ആശങ്ക തുടരുന്നു, രാജ്യത്ത് കൊവിഡ് ബാധിതരുടെ എണ്ണം 20,000 കടന്നു; LIVE

മധ്യപ്രദേശിൽ വീണ്ടും ആരോഗ്യ പ്രവർത്തകർക്ക് നേരെ ആക്രമണം. ഷോപ്പൂർ ജില്ലയിലെ ഗസ് വനിയിലാണ് സംഭവം. ഡോക്ടറിനും പൊലീസുകാരനും പരിക്കേറ്റു. കൊവിഡ് പരിശോധനക്ക് വിധേയനാകേണ്ട വ്യക്തിയുടെ കുടുംബമാണ് ആരോഗ്യപ്രവര്‍ത്തകരെ ആക്രമിച്ചതെന്നാണ് വിവരം. സംഭവവുമായി ബന്ധപ്പെട്ട് രണ്ടു പേർ പിടിയിലായി. മധ്യപ്രദേശിൽ ആരോഗ്യ പ്രവർത്തകർക്ക് നേരെ നടക്കുന്ന അഞ്ചാമത്തെ ആക്രമണമാണിത്. 

ദില്ലിയിൽ പുതിയതായി 92 കൊവിഡ് കേസുകൾ സ്ഥിരീകരിച്ചു. ഇന്ന് ഒരാൾ മരിച്ചു. ആകെ രോഗികളുടെ എണ്ണം 2248 ആയി. ഇത് വരെ 48 പേരാണ് കൊവിഡ് ബാധിച്ച് രാജ്യ തലസ്ഥാനത്ത് മരിച്ചത്.

കണ്ണൂർ നഗരത്തിലടക്കം 26 ഹോട്ട്സ്പോട്ടുകളിൽ ബാങ്കുകളടക്കം ഒരു സ്ഥാപനങ്ങളും തുറക്കേണ്ട എന്ന് തീരുമാനം. ജില്ലയിൽ മുഴുവനും തദ്ദേശ സ്ഥാപനങ്ങളുടെ കീഴിൽ ഹോം ഡെലിവറി സംവിധാനം ഏർപ്പെടുത്തുമെന്ന് ജില്ലാ കളക്ടർ ടിവി സുഭാഷ്.

65കാരിയെ കോട്ടയം മെഡിക്കൽ കോളേജിലേക്ക് മാറ്റുമെന്ന് ഇടുക്കി കളക്ടർ. ഇവർ മെൽബണിൽ നിന്ന് ദില്ലിയിലെത്തിയത് മാർച്ച് 20ന്. 

ഇന്ന് രോഗം സ്ഥിരീകരിച്ച കോട്ടയം സ്വദേശിയായ 65കാരിയുടെ യാത്ര പൊലീസിനും ആരോഗ്യവകുപ്പിനും തലവേദനയാകുന്നു. ഓസ്ട്രേലിയയിൽ നിന്ന് തിരിച്ചെത്തിയത് മാർച്ച് 21നാണ്. തുടർന്ന് ദില്ലിയിൽ നിരീക്ഷണത്തിലാക്കി. നിരീക്ഷണത്തിലിരിക്കെ ഏപ്രിൽ 13ന് പാലായിലേക്ക് അനധികൃതമായി യാത്ര തിരിച്ചു. ഇവരെയും ഭർത്താവിനെയും കൊണ്ടുവന്നത് ദില്ലി പൊലീസിലെ ഉദ്യോഗസ്ഥനാണെന്നാണ് വിവരം. ഏഴ് സംസ്ഥാനങ്ങളിലൂടെ കടന്ന് പോയിട്ടും ആരും തടഞ്ഞില്ല. പരിശോധന കുറയുമെന്ന് കരുതി ഇടുക്കി കമ്പംമേട്ട് അതിർത്തിയിലൂടെ കടക്കാൻ ശ്രമിച്ചു. ഏപ്രിൽ 16ന് കേരള അതിർത്തിയിൽ പൊലീസ് തടഞ്ഞ് നിരീക്ഷണത്തിലാക്കി. കാർ ഓടിച്ച് വന്ന പൊലീസ് ഉദ്യോഗസ്ഥൻ നിരീക്ഷണത്തിന് തയ്യാറായില്ല. ഇയാൾ അന്ന് തന്നെ ദില്ലിയിലേക്ക് തിരിച്ച് പോയി.

ദില്ലി പൊലീസിലെ 71 പൊലീസുകാരോട് നീരീക്ഷണത്തിൽ പോകാൻ നിർദ്ദേശം. കൊവിഡ് ബാധിതനായ പൊലീസുകാരനോട് സംമ്പർക്കത്തിൽ വന്നതോടെയാണ് നിർദ്ദേശം.

സമ്പർക്കത്തിലൂടെ കൊവിഡ് ബാധിച്ചവരിൽ തബ് ലീഗ് സമ്മേളനത്തിൽ പങ്കെടുത്തവർ സഞ്ചരിച്ച ട്രെയിനിൽ ഉണ്ടായിരുന്ന യുവതിയും. ചെങ്ങളായി സ്വദേശിയായ യുവതിക്കാണ് ട്രെയിൻ യാത്രക്കിടെ കൊവിഡ് ബാധിച്ചത്. ഇവർ കോഴിക്കോട് മെഡിക്കൽ കോളേജിൽ ചികിത്സയിൽ.

മലപ്പുറത്തെ നാല് മാസം പ്രായമായ കുട്ടിക്ക് വൈറസ് ബാധയേൽക്കാനുണ്ടായ കാരണം അവ്യക്തം. പരിശോധിച്ച് വരികയാണെന്ന് DMO. 

വർക്കല മുൻസിപ്പാലിറ്റിയെ ഹോട്ട് സ്പോട്ടിൽ നിന്ന് ഒഴിവാക്കി. മലയൻകീഴ് പഞ്ചായത്തിനേയും നേരത്തേ ഒഴിവാക്കിയിരുന്നു. തിരുവനന്തപുരം കോർപ്പറേഷൻ പരിധി മാത്രമാണ് നിലവിൽ ഹോട്ട് സ്പോട്ട്. 

