12 വർഷത്തിന് ശേഷം, അമേരിക്കൻ സൈന്യം സിറിയയിലെ തന്ത്രപ്രധാനമായ അൽ-തൻഫ് സൈനിക താവളം ഒഴിഞ്ഞു. മുൻനിശ്ചയിച്ച ഈ പിന്മാറ്റത്തോടെ, സിറിയൻ സേന താവളത്തിന്റെ പൂർണ്ണ നിയന്ത്രണം ഏറ്റെടുക്കുകയും അതിർത്തിയിലെ സ്വാധീനം ശക്തിപ്പെടുത്തുകയും ചെയ്തു
ദമാസ്കസ്: സിറിയയിലെ തന്ത്രപ്രധാനമായ അൽ - തൻഫ് സൈനിക താവളം അമേരിക്കൻ സേന ഒഴിഞ്ഞു. 2014 ൽ ഐ എസ് ഐ എസിനെതിരായ പോരാട്ടത്തിന്റെ ഭാഗമായി സ്ഥാപിച്ച താവളമാണ് ഒരു വ്യാഴവട്ടത്തിന് ശേഷം അമേരിക്കൻ സൈന്യം ഒഴിഞ്ഞത്. അമേരിക്കൻ സേന പിൻവാങ്ങിയതോടെ സിറിയൻ സേന അൽ - തൻഫ് സൈനിക താവളത്തിന്റെ പൂർണ നിയന്ത്രണം ഏറ്റെടുക്കുകയും ചെയ്തു. മുൻനിശ്ചയിച്ച തീരുമാനപ്രകാരമാണ് അമേരിക്കൻ സേന പിൻവാങ്ങിയതെന്നും, ഇത് സിറിയയിലെ അമേരിക്കൻ സാന്നിധ്യം കുറയ്ക്കുന്നതിന്റെ ഭാഗമാണെന്നും റിപ്പോർട്ടുകൾ വ്യക്തമാക്കുന്നു. താവളം ഒഴിഞ്ഞതോടെ സിറിയൻ സേനയ്ക്ക് അതിർത്തി പ്രദേശങ്ങളിലെ നിയന്ത്രണം ശക്തിപ്പെടുത്താൻ കഴിയുമെന്നാണ് വിലയിരുത്തൽ.
