, നാരങ്ങ, സ്ട്രോബറി എന്നിങ്ങനെയുള്ള പഴങ്ങൾ ഇടനേരങ്ങളിൽ നൽകുന്നത് അവരുടെ വിശപ്പകറ്റാൻ മാത്രമല്ല, നേത്രാരോഗ്യത്തിനും നല്ലതാണ്. വിറ്റാമിൻ സി സമ്പുഷ്ടമായ സിട്രസ് പഴങ്ങൾ നിങ്ങളുടെ കുട്ടിയുടെ പ്രതിരോധ സംവിധാനത്തെ ശക്തിപ്പെടുത്തും. കണ്ണിനുണ്ടാകുന്ന അണുബാധ തടയാനും ഇവയ്ക്കു കഴിയും.
അഞ്ച്...
അണ്ടിപരിപ്പ്, ബദാം, നിലക്കടല, പിസ്താ, വാൽനട്ട് തുടങ്ങിയവ ഇഷ്ടമില്ലാത്ത കുഞ്ഞുങ്ങൾ കുറവാണ്. അവരുടെ ഭക്ഷണത്തിൽ ഇത്തരം നട്സുകൾ ധാരാളമായി ഉൾപ്പെടുത്തിക്കോളൂ. നട്സുകളിൽ ഒമേഗ ഫാറ്റ് 3, വിറ്റാമിൻ ഇ എന്നിവ കൂടുതലായി അടങ്ങിയിരിക്കുന്നു. അത് നിങ്ങളുടെ കുട്ടിയുടെ കാഴ്ചശക്തിയെ സംരക്ഷിക്കാൻ സഹായിക്കുന്ന ആൻറിഓക്സിന്റായി പ്രവർത്തിക്കും.