കണ്ണൂരിൽ കൊവിഡ് സ്ഥിരീകരിച്ച 7 പേരിൽ 4 പേർ ദുബായിൽ നിന്നെത്തിയവർ. 3 പേർക്ക് രോഗം വന്നത് സമ്പർക്കം വഴി. സമ്പർക്കത്തിലൂടെ കൊവിഡ് ബാധിച്ചവരിൽ 9 വയസുകാരിയും. 

ഈ വർഷത്തെ അമർനാഥ് യാത്ര റദ്ദാക്കി. കൊവിഡ് ഭീഷണിയുടെ പശ്ചാതലത്തിലാണ് തീരുമാനം.

കോഴിക്കോട്  കൊവിഡ് സ്ഥിരീകരിച്ചത് സ്വകാര്യ ആശുപത്രിയിലെ നഴ്സിന്. നേരത്തെ കൊവിഡ് സ്ഥിരീകരിച്ച എടച്ചേരി സ്വദേശിയെ ചികിത്സിച്ച നഴ്സാണ് ഇവർ, കൂടത്തായി സ്വദേശിയാണ്. 

സംസ്ഥാനത്ത് രജിസ്റ്റർ ചെയ്ത ബലാത്സംഗ കേസുകളും പോക്സോ കേസുകളും വേഗത്തിൽ തീർപ്പാക്കാൻ 14 ജില്ലകളിലും 28 അതിവേഗ കോടതികൾ സ്ഥാപിക്കും.

ഇന്ന് ലെനിന്‍റെ ജന്മവാർഷികമാണ്. 1918 ലെ സ്പാനിഷ് ഫ്ലൂവിൽ ലോകത്താകെ 50 ദശലക്ഷം പേർ അതിൽ മരിച്ചു. അന്ന് ആ മഹാമാരിയെ ചെറുക്കുന്നതിനേക്കാൾ ലോകരാഷ്ട്രങ്ങൾ ശ്രദ്ധിച്ചത് ലോകമഹായുദ്ധം മുന്നോട്ട് കൊണ്ടുപോകാനാണ്. അന്ന് ലെനിൻ ശത്രുത അവസാനിപ്പിക്കാൻ ആഹ്വാനം ചെയ്തു. എന്നാൽ അത് ലോകരാഷ്ട്രങ്ങൾ അവഗണിച്ചു. ലെനിന്‍റെ ആഹ്വാനത്തിന് പ്രാധാന്യം നൽകിയിരുന്നെങ്കിൽ പതിനായിരക്കണക്കിന് സൈനികർ മരിച്ചുവീഴുമായിരുന്നില്ല. ഇത് വലിയ പാഠമാണ്. കൊവിഡ് 19 എന്ന ഇന്നത്തെ മഹാമാരിയെ നേരിടുന്നതിലാവണം നമ്മുടെ ശ്രദ്ധ മുഴുവൻ. ഒറ്റക്കെട്ടായി നിന്ന് രോഗത്തെ അതിജീവിക്കണം. വഴിതിരിച്ചുവിടാനുള്ള ശ്രമങ്ങൾ ഇതിനെ ദുർബലപ്പെടുത്തും.

കടൽത്തീരത്ത് ഉപ്പുജലത്തിലെ കൃഷി വ്യാപിക്കും. തദ്ദേശീയ അലങ്കാര മത്സ്യങ്ങളുടെ കൃഷി പ്രോത്സാഹിപ്പിക്കും. കിങ്ഫിഷ് മത്സ്യകൃഷിയുടെ വിത്ത് വിതരണം വ്യാപിപ്പിക്കും. വനിതാ സ്വാശ്രയ സംഘങ്ങളുടെ ഉപജീവനത്തിന് ഇതും ചിപ്പി കൃഷിയും വ്യാപിപ്പിക്കും.

ഒരു കുടുംബത്തിൽ ഒന്നോ രണ്ടോ പശുക്കളെ വളർത്താൻ പദ്ധതിയാരംഭിക്കും. പഞ്ചായത്തിൽ അഞ്ചോ പത്തോ പശുക്കളെ വളർത്തുന്ന ഫാമുകൾ ആരംഭിക്കും. കേരള ചിക്കൻ സംസ്ഥാന വ്യാപകമാക്കും. കോഴിയിറച്ചിയുടെ ലഭ്യതയും വിലസ്ഥിരതയും ഉറപ്പാക്കും. ഈ വർഷം 200 ഔട്ട്ലെറ്റുകൾ തുറക്കും. കുടുംബശ്രീക്ക് ഇറച്ചിക്കോഴി സംസ്കരണത്തിന് പ്ലാന്‍റ് തയ്യാറാക്കും. അടുത്ത രണ്ട് വർഷത്തിനുള്ളിൽ പാലുൽപ്പാദനം വർധിച്ചാൽ അധികം വരുന്ന പാൽ എന്ത് ചെയ്യുമെന്ന ആശങ്കയുണ്ട്. തമിഴ്നാട്ടിലും കർണാടകത്തിലും പാൽ കൊണ്ടുപോയി പാൽപ്പൊടിയാക്കുന്നുണ്ട്. ഇതിന് പത്ത് രൂപ ലിറ്ററിന് അധികം ചിലവാണ്. ഇത് പരിഹരിക്കാൻ ആധുനിക സൗകര്യങ്ങളോടെയുള്ള പാൽപ്പൊടി പ്ലാന്റും ബാഷ്പീകരണ പ്ലാന്‍റും സ്ഥാപിക്കും.

മുട്ട, മാസം തുടങ്ങിയവയുടെ ഉൽപ്പാദനത്തിൽ സ്വയംപര്യാപ്തത നേടാൻ നടപടിയെടുക്കും. പ്രതിദിനം 75 ലക്ഷം അധികം മുട്ട ഉൽപ്പാദിപ്പിക്കാൻ സൗകര്യം ഒരുക്കും. ഒരു വീട്ടിൽ അഞ്ച് കോഴികളെ വളർത്താൻ ബുദ്ധിമുട്ടുണ്ടാകില്ല. ശരാശരി രണ്ട് മുട്ട വീതം ഇതിൽ നിന്ന് ലഭിക്കും. സഹകരണ സ്ഥാപനങ്ങൾ വഴി കാർഷിക മേഖലയിൽ വായ്പ ലഭിക്കാൻ ആവശ്യമായ പദ്ധതിയുണ്ടാക്കും. ഇതിന് നബാർഡിന്‍റെ സഹായം തേടും.

