ബിഹാറിലെ ജാമുയി ജില്ലയിൽ രാത്രിയിൽ ബൈക്കില് സഞ്ചരിക്കുകയായിരുന്ന യുവതിക്കും യുവാവിനും നേരെ ഒരു സംഘം ആളുകളുടെ ആക്രമണം
ജാമുയി: ബിഹാറിലെ ജാമുയി ജില്ലയിൽ രാത്രിയിൽ ബൈക്കില് സഞ്ചരിക്കുകയായിരുന്ന യുവതിക്കും യുവാവിനും നേരെ ഒരു സംഘം ആളുകളുടെ ആക്രമണം. അതിക്രമത്തിന്റെ ദൃശ്യങ്ങൾ സമൂഹമാധ്യമങ്ങളിൽ വൻ അമർഷത്തിന് ഇടയാക്കി. ബൈക്കില് പോകുകയായിരുന്ന ഇവരെ ഒരു കൂട്ടം ആളുകൾ തടഞ്ഞുനിർത്തുകയും വഴിയിൽ വച്ച് വളഞ്ഞുവെച്ച് ഉപദ്രവിക്കുകയുമായിരുന്നു. വിജനമായ വനപ്രദേശത്തിന് സമീപമുള്ള റോഡിലാണ് അതിക്രമം നടന്നത്. ടോർച്ച് വെളിച്ചത്തിലും വാഹനങ്ങളുടെ ലൈറ്റുകളിലുമാണ് ദൃശ്യങ്ങൾ ചിത്രീകരിച്ചിരിക്കുന്നത്. യുവാവിനെയും യുവതിയെയും തടഞ്ഞുനിർത്തിയ സംഘം ഇരുവരെയും ഭീഷണിപ്പെടുത്തുകയും ഉപദ്രവിക്കുകയും ചെയ്തു. തടയാൻ ശ്രമിച്ച യുവാവിനെ സംഘം ബലമായി പിടിച്ചുമാറ്റി.
മുഖം മൂടിയ ഒരാൾ യുവതിയെ പുറകിൽ നിന്ന് പിടിച്ച് ബലമായി മറ്റൊരിടത്തേക്ക് വലിച്ചിഴച്ചു കൊണ്ടുപോകാൻ ശ്രമിക്കുന്നത് ദൃശ്യങ്ങളിൽ വ്യക്തമാണ്. ഭയന്ന യുവതി നിലവിളിക്കുകയും അക്രമികളിൽ നിന്ന് രക്ഷപ്പെടാൻ കൈകൂപ്പി അപേക്ഷിക്കുകയും ചെറുത്തുനിൽക്കുകയും ചെയ്തു. തുടർന്ന് ഇരുവരും അവിടെനിന്ന് രക്ഷപ്പെടുകയായിരുന്നു. ദൃശ്യങ്ങൾ സമൂഹമാധ്യമങ്ങളിൽ വൈറലാവുകയും വ്യാപകമായ പ്രതിഷേധം ഉയരുകയും ചെയ്തതോടെ വിഷയത്തിൽ പോലീസ് ഇടപെട്ടു. ദൃശ്യങ്ങൾ പരിശോധിച്ചുവരികയാണെന്നും സംഭവത്തിൽ ഉൾപ്പെട്ടവരെ തിരിച്ചറിയാനും അവർക്കെതിരെ കർശന നിയമനടപടികൾ സ്വീകരിക്കാനും അധികൃതർ അറിയിച്ചു.
