2023 മുതൽ ബന്ധമുണ്ടെന്ന് പരാതിയിൽ പറയുന്നു. മെഡിക്കൽ കോളേജ് പൊലീസാണ് കേസെടുത്തിരിക്കുന്നത്. നിലവിൽ ന്യൂറോ സർജറി വിഭാഗം യൂണിറ്റ് ചീഫാണ് ഡോക്ടർ സുനിൽ കുമാർ.
തിരുവനന്തപുരം: തിരുവനന്തപുരം മെഡിക്കൽ കോളേജിലെ മുൻ സൂപ്രണ്ട് ഡോക്ടർ സുനിൽ കുമാറിനെതിരെ പീഡനകേസ്. ചികിത്സക്കായി എത്തിയ സ്ത്രീയെ പീഡിപ്പിച്ചെന്നാണ് കേസ്. നിലവിൽ മെഡിക്കൽ കോളേജ് ന്യൂറോ സര്ജറി വിഭാഗം മേധാവി കൂടി ആയിട്ടുള്ള സുനിൽ കുമാറിനെതിരെയാണ് ഇത്തരത്തിലൊരു ആരോപണം വന്നിട്ടുളളത്. ഇതിന്റെ അടിസ്ഥാനത്തിലാണ് മെഡിക്കൽ കോളേജ് പൊലീസ് കേസെടുത്തിരിക്കുന്നത്. പരാതിയിൽ പറയുന്നത്, 2023 ൽ ചികിത്സ തേടി എത്തിയെന്നും മാനസിക പ്രശ്നങ്ങള് ഉണ്ടായിരുന്നതിനാൽ സൈക്യാട്രി വിഭാഗത്തിലേക്ക് മാറ്റിയെന്നും അന്ന് മുതൽ ഡോക്ടറുമായി തുടങ്ങിയ ബന്ധമാണെന്നുമാണ്.
സൌഹൃദം സ്ഥാപിച്ച് പല സ്ഥലങ്ങളിൽ കൊണ്ടുപോയി വിവാഹവാഗ്ദാനം നൽകി പീഡിപ്പിച്ചുവെന്നുമാണ് പരാതിയിലുള്ളത്. ഇതുമായി ബന്ധപ്പെട്ട് നേരത്തെ വനിതാ കമ്മീഷനിൽ പരാതി എത്തിയിട്ടുണ്ട്. അതിന്റെ വസ്തുതകള് മനസിലാക്കി മാത്രമേ തുടര് നടപടികളിലേക്ക് പോകൂ എന്നാണ് പൊലീസ് അറിയിച്ചിരിക്കുന്നത്. സ്ത്രീ നൽകിയ പരാതിയുടെ അടിസ്ഥാനത്തിൽ മെഡിക്കൽ കോളേജ് പൊലീസ് കേസെടുത്തിട്ടുണ്ട്. കോവളം പൊലീസിന് കൈമാറുമെന്ന് പൊലീസ് അറിയിച്ചു.