കോട്ടയം പാല സ്വദേശിക്കാണ് ഇന്ന് ജില്ലയിൽ രോഗം സ്ഥിരീകരിച്ചത്. ഇവർ ഓസ്ട്രേലിയയിൽ നിന്നും മാർച്ച് 21ന് ദില്ലിയിൽ തിരിച്ചെത്തി. ദില്ലിയിൽ നിരീക്ഷണത്തിലായിരുന്നു. ഏപ്രിൽ 13 ന് ദില്ലിയിൽ നിന്ന് കാറിൽ പാലായിലേക്ക് തിരിച്ചു.ഇടുക്കി കമ്പംമേട്‌ അതിർത്തിയിൽ വച്ച് ഏപ്രിൽ 16ന് പൊലീസ് തടഞ്ഞു. നിലവിൽ നെടുങ്കണ്ടത്ത് നിരീക്ഷണത്തിലാണ്. കൂടെയുള്ള 71 വയസുകാരനായ ഭർത്താവിന് രോഗം ഇല്ല. 

കോഴിക്കോട് സ്ഥിരീകരിച്ചതിലൊരാൾ നഴ്സ്. മറ്റൊരാൾ ഹൗസ് സർജൻസി ചെയ്യുന്ന മെഡിക്കൽ വിദ്യാർഥി.

മുംബൈയിൽ ഏപ്രിൽ 17 ന് 27 സ്റ്റാഫ് നഴ്സുമാർക്ക് രോഗം സ്ഥിരീകരിച്ചിരുന്നു. ഇവരെ യാതൊരു മുൻകരുതലും സ്വീകരിക്കാതെ പാർപ്പിച്ചത് മഹാരാഷ്ട്ര മുഖ്യമന്ത്രിയുടെ ശ്രദ്ധയിൽപെടുത്തിയതായി മുഖ്യമന്ത്രി. 

ഐഡി കാർഡുള്ള സന്നദ്ധ പ്രവർത്തകർ സർക്കാർ വിരുദ്ധ സമരത്തിൽ പങ്കെടുക്കാൻ പോയെന്ന് കണ്ടിട്ടുണ്ട്. ഇവർ സന്നദ്ധ പ്രവർത്തനത്തിന് അയോഗ്യരാണെന്ന് സ്വയമേ വെളിപ്പെടുത്തിയതായി മുഖ്യമന്ത്രി. 

തമിഴ്നാട്ടിൽ 33 പേർക്ക് കൂടി കൊവിഡ് 19 സ്ഥിരീകരിച്ചു. ഇതോടെ സംസ്ഥാനത്തെ കൊവിഡ് ബാധിതരുടെ എണ്ണം 1629 ആയി. 

പ്രധാനമന്ത്രി മുഖ്യമന്ത്രിമാരുടെ യോഗം വിളിച്ചു. തിങ്കളാഴ്ചയാണ് യോഗം

രാജ്യത്ത് കൊവിഡ് കേസുകൾ ഇരുപതിനായിരം കടന്നു, ഇത് വരെ രോഗം സ്ഥിരീകരിച്ചത് 20,471 പേർക്കെന്ന് കേന്ദ്ര ആരോഗ്യമന്ത്രാലയം. ഇത് വരെ 652 പേർ മരിച്ചു. 3959 പേർക്ക് രോഗം ഭേദമായി. 

നിരോധനത്തിന്‍റെ പശ്ചാത്തലത്തിൽ മറ്റ് സംസ്ഥാനങ്ങളുമായി അതിർത്തി പങ്കിടുന്ന പ്രദേശങ്ങളിലൂടെ ആളുകൾ സഞ്ചരിക്കുന്നു. ഇത് പൂർണ്ണമായും തടയാൻ കർശന നടപടി സ്വീകരിക്കും. അതിർത്തി പ്രദേശങ്ങൾ വഴി ഉള്ള യാത്ര തടയും, ചരക്ക് വാഹനം അടക്കം പരിശോധിക്കുമെന്ന് മുഖ്യമന്ത്രി. 

ആശാ വർക്കർമാർക്ക് 2020 മാർച്ച് വരെ ഓണറേറിയവും ഇൻസൻ്റീവും നൽകും. മാർച്ച് മുതൽ കൊവിഡ് കാലയളവിൽ അധിക ഇൻസൻ്റീവായി ആയിരം രൂപയും നൽകും. സംസ്ഥാനത്തെ 26475 ആശാ വർക്കർമാർക്ക് ഇതിന്‍റെ പ്രയോജനം ലഭിക്കും.

മന്ത്രിമാരുടെയും ജന പ്രതിനിധികളുടെയും 30% ശമ്പളം ഒരു വർഷം പിടിക്കുമെന്ന് മുഖ്യമന്ത്രി.  ആശ വർക്കർമാർക്ക് കൂടുതൽ ആനുകൂല്യങ്ങൾ

മലപ്പുറത്ത് രോഗം സ്ഥിരീകരിച്ചത് 4 മാസം പ്രായമുള്ള കുഞ്ഞിന്. കോഴിക്കോട് മെഡിക്കൽ കോളേജിൽ ഹൃദ്രോഗം ഉൾപ്പെടെയുള്ള അസുഖങ്ങൾക്ക് ചികിത്സയിൽ ആയിരുന്നു. 

സംസ്ഥാന സർക്കാർ ജീവനക്കാരും അവരുടെ സംഘടനകളും വലിയ തോതിൽ ദുരിതാശ്വാസ നിധിയിലേക്ക് സംഭാവന നൽകാൻ തയ്യാറാകുന്നുണ്ട്. വെല്ലുവിളി വലുതായതിനാൽ ഉദാരമായ സഹായം പ്രതീക്ഷിക്കുന്നു. സർക്കാർ ജീവനക്കാരുടെ ശമ്പളത്തിൽ നിന്നും ഒരു ഭാഗം താത്കാലികമായി മാറ്റിവയ്ക്കാൻ ഇന്ന് ചേർന്ന മന്ത്രിസഭാ യോഗം തീരുമാനിച്ചു. ഇങ്ങിനെ മാറ്റിവയ്ക്കുന്നത് മൊത്തം ഒരു മാസത്തെ ശമ്പളമായിരിക്കും. മാസത്തിൽ ആറ് ദിവസത്തെ ശമ്പളം വീതം അഞ്ച് മാസത്തേക്കാണ് ഇത്തരത്തിൽ മാറ്റിവയ്ക്കാൻ സർക്കാർ നിർബന്ധിതരാകുന്നത്.

