സ്ഥിര നിക്ഷേപം തിരികെ നൽകാത്ത സംഭവം; 20 ലക്ഷം ഒരുമിച്ച് ആവശ്യപ്പെട്ടതിനാലെന്ന് വിശദീകരിച്ച് വനിത സഹകരണ സംഘം
നിക്ഷേപത്തുക പൂർണമായി വായ്പയായി നൽകിയിരിക്കുകയാണ്. ഘട്ടം ഘട്ടമായി തുക പിൻവലിക്കണമെന്ന് ആവശ്യപ്പെട്ടിരുന്നു എന്നും ഇവർ വെളിപ്പെടുത്തുന്നു.
കണ്ണൂർ: സ്ഥിര നിക്ഷേപം തിരികെ നൽകിയില്ലെന്ന അധ്യാപികയുടെ പരാതിയിൽ വിശദീകരണവുമായി സിപിഎം ഭരിക്കുന്ന ഇരിട്ടിയിലെ വനിതാ സഹകരണ സംഘം. 20 ലക്ഷം നൽകാൻ കഴിയാത്തത് ഒരുമിച്ച് തിരികെ നൽകണമെന്ന് ആവശ്യപ്പെട്ടതിനാലെന്ന് സഹകരണ സംഘത്തിന്റെ വിശദീകരണത്തിൽ പറയുന്നു. നിക്ഷേപത്തുക പൂർണമായി വായ്പയായി നൽകിയിരിക്കുകയാണ്. ഘട്ടം ഘട്ടമായി തുക പിൻവലിക്കണമെന്ന് ആവശ്യപ്പെട്ടിരുന്നു എന്നും ഇവർ വെളിപ്പെടുത്തുന്നു. ഒരു വിഹിതം വീട്ടിലെത്തിച്ച് നൽകാൻ ശ്രമിച്ചിരുന്നെന്നും വിശദീകരണത്തിലുണ്ട്. അതേ സമയം തെരഞ്ഞെടുപ്പ് കാലത്ത് പരാതിയുമായി വന്നത് ദുരുദ്ദേശപരമെന്നും സംഘം ആരോപണമുന്നയിക്കുന്നു.