രാഹുൽ ഗാന്ധിയെ ഉന്നമിട്ട് പരിഹാസവുമായി പ്രധാനമന്ത്രി നരേന്ദ്രമോദി. പാർലമെന്റിന്റെ വർഷകാല സമ്മേളനത്തിന് മുൻപായി നടത്തിയ പ്രസംഗത്തിലായിരുന്നു പ്രതിപക്ഷ നേതാവ് രാഹുൽ ഗാന്ധിയെ ലക്ഷ്യമിട്ടുള്ള അദ്ദേഹത്തിന്റെ പരാമർശം.
ന്യൂഡൽഹി: രാഹുൽ ഗാന്ധിയെ ഉന്നമിട്ട് പരിഹാസവുമായി പ്രധാനമന്ത്രി നരേന്ദ്രമോദി. പാർലമെന്റിന്റെ വർഷകാല സമ്മേളനത്തിന് മുൻപായി നടത്തിയ പ്രസംഗത്തിലായിരുന്നു പ്രതിപക്ഷ നേതാവ് രാഹുൽ ഗാന്ധിയെ ലക്ഷ്യമിട്ടുള്ള അദ്ദേഹത്തിന്റെ പരാമർശം.
കഴിഞ്ഞദിവസം രാജ്യത്തെ ആദ്യത്തെ സ്വകാര്യ ഓർബിറ്റൽ റോക്കറ്റായ വിക്രം-1 ന്റെ വിക്ഷേപണം വിജയകരമായതിൽ സ്വകാര്യ സ്റ്റാർട്ടപ്പായ സ്കൈറൂട്ടിനെ അഭിനന്ദിക്കുന്നതിനിടെയാണ് പ്രധാനമന്ത്രി രാഹുൽ ഗാന്ധിയെ ലക്ഷ്യമിട്ടുള്ള പരാമർശവും നടത്തിയത്. 'ഇന്ത്യയിലെ യുവത്വം ബഹിരാകാശത്തേക്കുള്ള പുതിയ യാത്രയ്ക്ക് തുടക്കം കുറിച്ചിരിക്കുകയാണ്. സ്കൈറൂട്ട് സ്റ്റാർട്ടപ്പ് ടീമിലെ അംഗങ്ങളുടെ ശരാശരി പ്രായം 28 ആണെന്നാണ് പറയുന്നത്. ഇത്തരത്തിലുള്ള യുവാക്കളാണ് ഈ നേട്ടം കൈവരിച്ചത്. ഞാൻ സംസാരിക്കുന്നത് 56 വയസ്സുള്ള യുവാവിനെക്കുറിച്ചല്ല', മോദി പറഞ്ഞു.
പ്രസംഗത്തിൽ മോദി പ്രത്യേകം പരാമർശിച്ച 56 വയസ്സ് പ്രയോഗം രാഹുൽ ഗാന്ധിയെ ലക്ഷ്യമിട്ടുള്ളതാണെന്നാണ് വിലയിരുത്തൽ. നിലവിൽ രാഹുൽ ഗാന്ധിക്ക് 56 വയസ്സാണുള്ളത്. 56 വയസ്സുള്ള രാഹുൽ ഗാന്ധിയെ കോൺഗ്രസിന്റെ യുവനേതാവെന്ന് വിശേഷിപ്പിക്കുന്നതിനെ ബിജെപി നേരത്തെ തന്നെ പരിഹസിക്കാറുണ്ട്. ഇതിനിടെയാണ് പാർലമെന്റ് സമ്മേളനത്തിന് മുന്നോടിയായി പ്രധാനമന്ത്രി നരേന്ദ്രമോദി നടത്തിയ പരാമർശവും ചർച്ചയാകുന്നത്.
