ജിഎസ്ടി വെട്ടിപ്പ് കേസുകളിൽ അറസ്റ്റ് ഒഴിവാക്കാൻ കേന്ദ്ര സർക്കാർ നീക്കം. ഇതുസംബന്ധിച്ച നിർദേശം ജിഎസ്ടി കൗൺസിൽ യോഗത്തിൽ വെക്കും. അന്താരാഷ്ട്ര മാനമുള്ള തട്ടിപ്പുകളിൽ മാത്രം അറസ്റ്റ് മതിയെന്നാണ് കേന്ദ്രത്തിൻ്റെ നിലപാട്.
ദില്ലി: ജിഎസ്ടി വെട്ടിപ്പ് കേസുകളിൽ അറസ്റ്റ് ഒഴിവാക്കാൻ കേന്ദ്ര സർക്കാർ. നിയമത്തിൽ ഭേദഗതി വരുത്താൻ ജിഎസ്ടി കൗൺസിലിൽ നിർദേശം വെക്കാനാണ് കേന്ദ്രത്തിൻ്റെ തീരുമാനം. അന്താരാഷ്ട്ര മാനമുള്ള തട്ടിപ്പുകളിൽ മാത്രം അറസ്റ്റ് മതിയെന്നാകും നിർദേശം. ഉദ്യോഗസ്ഥരുടെ ഭാഗത്തുനിന്ന് ഉണ്ടാകുന്ന പീഡനങ്ങളും അമിതാധികാര പ്രയോഗവും തടയാനാണ് കേന്ദ്രത്തിൻ്റെ ലക്ഷ്യം.
ജിഎസ്ടി നിയമപ്രകാരം നികുതി ഉദ്യോഗസ്ഥർക്ക് നൽകിയിട്ടുള്ള അറസ്റ്റ് ചെയ്യാനുള്ള അധികാരം പൂർണമായും നീക്കം ചെയ്യാനാണ് കേന്ദ്രത്തിൻ്റെ നീക്കം. ഇതുസംബന്ധിച്ചു കേന്ദ്ര-സംസ്ഥാന സർക്കാരുകൾ തമ്മിൽ പൊതുധാരണയായി. ഒക്ടോബർ ഏഴിന് നടക്കാനിരിക്കുന്ന 57-ാമത് ജിഎസ്ടി കൗൺസിൽ യോഗത്തിൽ ഈ വിഷയം പ്രധാന അജണ്ടയായി ചർച്ച ചെയ്യും. അതിനുശേഷം പാർലമെന്റിന്റെ ശീതകാല സമ്മേളനത്തിൽ ആവശ്യമായ നിയമഭേദഗതികൾ കൊണ്ടുവരും.
നികുതി വെട്ടിപ്പുകളും മനഃപൂർവമുള്ള തട്ടിപ്പുകളും നടത്തുന്നവർക്കെതിരെ ജിഎസ്ടി നിയമപ്രകാരം നേരിട്ട് അറസ്റ്റ് ചെയ്യില്ല. പകരം, ബിഎൻഎസ് പ്രകാരമായിരിക്കും ഇവർക്കെതിരെ കേസെടുക്കുന്നതും അറസ്റ്റ് ഉൾപ്പെടെയുള്ള നടപടികളിലേക്ക് കടക്കാനുമാണ് പുതിയ നിർദേശം. ജിഎസ്ടി നടപ്പിലാക്കുന്നതിന് മുൻപുണ്ടായിരുന്ന മൂല്യവർധിത നികുതി (VAT) വ്യവസ്ഥയിൽ നികുതി ഉദ്യോഗസ്ഥർക്ക് നേരിട്ട് അറസ്റ്റ് ചെയ്യാനുള്ള അധികാരം ഉണ്ടായിരുന്നില്ല, പകരം പൊലീസിൽ എഫ്ഐആർ രജിസ്റ്റർ ചെയ്യുകയായിരുന്നു രീതി. ഈ പുതിയ ഭേദഗതി വരുന്നതോടെ ജിഎസ്ടി സംവിധാനവും പഴയ വാറ്റ് രീതിക്ക് സമാനമാകും.
