ബുക്ക് ചെയ്ത സീറ്റ് നൽകിയില്ല; സ്പൈസ് ജെറ്റിനെതിരെ പരാതിയുമായി പ്രഗ്യാ സിംഗ് താക്കൂർ
ഭോപ്പാലിലെ രാജാ ഭോജ് എയർപോർട്ട് ഡയറക്ടർക്കാണ് പ്രഗ്യാസിംഗ് പരാതി നൽകിയത്. ഭോപ്പാലിൽ വിമാനം ലാൻഡ് ചെയ്തപ്പോൾ അതിൽ നിന്ന് പുറത്തിറങ്ങാൻ ആദ്യം പ്രഗ്യാസിംഗ് തയാറായില്ല.
ഭോപ്പാൽ: ബുക്ക് ചെയ്ത സീറ്റ് നൽകിയില്ലെന്ന് സ്വകാര്യ എയർലൈൻ കമ്പനിയായ സ്പൈസ്ജെറ്റിനെതിരെ പരാതിയുമായി ഭോപ്പാൽ എം.പി പ്രഗ്യാസിംഗ് താക്കൂർ. ഡൽഹി-ഭോപ്പാൽ വിമാന യാത്രക്കിടെയായിരുന്നു സംഭവം. ഭോപ്പാലിലെ രാജാ ഭോജ് എയർപോർട്ട് ഡയറക്ടർക്കാണ് പ്രഗ്യാസിംഗ് പരാതി നൽകിയത്. ഭോപ്പാലിൽ വിമാനം ലാൻഡ് ചെയ്തപ്പോൾ അതിൽ നിന്ന് പുറത്തിറങ്ങാൻ ആദ്യം പ്രഗ്യാസിംഗ് തയാറായില്ല. പിന്നീട് മാധ്യമങ്ങൾ എത്തിയതോടെയാണ് അവർ വിമാനത്തിൽ നിന്ന് പുറത്തിറങ്ങുകയും പരാതി നൽകുകയും ചെയ്തത്.
എയർപോർട്ട് ജീവനക്കാർ യാത്രക്കാരോട് മാന്യമായി പെരുമാറുന്നില്ലെന്നും പ്രഗ്യാസിംഗ് ആരോപിച്ചു. ''ഞാൻ ബുക്ക് ചെയ്ത സീറ്റല്ല അവർ എനിക്ക് നൽകിയത്. ഞാനവരോട് നിയമങ്ങൾ കാണിക്കാൻ ആവശ്യപ്പട്ടു. അവർ തയ്യാറാകാത്തതിനെ തുടർന്ന് ഡയറക്ടറെ വിളിച്ച് പരാതി നൽകി.'' പ്രഗ്യാസിംഗ് പറഞ്ഞു. എയർപോർട്ട് അധികൃതരുമായും പ്രഗ്യാസിംഗുമായും നേരിട്ട് ബന്ധപ്പെടാൻ സാധിച്ചിട്ടില്ലെന്നും പരാതി സ്വീകരിച്ചതായും എയർപോർട്ട് ഡയറക്ടർ അനിൽ വിക്രം പറഞ്ഞു. തിങ്കളാഴ്ച പരാതി പരിശോധിക്കുമെന്നും വാർത്താ ഏജൻസിയായ പിടിഐയോട് അദ്ദേഹം വ്യക്തമാക്കി.
