ഇന്ന് മാത്രമല്ല വരും ദിവസങ്ങളിലും യാതാരു വിധ മഴ അലർട്ടുകളുമില്ലെന്നത് തലസ്ഥാന ജില്ലയെ സംബന്ധിച്ചടുത്തോളം മഴക്കെടുതിയിൽ ആശ്വാസമേകുന്ന വാർത്തയാണ്
തിരുവനന്തപുരം: അതിതീവ്ര മഴ കേരളമാകെ വലിയ വെല്ലുവിളികൾ തീർക്കുമ്പോൾ ഒരു ജില്ലയിൽ മാത്രം ഇന്ന് വലിയ ആശ്വാസം. കാലാവസ്ഥ വകുപ്പിന്റെ റെഡ്, ഓറഞ്ച്, യെല്ലോ അലർട്ടുകൾ മറ്റെല്ലാ ജില്ലകളിലും ഉള്ളപ്പോൾ തലസ്ഥാന ജില്ലയിൽ മാത്രം ഇന്ന് ഒരു അലർട്ടുമില്ല. കാലാവസ്ഥ വകുപ്പിന്റെ പ്രവചനം പോലെതന്നെ ചെറിയ തോതിലുള്ള മഴ ഇടവിട്ട് പെയ്തെങ്കിലും തിരുവനന്തപുരത്ത് ഇന്ന് കാര്യമായ മഴ ഭീഷണി ഉണ്ടായതുമില്ല. ഇന്ന് മാത്രമല്ല വരും ദിവസങ്ങളിലും യാതാരു വിധ മഴ അലർട്ടുകളുമില്ലെന്നത് തലസ്ഥാന ജില്ലയെ സംബന്ധിച്ചടുത്തോളം മഴക്കെടുതിയിൽ ആശ്വാസമേകുന്ന വാർത്തയാണ്. നിലവിലെ അറിയിപ്പ് പ്രകാരം എട്ടാം തിയതിവരെ തിരുവനന്തപുരം ജില്ലയിൽ ഒരുവിധത്തിലുമുള്ള മഴ അലർട്ട് ഇല്ല.
കേരളത്തിന് ശുഭവാർത്ത! കാലാവസ്ഥ വകുപ്പിന്റെ ഏറ്റവും പുതിയ സൂചന, അതിതീവ്രമഴക്ക് ഇന്ന് അറുതിയായേക്കും
അതേസമയം സംസ്ഥാനത്ത് അതിതീവ്രമഴക്ക് ഇന്നത്തോടെ ശമനമായേക്കുമെന്ന ശുഭ സൂചനയും കാലാവസ്ഥ വകുപ്പിൽ നിന്നുള്ള വിവരങ്ങൾ പ്രകാരം വ്യക്തമാകുന്നുണ്ട്. അടുത്ത ദിവസങ്ങളിലെ മഴ സാധ്യത പ്രവചനത്തിൽ കേരളത്തിൽ ഒരു ജില്ലയിലും അതിതീവ്രമഴക്ക് സാധ്യതയില്ലെന്നാണ് കാലാവസ്ഥ വകുപ്പ് ചൂണ്ടികാട്ടിയിട്ടുള്ളത്. നാളെയും മറ്റന്നാളും കേരളത്തിൽ ഒരു ജില്ലയിലും റെഡ് അലർട്ടോ ഓറഞ്ച് അലർട്ടോ പ്രഖ്യാപിച്ചിട്ടില്ല. നാളെ കേരളത്തിൽ നാല് ജില്ലകളിൽ മാത്രം യെല്ലോ അലർട്ട് ആണ് പ്രഖ്യാപിച്ചിട്ടുള്ളത്. നിലവിലെ അറിയിപ്പ് പ്രകാരം നാളെ കോഴിക്കോട്, വയനാട്, കണ്ണൂർ, കാസറഗോഡ് ജില്ലകളിൽ മാത്രമാണ് യെല്ലോ അലർട്ട് പ്രഖ്യാപിച്ചിട്ടുള്ളത്.
അതേസമയം ഇന്ന് 2 ജില്ലകളിൽ റെഡ് അലർട്ടും 7 ജില്ലകളിൽ ഓറഞ്ച് അലർട്ടും 4 ജില്ലകളിൽ യെല്ലോ അലർട്ടും തുടരുകയാണ്. കണ്ണൂർ, കാസറഗോഡ് ജില്ലകളിലാണ് റെഡ് അലർട്ട്. ഒറ്റപ്പെട്ടയിടങ്ങളിൽ അതിതീവ്രമായ മഴക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറിൽ 204.4 mm യിൽ കൂടുതൽ മഴ ലഭിക്കുമെന്നാണ് അതിതീവ്രമായ മഴ (Extremely Heavy Rainfall) എന്നത് കൊണ്ട് കാലാവസ്ഥ വകുപ്പ് അർത്ഥമാക്കുന്നത്.
ഇന്നത്തെ ഓറഞ്ച് അലർട്ട്
ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട് എന്നീ ജില്ലകളിൽ കേന്ദ്ര കാലാവസ്ഥ വകുപ്പ് ഓറഞ്ച് അലർട്ട് പ്രഖ്യാപിച്ചിരിക്കുന്നു. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറിൽ 115.6 mm മുതൽ 204.4 mm വരെ മഴ ലഭിക്കുമെന്നാണ് അതിശക്തമായ മഴ (Very Heavy Rainfall) എന്നത് കൊണ്ട് കാലാവസ്ഥ വകുപ്പ് അർത്ഥമാക്കുന്നത്.
ഏഷ്യാനെറ്റ് ന്യൂസ് യൂട്യൂബിൽ തത്സമയം കാണാം...
