എംജി സർവ്വകലാശാലയും പൂർവ്വ വിദ്യാർത്ഥി അസോസിയേഷനും ചേർന്ന് 'എഡ്യു വിഷൻ 2035' എന്ന പേരിൽ അന്താരാഷ്ട്ര കോൺക്ലേവ് സംഘടിപ്പിക്കുന്നു. ജനുവരി 26, 27 തീയതികളിൽ കോട്ടയത്ത് നടക്കുന്ന ഈ പരിപാടി ഉന്നതവിദ്യാഭ്യാസ മേഖലയുടെ ഭാവി ചർച്ച ചെയ്യും
കോട്ടയം: എംജി സർവ്വകലാശാലയും പൂർവ്വ വിദ്യാർത്ഥി അസോസിയേഷനും സംയുക്തമായി സംഘടിപ്പിക്കുന്ന അന്താരാഷ്ട്ര കോൺക്ലേവ് 'എഡ്യു വിഷൻ 2035' ന് നാളെ തുടക്കം കുറിക്കും. കോട്ടയം സ്കൂൾ ഓഫ് കെമിക്കൽ സയൻസ് ഓഡിറ്റോറിയത്തിൽ നടക്കുന്ന ചടങ്ങിൽ മന്ത്രി വി.എൻ. വാസവൻ കോൺക്ലേവ് ഉദ്ഘാടനം ചെയ്യും. മന്ത്രി ആർ. ബിന്ദു മുഖ്യപ്രഭാഷണം നടത്തും. കേരളത്തിലെ ഉന്നതവിദ്യാഭ്യാസ മേഖലയുടെ ഭാവി രൂപപ്പെടുത്താൻ ലക്ഷ്യമിട്ടുള്ളതാണ് പരിപാടി.
ശാസ്ത്രം, സാങ്കേതികവിദ്യ, ഡിജിറ്റൽ വിദ്യാഭ്യാസം, കല, സാഹിത്യം, മാധ്യമം, പബ്ലിക് പോളിസി തുടങ്ങിയ മേഖലകളിൽ നാല് പാനൽ ചർച്ചകൾ നടക്കും. അമേരിക്ക, കാനഡ, യൂറോപ്പ് എന്നിവിടങ്ങളിൽ നിന്നുള്ള വിദഗ്ധർ പങ്കെടുക്കുന്ന രണ്ട് ഹൈബ്രിഡ് സെഷനുകൾ കോൺക്ലേവിന്റെ ഭാഗമാകും. ലോകത്തിന്റെ വിവിധ ഭാഗങ്ങളിൽ പ്രശസ്തരായ സർവ്വകലാശാലാ പൂർവ്വ വിദ്യാർത്ഥികൾ നേരിട്ടും ഓൺലൈനായും തങ്ങളുടെ കാഴ്ചപ്പാടുകളും അനുഭവങ്ങളും പങ്കുവെക്കും. ജനുവരി 26-ന് വൈകുന്നേരം 'മെലഡീസ് ആൻഡ് മെമ്മറീസ്' എന്ന കലാസന്ധ്യയും അരങ്ങേറും. ഉന്നതവിദ്യാഭ്യാസത്തിന്റെ അന്താരാഷ്ട്ര മാനങ്ങളും ഭാവി വെല്ലുവിളികളും ചർച്ച ചെയ്യുകയാണ് രണ്ട് ദിവസമായി സംഘടിപ്പിക്കുന്ന കോൺക്ലേവിന്റെ ലക്ഷ്യം.












