'കുട്ടികളെ കണ്ടെത്തിയത് തണല്‍ പദ്ധതിയുടെ വിജയം; ആ മക്കളെയും കുടുംബത്തെയും സംരക്ഷിക്കു'മെന്നും ആരോഗ്യമന്ത്രി
"കുട്ടികളെ സാമൂഹ്യ നീതി വകുപ്പ് സംരക്ഷിക്കും. എല്ലാം അർഥത്തിലും കുടുംബത്തെ സഹായിക്കും. "
തിരുവനന്തപുരം: കൈതമുക്കില്‍ താമസക്കാരിയായ അമ്മ ദാരിദ്ര്യം മൂലം തന്‍റെ ആറ് മക്കളില്‍ നാല് പേരെ ശിശുക്ഷേമ സമിതിക്ക് കൈമാറിയ സംഭവത്തില്‍ പ്രതികരണവുമായി ആരോഗ്യമന്ത്രി കെ കെ ശൈലജ. ഈ കുട്ടികളെ കണ്ടെത്താൻ കഴിഞ്ഞത് സർക്കാർ നടപ്പിലാക്കിയ തണൽ പദ്ധതിയുടെ വിജയമാണെന്ന് മന്ത്രി പ്രതികരിച്ചു.
Read Also: വിശപ്പകറ്റാന്‍ കുഞ്ഞ് മണ്ണ് വാരിത്തിന്നു; നാലുമക്കളെ ശിശുക്ഷേമസമിതിയുടെ സംരക്ഷണയിലാക്കി ഒരമ്മ
കുട്ടികളെ സാമൂഹ്യ നീതി വകുപ്പ് സംരക്ഷിക്കും. എല്ലാം അർഥത്തിലും കുടുംബത്തെ സഹായിക്കും. ഇത്തരം സാഹചര്യം കേരളത്തിലെ കുട്ടികൾ അനുഭവിക്കരുത്. നഗരസഭയോട് കൂടി ആലോചിച്ചിട്ട് കുട്ടികളുടെ അമ്മയ്ക്ക് ജോലി നൽകുന്ന കാര്യം തീരുമാനിക്കും. 4 കുട്ടികളുടെ വിദ്യാഭ്യാസം ഭക്ഷണം എന്നിവ ശിശു ക്ഷേമ സമിതി നോക്കും. കുട്ടികള്‍ക്ക് കുടുംബവുമൊത്ത് താമസിക്കാൻ സാഹചര്യം ഒരുക്കുമെന്നും മന്ത്രി പറഞ്ഞു.
കുട്ടികളുടെ അമ്മയ്ക്ക് താല്‍ക്കാലിക ജോലി നല്‍കുമെന്നും കുടുംബത്തിന് താമസിക്കാന്‍ നഗരസഭയുടെ ഫ്ലാറ്റുകളിലൊന്ന് വിട്ടുനല്‍കുമെന്നും തിരുവനന്തപുരം മേയര്‍ കെ ശ്രീകുമാര്‍ പറഞ്ഞിരുന്നു
