ലോകത്തിന് ആശങ്ക; റഷ്യ-ഉക്രെയ്ൻ യുദ്ധം അവസാനിപ്പിക്കണം: ശക്തമായി പ്രതികരിച്ച് ഇന്ത്യ
ഉക്രൈൻ യുദ്ധത്തോടുള്ള തന്‍റെ വിയോജിപ്പ് പ്രധാനമന്ത്രി മോദി, റഷ്യന്‍ പ്രസിഡന്റ് വ്‌ളാഡിമിർ പുടിനെ നേരത്തെ അറിയിച്ചിരുന്നു.
ന്യൂയോര്‍ക്ക്: റഷ്യ-ഉക്രെയ്ൻ യുദ്ധത്തെക്കുറിച്ച് അതിശക്തമായ പ്രസ്താവനയുമായി ഇന്ത്യ. യുദ്ധം അവസാനിപ്പിക്കാൻ ഇന്ത്യ അഹ്വാനം ചെയ്തു. റഷ്യ-ഉക്രെയ്ൻ യുദ്ധത്തില്‍ വലിയതോതില്‍ ആശങ്കയുണ്ടെന്ന് ഇന്ത്യ പറഞ്ഞു. യുഎൻ സുരക്ഷാ കൗൺസിലിൽ സംസാരിച്ച വിദേശകാര്യ മന്ത്രി എസ് ജയശങ്കറാണ് ഇത് പറഞ്ഞത്.
"ഉക്രെയ്ൻ സംഘർഷം വലിയതോതില്‍ അന്താരാഷ്ട്ര സമൂഹത്തിനും ഉത്കണ്ഠയുണ്ടാക്കുന്നുണ്ട്.
എല്ലാ ശത്രുതകളും ഉടനടി അവസാനിപ്പിച്ച് സംഭാഷണത്തിലേക്കും നയതന്ത്രത്തിലേക്കും മടങ്ങേണ്ടതിന്റെ ആവശ്യകത ഇന്ത്യ ശക്തമായി ആവർത്തിക്കുന്നു. വ്യക്തമായും, പ്രധാനമന്ത്രി നരേന്ദ്ര മോദി പ്രസിഡന്റ് വ്‌ളാഡിമിർ പുടിനോട് ദിവസങ്ങൾക്ക് മുമ്പ് ഷാന്‍ഹായി കൂട്ടായ്മ ഉച്ചകോടിയിൽ. ഊന്നിപ്പറഞ്ഞതുപോലെ, ഇത് യുദ്ധത്തിന്റെ യുഗമാകാൻ കഴിയില്ല" എസ് ജയശങ്കര്‍ പറഞ്ഞു.
ഉക്രൈൻ യുദ്ധത്തോടുള്ള തന്‍റെ വിയോജിപ്പ് പ്രധാനമന്ത്രി മോദി, റഷ്യന്‍ പ്രസിഡന്റ് വ്‌ളാഡിമിർ പുടിനെ നേരത്തെ അറിയിച്ചിരുന്നു. "സംഘർഷസാഹചര്യങ്ങളിൽ പോലും, മനുഷ്യാവകാശങ്ങളുടെയോ അന്താരാഷ്ട്ര നിയമങ്ങളുടെയോ ലംഘനത്തിന് ഒരു ന്യായീകരണവുമില്ല. അത്തരം പ്രവൃത്തികൾ സംഭവിക്കുമ്പോൾ, അവ വസ്തുനിഷ്ഠവും സ്വതന്ത്രവുമായ രീതിയിൽ അന്വേഷിക്കേണ്ടത് അത്യന്താപേക്ഷിതമാണ്," ജയശങ്കർ പറഞ്ഞു.
യുഎൻ ജനറൽ അസംബ്ലിയുടെ ഉയർന്ന തലത്തിലുള്ള 77-ാമത് സമ്മേളനത്തിനായി യുഎൻ ആസ്ഥാനത്ത് യോഗം നടക്കുന്നത്. ഫ്രഞ്ച് വിദേശകാര്യ മന്ത്രി കാതറിൻ കൊളോണയുടെ അധ്യക്ഷതയിൽ 15 അംഗ സമിതിയുടെ യോഗമാണ് നടന്നത്.
യുഎൻ സെക്രട്ടറി ജനറൽ അന്റോണിയോ ഗുട്ടെറസ്, യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കെൻ, ചൈനീസ് വിദേശകാര്യ മന്ത്രി വാങ് യി, റഷ്യൻ വിദേശകാര്യ മന്ത്രി സെർജി ലാവ്‌റോവ്, യുകെ വിദേശകാര്യ, കോമൺവെൽത്ത്, വികസനകാര്യ സെക്രട്ടറി ജെയിംസ് ക്ലെവർലി, മറ്റ് യുഎൻഎസ്‌സി അംഗങ്ങളുടെ വിദേശകാര്യ മന്ത്രിമാർ എന്നിവർ കൗൺസിൽ യോഗത്തില്‍ അഭിസംബോധന നടത്തി.
ആഗോളവൽകൃത ലോകത്ത് യുദ്ധത്തിന്റെ ആഘാതം വിദൂര പ്രദേശങ്ങളിൽ പോലും അനുഭവപ്പെടുന്നുണ്ടെന്ന് ഡോ ജയശങ്കർ കൗൺസിലിൽ പറഞ്ഞു. ഭക്ഷ്യധാന്യങ്ങൾ, വളങ്ങൾ, ഇന്ധനം എന്നിവയുടെ കുതിച്ചുയരുന്ന ചെലവുകളുടെയും ക്ഷാമത്തിന്‍റെ കാര്യത്തിൽ നാമെല്ലാവരും അതിന്‍റെ അനന്തരഫലങ്ങൾ അനുഭവിച്ചിട്ടുണ്ട്. അതിനാല്‍ എന്തുണ്ടാകും എന്ന ആശങ്ക ലോകത്തിനുണ്ടെന്ന് അദ്ദേഹം പറഞ്ഞു.
മോസ്കോയെ അതിന്‍റെ ഏറ്റവും പ്രധാന പങ്കാളികളിൽ ഒന്നായി കണക്കാക്കുമ്പോൾ, ഉക്രെയ്നിലെ റഷ്യൻ അധിനിവേശത്തെ ഇന്ത്യ ഇതുവരെ അപലപിച്ചിരുന്നില്ല, നയതന്ത്രത്തിലൂടെയും സംഭാഷണത്തിലൂടെയും പ്രതിസന്ധി പരിഹരിക്കണമെന്നാണ് ഇന്ത്യ വാദിക്കുന്നത്. എന്നാല്‍ ആദ്യമായാണ് യുഎന്നില്‍ ഇന്ത്യ ഇത്രയും ശക്തമായി പ്രതികരിക്കുന്നത്.