ഏതെല്ലാം പ്രശ്നങ്ങൾ വന്നാലും നമുക്ക് മുന്നോട്ട് പോകാതിരിക്കാൻ ആവില്ലെന്ന് പിണറായി. ഈ സാഹചര്യത്തിൽ നാടിന്‍റെ നാനാഭാഗത്ത് നിന്നും എല്ലാ ജനവിഭാഗങ്ങളും ദുരിതാശ്വാസ നിധിയിലേക്ക് സംഭാവന നൽകുന്നത് ആശ്വാസകരമാണ്. കൈനീട്ടമായി കിട്ടിയ നാണയത്തുട്ട് മുതൽ മാസ വരുമാനം വരെ സംഭാവന നൽകുന്നു. ക്ഷേമ പെൻഷനിൽ ഒരു പങ്ക് തരുന്നവരുണ്ട്. ഭക്ഷണ ചിലവിൽ നിന്ന് ഒരു വിഹിതം മാറ്റിവച്ച് സംഭാവന നൽകുന്നവരുണ്ട്. പ്രവാസി മലയാളികൾ പ്രതിസന്ധി ഘട്ടത്തിലും സഹായം നൽകുന്നു.

ലോക്ക് ഡൗണിനെ തുടർന്ന് സംസ്ഥാനത്തിന്‍റെ തനത് നികുതി വരുമാനം ഏതാണ്ട് നിലച്ചു. ചിലവിന്‍റെ കാര്യത്തിൽ വലിയ വർധനവുണ്ടാവുന്നു. ആരോഗ്യ-ഭക്ഷ്യ സുരക്ഷാ മേഖലയിൽ സർക്കാരിന് ലക്ഷ്യങ്ങൾ നേടുന്നതിനുള്ള ചിലവുകൾ ഒഴിവാക്കാനാവില്ല.

കൊവിഡ് 19 ദേശീയ തലത്തിലും സംസ്ഥാനത്തും സാമ്പത്തിക രംഗത്ത് കനത്ത ആഘാതം ഏൽപ്പിച്ചതായി മുഖ്യമന്ത്രി. " ദേശീയ സമ്പദ് വ്യവസ്ഥ വളർച്ചാ മാന്ദ്യം നേരിടുന്ന ഘട്ടത്തിലാണ് കൊവിഡ് തുടങ്ങിയത്. എട്ട്, ഒൻപത് ശതമാനം വളർച്ചയുണ്ടായിരുന്നത് അഞ്ച് ശതമാനത്തിൽ താഴെ നിൽക്കുമ്പോഴാണ് മഹാമാരി വന്നത്. ഈ സാഹചര്യത്തിൽ കേരളത്തിൽ പശ്ചാത്തല സൗകര്യ വികസനവും സാമൂഹ്യ ഇടപെടലും ശക്തമാക്കി സാമ്പത്തിക വളർച്ച 7.5 ശതമാനത്തിൽ നിലനിർത്തിയത് പ്രത്യേകം ശ്രദ്ധിക്കപ്പെട്ടു. നാം രണ്ട് പ്രകൃതി ദുരന്തങ്ങൾ നേരിട്ടു. എന്നിട്ടും ഈ രീതിയിൽ വളർച്ച നേടിയെന്നത് മറന്നുകൂട. സംസ്ഥാനത്തിന്‍റെ പൊതു ധനകാര്യ രംഗത്ത് ഞെരുക്കം അനുഭവപ്പെട്ടു. സാമൂഹ്യ ക്ഷേമ ചിലവുകളിൽ നിന്ന് സർക്കാർ എന്നിട്ടും പുറകോട്ട് പോയില്ല "

അവശ്യ വസ്തുക്കൾ ഹോം ഡെലിവറി ആയി നൽകുമെന്ന് മുഖ്യമന്ത്രി. 

കേരളത്തിൽ ഏറ്റവും കൂടുതൽ രോഗികളുള്ള കണ്ണൂരിൽ നിയന്ത്രണം കർശനമാക്കി. പൊലീസ് പരിശോന ശക്തമാക്കി. ഇത് ഫലം കണ്ടു. വാഹനങ്ങളുടെ എണ്ണത്തിൽ കുറവുണ്ടായതായി മുഖ്യമന്ത്രി. ഹോട്ട് സ്പോട്ട് ഒഴികെ ഉള്ള കണ്ണൂരിലെ സ്ഥലങ്ങളിലും ജനം പരമാവധി വീട്ടിൽ തന്നെ കഴിയണമെന്ന് മുഖ്യമന്ത്രി.

ആരോഗ്യപ്രവർത്തകരുടെ സുരക്ഷ ഉറപ്പാക്കാൻ കേന്ദ്രം ഓർഡിനൻസ് പുറപ്പെടുവിച്ചു. ആരോഗ്യപ്രവർത്തകരുടെ സുരക്ഷ ഉറപ്പാക്കാനുള്ള ഈ നിയമത്തെ സ്വാഗതം ചെയ്യുന്നുവെന്ന് മുഖ്യമന്ത്രി.

പോസിറ്റീവായ 11 കേസുകളിൽ മൂന്ന് പേർ സമ്പർക്കത്തിലൂടെയാണെന്ന് മുഖ്യമന്ത്രി. വിദേശത്ത് നിന്ന് വന്നവർ അഞ്ച് പേരും കോഴിക്കോട് ഒരു ആരോഗ്യപ്രവർത്തകയക്കും രോഗം ബാധിച്ചു. കോഴിക്കോട് മെഡിക്കൽ കോളേജിലെ രണ്ട് ഹൗസ് സർജന്മാർക്ക് രോഗം സ്ഥിരീകരിച്ചു. ഇവരിലൊരാൾ കണ്ണൂർ ജില്ലയിലാണ്. ഇരുവരും കേരളത്തിന് പുറത്ത് നിന്ന് ട്രെയിനിൽ വന്നു.

ഇതുവരെ 20821 സാമ്പിളുകൾ പരിശോധിച്ചതായി മുഖ്യമന്ത്രി. 19998 സാമ്പിളുകൾ നെഗറ്റീവാണെന്ന് ഉറപ്പാക്കി.

