അമിത് ഷായുടെ കൊല്ലം സന്ദർശനത്തിനിടെ യൂത്ത് കോൺഗ്രസ് കരിങ്കൊടി കാണിച്ചതിൽ പ്രതിഷേധിച്ച് ബിജെപിയും യുവമോർച്ചയും രംഗത്ത്. ഇതിന് മറുപടിയായി പ്രിയങ്ക ഗാന്ധി, രമേശ് ചെന്നിത്തല, പി. സി. വിഷ്ണുനാഥ് തുടങ്ങിയ നേതാക്കൾക്ക് നേരെ യുവമോർച്ച കരിങ്കൊടി വീശി.
കൊല്ലം: കേന്ദ്ര ആഭ്യന്തര മന്ത്രി അമിത് ഷായുടെ കൊല്ലം സന്ദർശനത്തിനിടെ യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ച സംഭവത്തിൽ പ്രകോപിതരായി കരിങ്കൊടി പ്രതിഷേധം തുടര്ന്ന് ബിജെപിയും യുവമോർച്ചയും. ടൂറിസം മന്ത്രി പി. സി. വിഷ്ണുനാഥിന് നേരെ കുണ്ടറയിലും നീണ്ടകരയിലും യുവമോർച്ച പ്രവർത്തകർ കരിങ്കൊടി വീശി പ്രതിഷേധിച്ചു. കുണ്ടറ എംഎൽഎ ഓഫീസിന് മുന്നിൽ വെച്ച് യുവമോർച്ച പ്രവർത്തകർ മന്ത്രിയുടെ വാഹനം തടഞ്ഞാണ് പ്രതിഷേധം ഉയർത്തിയത്. ഉച്ചയ്ക്ക് നീണ്ടകരയിലും വിഷ്ണുനാഥിന് നേരെ കരിങ്കൊടി കാണിച്ചിരുന്നു.
അമിത് ഷായ്ക്ക് നേരെ ഉണ്ടായ പ്രതിഷേധത്തിന് മറുപടിയായി പ്രിയങ്ക ഗാന്ധി എം.പി, ആഭ്യന്തര മന്ത്രി രമേശ് ചെന്നിത്തല തുടങ്ങിയ പ്രമുഖ നേതാക്കൾക്കെതിരെയും യുവമോർച്ചയും ബിജെപിയും കരിങ്കൊടി വീശി. ഇന്നലെ കരുനാഗപ്പള്ളിയിൽ വെച്ച് കെ. മുരളീധരന് നേരെയും പ്രതിഷേധക്കാർ കരിങ്കൊടി കാണിച്ചിരുന്നു. കേന്ദ്ര ആഭ്യന്തര മന്ത്രിയുടെ സന്ദർശനത്തിനിടെ ഉണ്ടായ ഗുരുതരമായ സുരക്ഷാ വീഴ്ചയിൽ അടിയന്തര നടപടി വേണമെന്ന് ബിജെപി ആവശ്യപ്പെട്ടിട്ടുണ്ട്.
വിവിധയിടങ്ങളിൽ കരിങ്കൊടി പ്രതിഷേധം; പോലീസിന് ബിജെപി പരാതി
സംസ്ഥാന ആഭ്യന്തര മന്ത്രി രമേശ് ചെന്നിത്തലയ്ക്ക് നേരെ കോഴിക്കോട് ജില്ലയിലെ വടകര, കുറ്റ്യാടി ജാനകിക്കാട്, കൊയിലാണ്ടി, എരഞ്ഞിപ്പാലം എന്നിങ്ങനെ നാല് കേന്ദ്രങ്ങളിലാണ് യുവമോർച്ച പ്രവർത്തകർ കരിങ്കൊടി കാണിച്ചത്. തിരുവമ്പാടി തമ്പലമണ്ണയ്ക്ക് സമീപം വെച്ച് യുവമോർച്ച ജില്ലാ പ്രസിഡന്റ് വി. വി. ശ്രീഹരിയുടെ നേതൃത്വത്തിൽ പ്രിയങ്ക ഗാന്ധി എം.പിക്ക് നേരെയും പ്രതിഷേധം നടന്നു.
Related Articles
അതേസമയം, കൊല്ലം ആശ്രാമം മൈതാനത്ത് വിമാനമിറങ്ങി വാഹനവ്യൂഹത്തിൽ സഞ്ചരിക്കുകയായിരുന്ന കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ, സുരക്ഷാ മാനദണ്ഡങ്ങൾ ലംഘിച്ച് വെറും 50 മീറ്റർ മാത്രം അകലേക്ക് യൂത്ത് കോൺഗ്രസ് പ്രതിഷേധക്കാർക്ക് എത്താൻ സാധിച്ചത് വലിയ സുരക്ഷാ വീഴ്ചയാണെന്ന് ബിജെപി ആരോപിച്ചു. സംഭവത്തിൽ അന്വേഷണം ആവശ്യപ്പെട്ട് ബിജെപി നിയമസഭാ കക്ഷി നേതാവും എംഎൽഎയുമായ ബി. ബി. ഗോപകുമാർ സംസ്ഥാന പോലീസ് മേധാവിക്ക് പരാതി നൽകി.
