പാ‍ർട്ടിയിൽ കലാപം തുടരുന്നതിനിടെ തിരുവനന്തപുരത്ത് എ ഗ്രൂപ്പ് രഹസ്യയോഗം
കെ.ബാബു, ബെന്നി ബെഹന്നാൻ, തിരുവഞ്ചൂ‍ർ രാധാകൃഷ്ണൻ, കെ.സി.ജോസഫ്, എംഎം ഹസ്സൻ, തമ്പാനൂ‍ർ രവി തുടങ്ങിയ എ ഗ്രൂപ്പിലെ പ്രമുഖ നേതാക്കൾ യോഗത്തിൽ സംബന്ധിച്ചു.
തിരുവനന്തപുരം: നിയമസഭാ തെരഞ്ഞെടുപ്പിലേറ്റ കനത്ത തിരിച്ചടിയെ ചൊല്ലി പാർട്ടി കലാപം തുടരുന്നതിനിടെ തിരുവനന്തപുരത്ത് കോൺഗ്രസിലെ എ ഗ്രൂപ്പ് നേതാക്കൾ യോഗം ചേ‍ർന്നു. മുൻമുഖ്യമന്ത്രി ഉമ്മൻ ചാണ്ടിയുടെ നേതൃത്വത്തിലാണ് കോൺഗ്രസ് നേതാക്കൾ യോഗം ചേ‍ർന്നത്. കെ.ബാബു, ബെന്നി ബെഹന്നാൻ, തിരുവഞ്ചൂ‍ർ രാധാകൃഷ്ണൻ, കെ.സി.ജോസഫ്, എംഎം ഹസ്സൻ, തമ്പാനൂ‍ർ രവി തുടങ്ങിയ എ ഗ്രൂപ്പിലെ പ്രമുഖ നേതാക്കൾ യോഗത്തിൽ സംബന്ധിച്ചു.
തിരുവനന്തപുരം കവടിയാറിലുള്ള ബന്ധുവിൻ്റെ ഫ്ളാറ്റിൽ മുതിർന്ന കോൺഗ്രസ് നേതാവ് ആര്യാടൻ മുഹമ്മദ് താമസിക്കുന്നുണ്ട് ഇവിടേക്കാണ് എ ഗ്രൂപ്പ് നേതാക്കൾ എത്തിയത്. എന്നാൽ രഹസ്യയോഗമല്ല നടക്കുന്നതെന്നും അസുഖബാധിതനായി വിശ്രമത്തിലുള്ള ആര്യാടൻ മുഹമ്മദിനെ കാണാൻ എത്തിയതാണ് തങ്ങളെന്നുമാണ് മാധ്യമങ്ങളോടുള്ള നേതാക്കളുടെ പ്രതികരണം.