437 പേർക്ക് ഇതുവരെ രോഗം സ്ഥിരീകരിച്ചു, ഇതിൽ 127 പേർ നിലവിൽ ചികിത്സയിലാണ്. ഇന്ന് മാത്രം 95 പേർ ആശുപത്രിയിൽ പ്രവേശിപ്പിക്കപ്പെട്ടു.

ഇന്ന് സംസ്ഥാനത്ത് രോഗം ഭേദമായത് ഒരാൾക്ക് മാത്രം. പാലക്കാട് സ്വദേശിയാണ് രോഗമുക്തനായത്. ഇത് വരെ 437 പേർക്കാണ് രോഗം ബാധിച്ചത്.

കേരളത്തിൽ 11 പേർക്ക് കൂടി കൊവിഡ് സ്ഥിരീകരിച്ചുവെന്ന് മുഖ്യമന്ത്രി. കണ്ണൂർ 7 പേർക്കും, കോഴിക്കോട് 2 പേർക്കും, കോട്ടയം മലപ്പുറം ജില്ലകളിൽ ഓരോ കേസ് വീതമാണ് പുതുതായി സ്ഥിരീകരിച്ചത്.

കഞ്ചിക്കോട് മേഖലയിലെ വ്യവസായശാലകൾ അടച്ചുപൂട്ടാൻ നിർദ്ദേശം. പുതുശ്ശേരി പഞ്ചായത്തിനെ ഹോട്ട്സ്പോട്ട് ആക്കിയതിനെ തുടർന്നാണ് തീരുമാനം. അവശ്യസാധനങ്ങൾ നിർമിക്കുന്ന യൂണിറ്റുകൾ ഒഴികെ പൂട്ടണം. കഞ്ചിക്കോട് ജോലി നോക്കുന്ന  യുപി സ്വദേശിക്ക് കൊവിഡ് സ്ഥിരീകരിച്ചിരുന്നു

ജീവനക്കാരുടെ ഡ്യൂട്ടി സബന്ധിച്ച് പുതിയ മാർഗ നിർദ്ദേശവുമായി സർക്കാർ. റെഡ് സോണും ഹോട്ട് സ്പോട്ടും ഒഴികെ ഉള്ള സ്ഥലങ്ങളിൽ എ ബി വിഭാഗത്തിലെ 50% ജോലിക്ക് എത്തണം, സി  ഡി വിഭാഗത്തിൽ പരമാവധി 30% എത്തണം. പൊതു ഗതാഗതം ഇല്ലാത്തതിനാൽ അതാത് ജില്ലയിലെ ജീവനക്കാരെ ഡ്യൂട്ടി ക്കു നിയോഗിക്കണം. 

മഹാത്മാഗാന്ധി സർവ്വകലാശാല യുജി,പിജി പരീക്ഷകൾ മെയ് 18 ന് പുനരാരംഭിക്കും. ആറ്, നാല് സെമസ്റ്റർ ബിരുദ പരീക്ഷകൾ മെയ് 18,19 തീയതികളിൽ പുനരാരംഭിക്കും. അഞ്ചാം സെമസ്റ്റർ ബിരുദ പ്രൈവറ്റ് പരീക്ഷകൾ മെയ് 25 മുതൽ നടക്കും. നാല‌ാം സെമസ്റ്റർ ബിരുദാനന്തര ബിരുദ പരീക്ഷയും മെയ് 25ന് ആരംഭിക്കും. ആറ്,നാല് സെമസ്റ്റർ ബിരുദ പരീക്ഷകളുടെ പ്രാക്ടിക്കൽ പരീക്ഷ യഥാക്രമം  മെയ് 25,28 തീയതികളിൽ നടക്കും. 

കോട്ടയത്ത് വീടുകളിൽ നിരീക്ഷണത്തിലുള്ളവരുടെ എണ്ണം നൂറിൽ താഴെയായി. ഇന്ന് നിരീക്ഷണ പട്ടികയിൽ നിന്ന് ഒഴിവാക്കപ്പെട്ടത് 510 പേരാണ്. 

ഇറ്റലിയിൽ കൊവിഡ് ബാധിച്ച ഇന്ത്യക്കാരുടെ എണ്ണം 160ന് മുകളിലെന്ന് എംബസി വൃത്തങ്ങൾ ഏഷ്യാനെറ്റ് ന്യൂസിനോട്. വടക്കൻ ഇറ്റലിയിൽ 114 ഇന്ത്യക്കാർക്ക് കൊവിഡ് സ്ഥിരീകരിച്ചു. മറ്റു പ്രദേശങ്ങളിൽ അമ്പതോളം ഇന്ത്യക്കാർക്ക് കൊവിഡ്.

ഇൻഡോറിൽ കൊവിഡ് ഡ്യൂട്ടിലുണ്ടായിരുന്ന രണ്ട്  നഴ്സുമാർ മരിച്ചു. ഒരാൾ ഹൃദയസ്തംഭനവും ഒരാൾ നെഞ്ച് രോഗത്തെ തുടർന്നുമാണ് മരിച്ചത്. ഇരുവർക്കും കൊവിഡ് ഉണ്ടായിരുന്നോ എന്നത് വ്യക്തമല്ലെന്നും സാമ്പിളുകൾ പരിശോധനയ്ക്ക് അയച്ചെന്നും എംവൈ ഹോസ്പിറ്റൽ സൂപ്രണ്ട്. 

കെഎസ്ആർടിസി ബസുകളിൽ ആരോഗ്യപ്രവർത്തകരെ ജോലിസ്ഥലത്ത് എത്തിക്കുന്നത് നിർത്തിയതോടെ ആശുപത്രി ജീവനക്കാർ പ്രതിസന്ധിയിൽ.  തിരുവനന്തപുരം മെഡിക്കൽ കോളേജ് ആശുപത്രി ഏർപ്പെടുത്തിയ ബസിന് അമിതഫീസ് ഈടാക്കുന്നുവെന്ന് ജീവനക്കാർ പരാതിപ്പെട്ടു. അതേസമയം ജീവനക്കാരുടെ പ്രശ്നം പരിഹരിക്കാൻ നിർദ്ദേശം നൽകിയെന്ന് ആരോഗ്യമന്ത്രി കെ കെ ശൈലജ അറിയിച്ചു.

