തിരുവനന്തപുരം: തൻ്റെ വാർത്താസമ്മേളനങ്ങൾക്ക് പിന്നിൽ പിആർ ഏജൻസിയുടെ ഇടപെടലുണ്ടെന്ന പ്രതിപക്ഷ ആരോപണത്തിന് ശക്തമായ മറുപടിയുമായി മുഖ്യമന്ത്രി പിണറായി വിജയൻ. തന്നെ ഈ നാടിനറിയാമെന്നും മാധ്യമപ്രവർത്തകരെ ആദ്യമായി കാണുന്നയാളല്ല താനെന്നും മുഖ്യമന്ത്രി പറഞ്ഞു. കൊവിഡ് പ്രതിരോധ പ്രവർത്തനങ്ങളുടെ അവലോകനത്തിന് ശേഷം നടക്കുന്ന പ്രതിദിന വാർത്താസമ്മേളനത്തിനിടെയാണ് പിആർ ആരോപണങ്ങൾക്ക് കടുത്ത ഭാഷയിൽ മുഖ്യമന്ത്രി മറുപടി നൽകിയത്. 

മുഖ്യമന്ത്രിയുടെ വാക്കുകൾ - 

നിങ്ങൾ (മാധ്യമപ്രവർത്തകർ) കുറച്ചു കാലമായില്ലേ ഈ കൈലും കുത്തി നടക്കുന്നൂ, ഞാനും കുറച്ചു കാലമായി ഈ കൈലും കുത്തി ഇവിടെ നിൽക്കുന്നുണ്ട്. നമ്മൾ തമ്മിൽ ഇതാദ്യമായി കാണുകയല്ല. കുറേ കാലമായി കാണുന്നുണ്ട്. നമ്മൾ തമ്മിൽ സംസാരിക്കുമ്പോൾ ഞാൻ പറയുന്ന കാര്യങ്ങളിൽ മറ്റാരുടെയെങ്കിലും ഉപദേശം തേടുന്ന ശീലം എനിക്കുണ്ടെന്ന് സാമന്യബുദ്ധിയുള്ളവരാരും പറയില്ല. 

നിങ്ങളെന്നോട് ഒരുപാട് ചോദ്യം ചോദിക്കുന്നില്ലേ ? ഞാൻ ഹെഡ് ഫോണോ മറ്റോ വച്ച് പിആർ ഏജൻസിക്കാരോട് ചോദിക്കാറുണ്ടോ. നിങ്ങളുടെ കൈയിൽ അത്തരം ഉപകരണങ്ങൾ കാണാറുണ്ട്. എൻ്റെ ചെവിയിൽ അങ്ങനെ വല്ലതും കണ്ടിട്ടുണ്ടോ. ഞാൻ ഫ്രീയായി നിൽക്കുന്നു. നിങ്ങൾ ഫ്രീയായി ചോദിക്കുന്നു. നിങ്ങളുടെ ചോദ്യങ്ങൾക്ക് ഞാൻ മറുപടി പറയുന്നില്ലേ.. ? ഏതെങ്കിലും ചോദ്യത്തിന് ഞാനുത്തരം പറയാതിരുന്നിട്ടുണ്ടോ?  ഏതെങ്കിലും പിആർ എജൻസിയുടെ മറുപടി കാത്തു നിൽക്കുകയാണോ ഞാൻ. എന്നെ ഈ നാടിനറിയില്ലേ...?