തണ്ണീർമുക്കം വടക്ക് വില്ലേജിൽ റോഡരികിൽ വളർത്തിയിരുന്ന കഞ്ചാവ് ചെടി എക്സൈസ് കണ്ടെത്തി
ചേർത്തല: തണ്ണീർമുക്കം വടക്ക് വില്ലേജിൽ റോഡരികിൽ വളർത്തിയിരുന്ന കഞ്ചാവ് ചെടി എക്സൈസ് കണ്ടെത്തി. മുഹമ്മ റോഡിൽ വെരുങ്ങുംചുവട് ബസ് സ്റ്റോപ്പിനടുത്തുള്ള കാത്തിരിപ്പുകേന്ദ്രത്തിന് സമീപം ഇലക്ട്രിക് പോസ്റ്റിനോട് ചേർന്ന് തിങ്കളാഴ്ച വൈകിട്ട് ആറോടെയാണ് 62 സെന്റീമീറ്റർ നീളമുള്ള കഞ്ചാവ് ചെടി കണ്ടെത്തിയത്. എക്സൈസ് റേഞ്ച് ഓഫീസിലെ ഇൻസ്പെക്ടർ എ ആർ അനിൽകുമാറിന്റെ നേതൃത്വത്തിലുള്ള സംഘമാണ് പരിശോധന നടത്തിയത്. കണ്ടെത്തിയ ചെടി ബ്രൗൺ പേപ്പറിൽ പൊതിഞ്ഞ് നമ്പർ വെച്ച് സീൽ ചെയ്ത് കസ്റ്റഡിയിലെടുത്തു. സംഭവത്തിൽ ചേർത്തല എക്സൈസ് കേസെടുത്ത് സമീപപ്രദേശങ്ങളിലും അന്വേഷണം വ്യാപിപ്പിച്ചു.