മാധ്യമപ്രവർത്തകർ കൂടുതൽ ജാഗ്രത പാലിക്കണമെന്ന് കേന്ദ്ര സർക്കാർ, ചെന്നൈയിലും മുംബൈയിലും കൂടുതൽ മാധ്യമപ്രവർത്തകർക്ക് രോഗം സ്ഥിരീകരിച്ചതിന് പിന്നാലെയാണ് മുന്നറിയിപ്പ്. 

ഈ മാസം 13-ന് കൊവിഡ് - 19 രോഗബാധ സ്ഥിരീകരിച്ച് പാലക്കാട്  ജില്ലാ ആശുപത്രിയിൽ ചികിത്സയിലായിരുന്ന തൃത്താല -ചാത്തന്നൂർ സ്വദേശി ഇന്ന് വൈകിട്ട് ന രോഗമുക്തനായി ആശുപത്രി വിടുമെന്ന് ഡിഎംഒ . രണ്ടു തവണ നടത്തിയ പരിശോധനാഫലം നെഗറ്റീവ് ആയതിനെ തുടർന്നാണ്  ഇയാളെ ഡിസ്ചാർജ്ജ് ചെയ്യുന്നത്. ആശുപത്രി വിട്ട ശേഷം 14 ദിവസം കൂടി ഹോം ക്വാറന്‍റീനിൽ തുടരാൻ ഡി എം ഒ നിർദ്ദേശിച്ചിട്ടുണ്ട്.
 

കേന്ദ്ര ആരോഗ്യ മന്ത്രാലയത്തിൻ്റെ വാർത്ത സമ്മേളനം ഇനിമുതൽ ആഴ്ചയിൽ നാല് ദിവസം മാത്രം. തിങ്കൾ, ചൊവ്വ, വ്യാഴം വെള്ളി ദിനങ്ങളിലായിരിക്കും ഇനി മുതൽ വാർത്താ സമ്മേളനം നടക്കുക. 

ആവശ്യത്തിന് സുരക്ഷാ ഉപകരണങ്ങൾ ഇല്ലെന്ന പരാതിയുമായി ചെന്നൈയിലെ ഡോക്ടർമാർ. കൊവിഡ് രോഗികളെ ചികിത്സിച്ച ഡോക്ടർമാർക്ക് കൃത്യമായ ക്വാറൻ്റീൻ സൗകര്യം ഇല്ലെന്ന് പരാതി. ചെന്നൈയിൽ സർക്കാർ ആശുപത്രികളിൽ പോലും ICMR നിർദേശിച്ച മുൻകരുതൽ പാലിക്കുന്നില്ലെന്ന് ഡോക്ടർമാർ പരാതിപ്പെടുന്നു. ഇങ്ങനെ പോയാൽ സമരത്തിലേക്ക് പോകുമെന്ന് സർക്കാർ ആശുപത്രിയിലെ ഡോക്ടർമാർ. തമിഴ്നാട് മുഖ്യമന്ത്രിക്ക് സർക്കാർ ആശുപത്രിയിലെ ഡോക്ടർമാർ കത്തയച്ചു. 

സംസ്ഥാനത്തെ ഹോട്ട് സ്പോട്ട് പട്ടികയിൽ മാറ്റം വരുത്തി. നേരത്തെ പ്രസിദ്ധീകരിച്ച ചില സ്ഥലങ്ങൾ ഒഴിവാക്കി. പുതിയ സ്ഥലങ്ങൾ ചേർത്തു കണ്ണൂർ ജില്ലയിലെ  പാനൂർ, മുഴപ്പിലങ്ങാട്, ചപ്പാരപ്പടവ് , മൊകേരി പാലക്കാട് ജില്ലയിലെ കുഴൽമന്ദം, വിലവൂർ ' പുതുശ്ശേരി, പുതു പെരിയാരം
കൊല്ലത്തെ കുളത്തൂപ്പുഴ എന്നീ സ്ഥലങ്ങളാണ് പുതുതായി പട്ടികയിൽ ഉൾപ്പെടുത്തിയത്. 

ആരോഗ്യപ്രവര്‍ത്തകരെ അക്രമിക്കുന്നത് ജാമ്യമില്ലാ കുറ്റമാക്കുമെന്ന് കേന്ദ്രം . ഏഴു വര്‍ഷം വരെ തടവ് ശിക്ഷ കിട്ടാവുന്ന കുറ്റമാക്കും . 
 

മധ്യപ്രദേശ് പൊലീസ് ആസ്ഥാനം കൊവിഡ് ഭീതിയെ തുടർന്ന് അടച്ചു. ഈ മാസം 26 വരെയാണ് ആസ്ഥാനം അടച്ചത്. ആസ്ഥാനത്തെ ഡ്രൈവർ, ക്ലർക് എന്നിവർക്ക് രോഗം സ്ഥിരീകരിച്ചതിനെ തുടർന്നാണ് നടപടി. എസ് പി ഉൾപ്പെടെ 30 പൊലീസുകാർക്ക് മധ്യപ്രദേശിൽ രോഗം സ്ഥീരീകരിച്ചിരുന്നു

കൊവിഡ് ഡ്യൂട്ടിക്ക് ശേഷം നീരീക്ഷണത്തിലേക്ക് മാറ്റുന്ന മലയാളി ആരോഗ്യ പ്രവർത്തകർക്ക് താമസിക്കാൻ ദില്ലി കേരള ഹൗസ് വിട്ടു നൽകണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന് ബെന്നി ബെഹന്നാൻ എം പി യുടെ കത്ത്. 

തമിഴ്നാട്ടിൽ കൊവിഡ് ബാധിച്ച് മരിച്ച ഡോക്ടർ, നഴ്സ്, പൊലീസുകാർ, ശുചീകരണ തൊഴിലാളികളുടേയും കുടുംബങ്ങൾക്ക് 50 ലക്ഷം രൂപ വീതം ധനസഹായം പ്രഖ്യാപിച്ചു. തമിഴ്നാട് മുഖ്യമന്ത്രി എടപ്പാടി പളനി സ്വാമിയാണ് ധനസഹായം പ്രഖ്യാപിച്ചത്

കാർ നിർമ്മാതാക്കളായ മാരുതി സുസുക്കിയുടെ ഹരിയാന  മനേസർ പ്ലാന്‍റ് പ്രവർത്തിപ്പിക്കാൻ അനുമതി. ഇതു സംബന്ധിച്ച് സംസ്ഥാന സർക്കാർ ഉത്തരവ് നൽകി. ജീവനക്കാരുടെ എണ്ണത്തിൽ നിയന്ത്രണങ്ങളോടെയാണ് അനുമതി.

