ഗർഭിണിക്ക് സഹായവുമായി സിആര്‍പിഎഫ് ജവാന്‍മാര്‍; ആറ് കിലോമീറ്റർ നടന്ന് ആശുപത്രിയിലെത്തിച്ചു
ആരോഗ്യസ്ഥിതി മോശമായതിനെ തുടർന്ന് ഗര്‍ഭിണിയായ യുവതിയെ സിആര്‍പിഎഫ് ജവാന്‍മാര്‍ ആറ് കിലോ മീറ്ററോളം ചുമന്ന് ആശുപത്രിയിൽ എത്തിക്കുകയായിരുന്നു.
ബിജാപൂർ: ഗര്‍ഭിണിയായ യുവതിക്ക് സഹായവുമായി സെന്‍ട്രല്‍ റിസര്‍വ് പൊലീസ് ഫോഴ്‌സ്(സിആര്‍പിഎഫ്). ഛത്തീസ്ഗഡിലെ ബിജാപൂരിലാണ് സംഭവം. ആരോഗ്യസ്ഥിതി മോശമായതിനെ തുടർന്ന് ഗര്‍ഭിണിയായ യുവതിയെ സിആര്‍പിഎഫ് ജവാന്‍മാര്‍ ആറ് കിലോ മീറ്ററോളം ചുമന്ന് ആശുപത്രിയിൽ എത്തിക്കുകയായിരുന്നു. കട്ടിലില്‍ കിടത്തിയാണ് ഇവർ യുവതിയെ ആശുപത്രി വരെ എത്തിച്ചത്.
ഛത്തീസ്ഗഡിലെ പഡേഡ ഗ്രാമത്തിൽ സിആര്‍പിഎഫ് ജവാൻമാർ ദിവസേന പട്രോളിംഗ് നടത്താറുണ്ട്. ഇവിടെയുള്ളവരുമായും സേനാംഗങ്ങൾ ആശയവിനിമയം നടത്താറുണ്ടായിരുന്നു. ഇതിനിടെയാണ് ഗര്‍ഭിണിയായ ബൂഡി എന്ന യുവതിക്ക് അടിയന്തരമായി ചികിത്സ ലഭ്യമാക്കണമെന്ന് ഗ്രാമവാസികള്‍ സേനയോട് ആവശ്യപ്പെട്ടത്. വിവരം ലഭിച്ചതിനെ തുടർന്ന് ഉടൻ തന്നെ സോനാംഗങ്ങള്‍ ബൂഡിയുടെ വീട്ടിലെത്തി.
Read Also: മഞ്ഞുവീഴ്ചക്കിടെ ഗർഭിണിയെ തോളിലേറ്റി ആശുപത്രിയിലെത്തിച്ച് പട്ടാളക്കാർ; അഭിനന്ദനവുമായി പ്രധാനമന്ത്രി
ഉൾ ഗ്രാമമായതിനാൽ പ്രാഥമികാരോഗ്യ കേന്ദ്രങ്ങളോ നല്ല റോഡുകളോ പ്രദേശത്തില്ലായിരുന്നു. ഇതോടെയാണ് സിആര്‍പിഎഫ് ജവാൻമാർ യുവതിയേയും കൊണ്ട് ആറ് കിലോ മീറ്റര്‍ നടന്ന് ആശുപത്രിയിലെത്തിച്ചത്.
