കേസിലെ പ്രധാന പ്രതിയായ മനോജ് മിശ്രയുടെ വിവാഹാഭ്യര്ത്ഥന താന് നിരസിച്ചിരുന്നതായി പീഡനത്തിനിരയായ വിദ്യാര്ത്ഥിനി വെളിപ്പെടുത്തിയിട്ടുണ്ട്.
കൊല്ക്കത്ത: കൊൽക്കത്തയില് നിയമ വിദ്യാര്ത്ഥിനിയെ കൂട്ട ബലാൽസംഗം ചെയ്ത കേസില് പ്രത്യക സംഘത്തെ സംഘത്തെ നിയോഗിച്ചു. അഞ്ച് അംഗങ്ങൾ അടങ്ങുന്ന പ്രത്യേക അന്വേഷണ സംഘത്തെയാണ് നിലവില് അന്വേഷണം ഏല്പ്പിച്ചിരിക്കുന്നത്. എസിപി പ്രദീപ് കുമാർ ഗോസലിന്റെ മേൽനോട്ടത്തിലാണ് അന്വേഷണം നടക്കുക. കൊല്ക്കത്ത ലോ കോളേജിലെ നിയമ വിദ്യാര്ത്ഥിനിയെയാണ് കൂട്ട ബലാത്സംഗത്തിനിരയാക്കിയത്. സംഭവത്തെ തുടര്ന്ന് നാല് പേരെ പൊലീസ് അറസ്റ്റ് ചെയ്തിട്ടുണ്ട്. ഇതില് ഒരാള് കോളേജിലെ പൂര്വ്വ വിദ്യാര്ത്ഥിയും മറ്റ് രണ്ടുപേര് നിലവിലെ വിദ്യാര്ത്ഥികളുമാണ് മറ്റൊരാള് കൊളേജിലെ സെക്യൂരിറ്റി ജീവനക്കാരനും. ബുധനാഴ്ചയാണ് പെണ്കുട്ടി പീഡനത്തിന് ഇരയായത്. വിദ്യാര്ത്ഥിനിയുടെ പരാതിയെ തുടര്ന്നാണ് പൊലീസ് പ്രതികളെ അറസ്റ്റ് ചെയ്തിരിക്കുന്നത്.
കേസിലെ പ്രധാന പ്രതിയായ മനോജ് മിശ്രയുടെ വിവാഹാഭ്യര്ത്ഥന താന് നിരസിച്ചിരുന്നതായി പീഡനത്തിനിരയായ വിദ്യാര്ത്ഥിനി വെളിപ്പെടുത്തിയിട്ടുണ്ട്. ഇയാള് തൃണമൂല് കോണ്ഗ്രസുമായി ബന്ധപ്പെട്ട് പ്രവര്ത്തിക്കുന്ന അഭിഭാഷകനാണെന്നാണ് റിപ്പോര്ട്ട്. വിവാഹാഭ്യര്ത്ഥന നിരസിച്ചപ്പോള് വിദ്യാര്ത്ഥിനിയുടെ ആണ് സുഹൃത്തിനെ ഉപദ്രവിക്കുമെന്നും മാതാപിതാക്കളെ കള്ളക്കേസില് കുടുക്കുമെന്നും മനോജ് മിശ്ര ഭീഷണിപ്പെടുത്തിയതായും പെണ്കുട്ടി ആരോപിക്കുന്നു. കോളേജിലെ ഗാര്ഡ് റൂമിലേക്ക് ബലമായി പിടിച്ചുകൊണ്ടുപോയാണ് പ്രതികള് വിദ്യാര്ത്ഥിനിയെ കൂട്ടബലാത്സംഗത്തിനിരയാക്കിയത്.