എറണാകുളം ജില്ലയിലെ ഹോട്ട്സ്പോട്ടുകൾ സീൽ ചെയ്യാനുള്ള നടപടികൾ ആരംഭിച്ചു. നാളെ രാവിലെ ബാരിക്കേഡ് വച്ച് ഹോട്സ്പോട്ടുകളുടെ അതിർത്തികൾ അടക്കും, അവശ്യ സർവ്വീസുകളെയും ആശുപത്രിയിലേക്ക് വരുന്നവരെയും കടത്തിവിടും എന്ന് ഡിസിപി പൂങ്കുഴലി. ഹോട്ട്സ്പോട്ടുകളിൽ നിയന്ത്രണം തുടരുമെന്ന് പോലീസ് അനൗൺസ്‌മെന്‍റ് നടത്തി ജനങ്ങളെ അറിയിക്കുമെന്നും ഡിസിപി. എൻട്രി, എക്സിറ്റ് പോയിൻ്റുകൾ ഏതെന്ന് വൈകുന്നേരം യോഗത്തിന് ശേഷം തീരുമാനിക്കും. 

ലോക്ക് ഡൗൺ നിര്‍ദേശം ലംഘിച്ചതിന് മലപ്പുറത്ത് ഇന്ന് 11 മണി വരെ 31 പേരെ അറസ്റ്റ് ചെയ്തു. 15 കേസുകൾ രജിസ്റ്റർ ചെയ്തു. ഏഴ് വാഹനങ്ങൾ പിടിച്ചെടുത്തു.

വ്യോമയാന മന്ത്രാലയത്തിലെ ജീവനക്കാരന് കൊവിഡ് സ്ഥിരീകരിച്ചു. ഇയാളുടെ സഹപ്രവർത്തകരോട് സ്വയം നിരീക്ഷണത്തിൽ പോവാൻ നിർദേശം നൽകിയതായി വിശദീകരണം.

പത്തനംതിട്ടയിൽ കൊവിഡ് ബാധിച്ച് 45 ദിവസമായി ചികിത്സയിൽ തുടരുന്ന 62 കാരിയുടെ പുതിയ ഫലം നെഗറ്റീവ്. ഇരുപതാം പരിശോധനാ ഫലമാണ് നെഗറ്റീവ് ആയത്.

പാലക്കാട് രോഗം സ്ഥിരീകരിച്ച ഡ്രൈവറുടെ സഹായി കോട്ടയത്ത് എത്തി. തമിഴ്‍നാട്ടില്‍ നിന്നും പച്ചക്കറിയുമായി എത്തിയ ഡ്രൈവർ രോഗം വന്നതിനെ തുടർന്ന് പാലക്കാട് ചികിത്സ തേടുകയായിരുന്നു. ഇയാൾക്കൊപ്പം ഉള്ള സഹായിയാണ്  കോട്ടയത്ത് എത്തിയത്. കോട്ടയത്തെത്തിയ ആളുമായി സമ്പർക്കത്തിൽ വന്ന 15 പേരോട് നിരീക്ഷണത്തിൽ പോകാൻ ആരോഗ്യവകുപ്പ് നിർദ്ദേശം നൽകി. ഇയാൾ പച്ചക്കറി ഇറക്കിയ കോട്ടയത്തെ കട ആരോഗ്യവകുപ്പ് അടപ്പിച്ചു

പ്രദേശവാസികളുടെ എതിര്‍പ്പിനെ തുടര്‍ന്ന് തമിഴ്‍നാട്ടില്‍ മറവ് ചെയ്ത ഡോക്ടര്‍മാരുടെ മൃതദേഹം പുറത്തെടുത്ത് ആദരവോടെ സംസ്‍കരിക്കണമെന്ന് കുടുംബം.

കൊവിഡ് ബാധിത മേഖലയിൽ ജോലി ചെയ്യുന്ന മാധ്യമപ്രവർത്തകർ ആവശ്യമായ മുൻകരുതലുകൾ സ്വീകരിക്കണമെന്ന് വാർത്താ വിനിമയ മന്ത്രാലയം. 

ചെന്നൈയില്‍ 10 മാധ്യമപ്രവര്‍ത്തകര്‍ക്ക് കൂടി കൊവിഡ് സ്ഥിരീകരിച്ചു. ഇതില്‍ ആറുപേര്‍ തമിഴ്‍ ചാനലിലെ മാധ്യമപ്രവര്‍ത്തകരാണ്.  ഇതോടെ ചെന്നൈയിൽ കൊവിഡ് സ്ഥിരീകരിച്ച മാധ്യമപ്രവർത്തകർ 40 ആയി

ആരോഗ്യ പ്രവർത്തകർ ഇന്ന് നടത്താനിരിക്കുന്ന പ്രതിഷേധത്തിൽ നിന്ന് പിൻമാറണമെന്ന് ആഭ്യന്തര മന്ത്രി അമിത് ഷാ. വിഷയങ്ങൾക്ക് പരിഹാരം കാണും. ആരോഗ്യ പ്രവർത്തകരുടെ സുരക്ഷ ഉറപ്പാക്കാൻ നടപടികൾ കർശനമാക്കുമെന്നും ഐഎംഎ ഭാരവാഹികളുമായി നടത്തിയ വീഡിയോ കോൺഫറസിംഗില്‍ അമിത് ഷാ ഉറപ്പുനല്‍കി.

കൊൽക്കത്ത അപ്പോളോ ആശുപത്രിയിൽ ഒരു മലയാളി ഉൾപ്പെടെ നാല് നഴ്സുമാർക്ക് കൊവിഡ് സ്ഥിരീകരിച്ചു.

കർണാടകയിൽ നിന്നും വനത്തിലെ ഊടുവഴികളിൽ കൂടി മലയാളികള്‍ കൂട്ടത്തോടെ കണ്ണൂരിലെത്തുന്നു. നിയമവിരുദ്ധമായി എത്തിയ 36 പേരെ ഇരിട്ടിയിലെ നിരീക്ഷണ കേന്ദ്രത്തിലാക്കി. വനത്തിലൂടെ രാത്രി എത്തുന്നവരെ കണ്ടെത്തുക പ്രയാസകരമെന്ന് ജില്ലാ ഭരണകൂടം അറിയിച്ചു. ഭക്ഷണം കിട്ടാത്തത് കൊണ്ടാണ് നാട്ടിലേക്ക് മടങ്ങിയതെന്ന് കർണാടകയിൽ നിന്നെത്തിയ തൊഴിലാളികൾ പറഞ്ഞു.

