പുരുഷന്മാരിലെ സ്തനാർബുദം; തിരിച്ചറിയാം ഈ ലക്ഷണങ്ങളെ...
സ്ത്രീകളുമായി താരതമ്യം ചെയ്യുമ്പോൾ സ്തന കോശങ്ങൾ പുരുഷന്മാരിൽ കുറവാണ്. എന്നാല്‍ പോലും ചെറിയ മുഴകൾ പുരുഷന്മാരിൽ വന്നാൽതന്നെ അവ അടുത്തുള്ള കോശങ്ങളിലേക്ക് പടർന്ന് അർബുദമായി മാറാനുള്ള സാധ്യതയുണ്ട്.
ബ്രസ്റ്റ് ക്യാന്‍സര്‍ അഥവാ സ്തനാര്‍ബുദം എന്നത് സ്ത്രീകളിലെ അര്‍ബുദങ്ങളില്‍ ഏറ്റവും വ്യാപകമായ ക്യാന്‍സറാണ്. ഈ ക്യാന്‍സര്‍ സ്ത്രീകളില്‍ മാത്രമേ കാണപ്പെടാറുള്ളൂ എന്നാണ് പലരും കരുതുന്നത്. എന്നാല്‍ പുരുഷന്മാർക്കും അപൂർവമായി സ്തനാർബുദം വരാറുണ്ട്. സ്ത്രീകളുമായി താരതമ്യം ചെയ്യുമ്പോൾ സ്തന കോശങ്ങൾ പുരുഷന്മാരിൽ കുറവാണ്. എന്നാല്‍ പോലും ചെറിയ മുഴകൾ പുരുഷന്മാരിൽ വന്നാൽതന്നെ അവ അടുത്തുള്ള കോശങ്ങളിലേക്ക് പടർന്ന് അർബുദമായി മാറാനുള്ള സാധ്യതയുണ്ട്.
സ്ത്രീകളെ അപേക്ഷിച്ച് പുരുഷന്മാരിൽ സ്തനാർബുദം കുറവാണെങ്കിലും, 833 പുരുഷന്മാരിൽ ഒരാൾക്ക് രോഗം വരാമെന്നാണ് പഠനങ്ങള്‍ പറയുന്നത്. പുരുഷന്മാരിലെ സ്തന കോശങ്ങളുടെ അഭാവം മുഴകൾ നേരത്തെ കണ്ടെത്തുന്നത് വൈകിപ്പിക്കുന്നു. പല ഘടകങ്ങൾ കൊണ്ടും പുരുഷന്മാരില്‍ സ്തനാര്‍ബുദ്ദ സാധ്യത വര്‍ധിക്കാം. റേഡിയേഷൻ എക്സ്പോഷർ, ഹോർമോൺ ചികിത്സകള്‍, അണുബാധകൾ, അമിത വണ്ണം, പ്രായം, പാരമ്പര്യം, ഈസ്ട്രജൻ ഗുളികകളുടെ ഉപയോഗം, സിറോസിസ് ഉൾപ്പടെയുള്ള ഗുരുതരമായ കരൾ രോഗങ്ങൾ തുടങ്ങിയവ സ്തനാര്‍ബുദ്ദ സാധ്യത വര്‍ധിപ്പിക്കാം. പുരുഷന്മാരിൽ സ്തനാർബുദം അപൂർവമാണെങ്കിലും പലപ്പോഴും അവ കണ്ടെത്തുന്നത് വളരെ വൈകിയാകും. പുരുഷന്മാരില്‍ കാണുന്ന സ്തനാര്‍ബുദ്ദത്തിന്‍റെ ചില ലക്ഷണങ്ങള്‍ എന്തൊക്കെയെന്ന് നോക്കാം...
ഒന്ന്...
സ്തനത്തിൽ വേദനയില്ലാത്ത നീർവീക്കം, സ്തനത്തില്‍ ചുവപ്പ് എന്നിവ പുരുഷന്മാരില്‍ കാണുന്ന സ്തനാര്‍ബുദ്ദത്തിന്‍റെ ലക്ഷണങ്ങള്‍ ആയിരിക്കാം.
രണ്ട്...
സ്തനങ്ങളിൽ ചെറിയ മുഴ, തടിപ്പ് തുടങ്ങിയവ പ്രത്യക്ഷപ്പെടുന്നതാണ് പുരുഷന്മാരിലെ സ്തനാർബുദത്തിന്‍റെയും ഒരു പ്രധാന ലക്ഷണം.
മൂന്ന്...
മുലക്കണ്ണിൽ രക്തസ്രാവം, ഡിസ്ചാർജ് തുടങ്ങിയവ ഉണ്ടാകുന്നതും ലക്ഷണമാകാം. സ്തന പ്രദേശത്തിന് ചുറ്റുമുള്ള ചർമ്മത്തിലെ മാറ്റങ്ങളും അസ്വസ്ഥതയും വേദനയും രോഗ ലക്ഷണങ്ങളാകാം.
നാല്...
മുലക്കണ്ണിനു ചുറ്റും ചർമ്മം വരണ്ടിരിക്കുന്നതും മുലക്കണ്ണിന് ചുറ്റുമായി പാടുകള്‍ കാണുന്നതും ചിലപ്പോള്‍ സ്തനാർബുദത്തിന്റെ ലക്ഷണങ്ങളാകാം.
അഞ്ച്...
മുലക്കണ്ണ് അകത്തേക്ക് തള്ളി പോകുന്നതുപോലെ പ്രത്യക്ഷപ്പെടുന്നതും നിസാരമായി കാണേണ്ട.
ആറ്...
മുലക്കണ്ണിൽ അകാരണമായി എന്തെങ്കിലും മുറിവ് പ്രത്യക്ഷപ്പെടുന്നതും നിസാരമാക്കേണ്ട.
ഏഴ്...
കക്ഷത്തിലെ ഗ്രന്ഥികളില്‍ നീര് വന്ന് വീര്‍ക്കുന്നതും രോഗലക്ഷണമാകാം.
ശ്രദ്ധിക്കുക: മേൽപ്പറഞ്ഞ ലക്ഷണങ്ങൾ കാണുന്നപക്ഷം സ്വയം രോഗ നിർണയത്തിന് ശ്രമിക്കാതെ നിർബന്ധമായും ഡോക്ടറെ 'കൺസൾട്ട്' ചെയ്യുക. ഇതിന് ശേഷം മാത്രം രോഗം സ്ഥിരീകരിക്കുക.
Also read: പതിവായി ഉരുളക്കിഴങ്ങ് കഴിക്കാറുണ്ടോ? എങ്കില്‍, നിങ്ങളറിയേണ്ടത്...
