ഫോർട്ട് സ്റ്റേഷനിലെ യുവാവിന്‍റെ മരണം: ക്രൈംബ്രാഞ്ച് അന്വേഷണം തുടങ്ങി, നാളെ സ്റ്റേഷനിലെത്തി പരിശോധന
അന്വേഷണ ഉദ്യോഗസ്ഥനായ ഡിവൈഎസ്പി ഹരികൃഷ്ണന്‍റെ നേതൃത്വത്തിലുള്ള സംഘമാണ് സ്റ്റേഷനിലെത്തി പരിശോധന നടത്തുക.
തിരുവനന്തപുരം: തിരുവനന്തപുരം ഫോർട്ട് പൊലീസ് സ്റ്റേഷനിൽ കസ്റ്റഡിയില്‍ എടുത്തയാള്‍ തൂങ്ങിമരിച്ച സംഭവത്തില്‍ ക്രൈംബ്രാഞ്ച് അന്വേഷണം തുടങ്ങി. ക്രൈംബ്രാഞ്ച് ഉദ്യോഗസ്ഥർ സ്റ്റേഷനിലെത്തി പ്രാഥമിക വിവരശേഖരണം നടത്തി. സ്റ്റേഷനിലെത്തി നാളെ ക്രൈംബ്രാഞ്ച് പ്രത്യേക സംഘം പരിശോധന നടത്തും. അന്വേഷണ ഉദ്യോഗസ്ഥനായ ഡിവൈഎസ്പി ഹരികൃഷ്ണന്‍റെ നേതൃത്വത്തിലുള്ള സംഘമാണ് സ്റ്റേഷനിലെത്തി പരിശോധന നടത്തുക. തിരുവനന്തപുരം ക്രൈംബ്രാഞ്ച് യൂണിറ്റ് എസ് പി ഷാനവാസിന്‍റെ മേൽനോട്ടത്തിലാണ് അന്വേഷണം.
അതിനിടെ ഫോർട്ട് പൊലീസ് സ്റ്റേഷനിലെത്തി മജിസ്ട്രേറ്റ് പരിശോധന നടത്തി. അൻസാരിയെ തൂങ്ങി മരിച്ച നിലയിൽ കണ്ട സ്ഥലത്താണ് പരിശോധന നടന്നത്. മോഷണ കുറ്റത്തിന് ഫോർട്ട് പൊലീസ് കസ്റ്റഡിയിലെടുത്ത പൂന്തുറ സ്വദേശി അൻസാരിയെ സ്റ്റേഷനിലെ ശുചിമുറിയിലാണ് തൂങ്ങിമരിച്ച നിലയിൽ കണ്ടെത്തിയത്. അൻസാരിക്ക് മ‍ർദനമേറ്റിട്ടില്ലെന്നും ആത്മഹത്യ തന്നെയാണെന്നുമാണ് പ്രാഥമിക നിഗമനം. അതേ സമയം പ്രതിയെ സ്റ്റേഷനിൽ കൊണ്ടുവന്ന കാര്യം രേഖപ്പെടുത്താത്തതും മേൽനോട്ടത്തിലും ഉദ്യോഗസ്ഥർക്ക് വീഴ്ച സംഭവിച്ചിട്ടുണ്ടെന്നാണ് പ്രാഥമിക അന്വേഷണം നടത്തിയ ജില്ലാ ക്രൈംബ്രാഞ്ചിന്‍റെ കണ്ടെത്തൽ.