കൊവിഡ് 19 ബാധിച്ച് ചികിത്സയിലായിരുന്ന ശൂചീകരണ തൊഴിലാളി മരിച്ചു. എൽഎൻജെപി ആശുപത്രിയിൽ ചികിത്സയിലായിരുന്നു ഇയാളഅ‍.  ഈസ്റ്റ് ദില്ലി മുൻസിപ്പൽ കോർപ്പറേഷന്‍ ശുചീകരണ തൊഴിലാളിയായിരുന്നു.

പത്തനംതിട്ടയിൽ രണ്ടാം ഘട്ടത്തിൽ കൊവിഡ്  സ്ഥിരീകരിച്ച 62 കാരിക്ക് 42 ദിവസമായിട്ടും അസുഖം മാറിയില്ല. ഇതുവരെ ഇവരുടെ 20 സാംപിൾ പരിശോധിച്ചതിൽ 19 ഉം പൊസിറ്റീവ് ആണ്. ഒരു ഫലം മാത്രം നെഗറ്റീവ് ആയി വന്നത്. 

തെക്കൻ കേരളത്തിലെ തമിഴ്നാടൻ അതിർത്തി മേഖലകളിൽ അതീവജാഗ്രതയിൽ. അതിർത്തിക്കപ്പുറമുള്ള തമിഴ്നാട്ടിലെ ജില്ലകളിലെ രോഗം വ്യാപിക്കുകയും വനത്തിലൂടെയും ചെക്ക് പോസ്റ്റിൽ ഉദ്യോഗസ്ഥരെ കബളിപ്പിച്ചും പലരും അതിർത്തി കടക്കുന്നത് പതിവാകുകയും ചെയ്തതോടെയാണ് കിഴക്കൻ മേഖലയിൽ ജാഗ്രത ശക്തമാക്കിയത്. 

കണ്ണൂരിൽ നിരത്തിൽ ആളുകളെത്തുന്നതിൽ കുറവു വന്നിട്ടുണ്ടെന്ന് ഉത്തരമേഖലാ ഐ ജി അശോക് യാദവ്. പൂർണമായും അടച്ച 18 ഹോട്ട്സ്പോട്ടുകളിൽ ആളുകൾ പുറത്തിറങ്ങിയാൽ ഉടൻ അറസ്റ്റുണ്ടാകും. ഇന്നലെ 373 പേരെ അറസ്റ്റ് ചെയ്തതിട്ടുണ്ടെന്നും കർശന നിലപാട് തുടരുമെന്നും ഐജി

കൊവിഡ് പ്രതിരോധത്തിന് ഹോമിയോ മരുന്ന് ഉപയോഗപ്പെടുത്തും എന്ന സര്‍ക്കാര്‍ നിര്‍ദേശത്തിനെതിരെ ഡോക്ടര്‍മാരുടെ സംഘടനയായ ഇന്ത്യന്‍ മെഡിക്കല്‍ അസോസിയേഷന്‍. കൊവിഡ് രോഗ ചികിത്സയെ വഴി തെറ്റിക്കരുതെന്ന് ഐഎംഎ സര്‍ക്കാറിനോട് അഭ്യര്‍ത്ഥിച്ചു. 

കേരളത്തില്‍ കൊവിഡ് പരിശോധനയ്ക്കായി രണ്ട് കേന്ദ്രങ്ങള്‍ കൂടി. കോഴിക്കോട് മിംസ് ആശുപത്രിക്കും കൊച്ചിയിലെ ഡിഡിആര്‍സിക്കുമാണ് കൊവിഡ് പരിശോധനയ്ക്ക് ഐസിഎംആര്‍ അനുമതി നല്‍കിയത്.

കൊവിഡിനെതിരായ പോരാട്ടത്തിൽ ജൂൺ, ജൂലൈ മാസങ്ങൾ നിർണായകമാണെന്ന് നീതി ആയോ​ഗ് മുന്നറിയിപ്പ് നൽകി. ഇതോടെ ലോക്ക് ഡൗണോ മറ്റു നിയന്ത്രണങ്ങളോ അടുത്ത രണ്ടോ മൂന്നോ മാസത്തേക്ക് കൂടി നീണ്ടേക്കാനുള്ള സാധ്യതയും ച‍ർച്ചയാവുകയാണ്. നീതി ആയോ​ഗ് അം​ഗം വികെ പോളാണ് ഇക്കാര്യം പറഞ്ഞത്. 

വിദേശത്ത് നിന്ന് നാട്ടിലെത്തി നിരീക്ഷണത്തിൽ കഴിഞ്ഞവർക്കെല്ലാം കോവിഡ് പരിശോധന നടത്താന്‍ സര്‍ക്കാര്‍ തയ്യാറെടുക്കുന്നു. നാട്ടിലെത്തി ഒരുമാസം കഴിഞ്ഞിട്ടും ചിലരില്‍ രോഗം സ്ഥിരീകരിച്ച സാഹചര്യത്തിലാണിത്. പ്രതിസന്ധി മറികടക്കുക എളുപ്പമല്ലെന്നും ജാഗ്രതക്കുറവ് ഉണ്ടാകരുതെന്നും ആരോഗ്യവിദഗ്ധരും മുന്നറയിപ്പ് നല്‍കുന്നുണ്ട്.

രാജ്യത്തെ കൊവിഡ് കേസുകൾ ഇരുപതിനായിരത്തിലേക്ക് അടുക്കുന്നു. ഇന്ന് രാവിലെ പുറത്തു വന്ന ഔദ്യോഗിക കണക്കുകൾ അനുസരിച്ച് രാജ്യത്താകെ 19,984 കൊവിഡ് രോഗികളാണുള്ളത്. 640 പേരാണ് ഇതുവരെ കൊവിഡ് രോഗം ബാധിച്ചു മരിച്ചത്. 1383 പേ‍ർക്കാണ് കഴിഞ്ഞ 24 മണിക്കൂറിൽ കൊവിഡ് സ്ഥിരീകരിച്ചത്.