കാലാവസ്ഥ പ്രവചനം കൃത്യം, തെക്കൻ കേരളത്തിൽ മൂന്ന് മണിക്കൂറിൽ ആശ്വാസ മഴ! ഏറ്റവും ശക്തമായ മഴ ലഭിച്ചത് വർക്കലയിൽ
തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, ഇടുക്കി ജില്ലകളിൽ മഴ സാധ്യത ശക്തമാകുമെന്നാണ് കാലാവസ്ഥ വകുപ്പ് ഏറ്റവും ഒടുവിലായി അറിയിപ്പ് നൽകിയത്. ഈ ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്
തിരുവനന്തപുരം: കാലാവസ്ഥ പ്രവചനം പോലെ തെക്കൻ കേരളത്തിൽ മഴ ശക്തമായി. കഴിഞ്ഞ മൂന്ന് മണിക്കൂറിൽ തെക്കൻ കേരളത്തിലെ ജില്ലകളിൽ കാര്യമായ മഴ ലഭിച്ചു. തിരുവനന്തപുരം ജില്ലയിലെ വർക്കലയിലാണ് ഏറ്റവും ശക്തമായ മഴ ലഭിച്ചത്. വർക്കലയിൽ മാത്രം കഴിഞ്ഞ 3 മണിക്കൂറിൽ 111 മില്ലി മീറ്റർ മഴ ലഭിച്ചെന്നാണ് ഐ എം ഡി ഉദ്യോഗസ്ഥർ പറയുന്നത്. പത്തനംതിട്ട ജില്ലയിലെ വെൺകുറിഞ്ഞിയിൽ 90 മില്ലി മീറ്റർ മഴ ലഭിച്ചെന്നുമാണ് കണക്ക്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, ഇടുക്കി ജില്ലകളിൽ മഴ സാധ്യത ശക്തമാകുമെന്നാണ് കാലാവസ്ഥ വകുപ്പ് ഏറ്റവും ഒടുവിലായി അറിയിപ്പ് നൽകിയത്. ഈ ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്.
പുതുക്കിയ മഴ മുന്നറിയിപ്പും യെല്ലോ അലർട്ടും
ഇന്ന് രാത്രിയോടെയാണ് മഴ മുന്നറിയിപ്പിൽ കാലാവസ്ഥ വകുപ്പ് മാറ്റം വരുത്തിയത്. 3 ജില്ലകളിൽ പ്രഖ്യാപിച്ചിരുന്ന യെല്ലോ അലർട്ട് 6 ജില്ലകളിലേക്ക് വ്യാപിപ്പിക്കുകയായിരുന്നു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം, ഇടുക്കി ജില്ലകളിലാണ് നിലവിൽ യെല്ലോ അലർട്ട് പ്രഖ്യാപിച്ചിരിക്കുന്നത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.
സംസ്ഥാനത്ത് അടുത്ത അഞ്ച് ദിവസവും മഴ തുടരാൻ സാധ്യതയെന്നാണ് വിവരം. രണ്ട് ചക്രവാതച്ചുഴി ഒന്നിച്ച് നിലനിൽക്കുന്നതും ന്യൂനമർദ്ദ സാധ്യതയുമാണ് മഴ തുടരാൻ കാരണം. തെക്ക് കിഴക്കൻ രാജസ്ഥാന് മുകളിൽ നിലനിന്നിരുന്ന ന്യൂനമർദം കിഴക്കൻ രാജസ്ഥാന് മുകളിൽ ചക്രവാതച്ചുഴിയായി മാറിയിട്ടുണ്ട്. വടക്ക് കിഴക്കൻ ബംഗാൾ ഉൾക്കടലിനും മധ്യ കിഴക്കൻ ബംഗാൾ ഉൾക്കടലിനും മുകളിലായി മറ്റൊരു ചക്രവാതച്ചുഴി സ്ഥിതി ചെയ്യുന്നു. അടുത്ത 48 മണിക്കൂറിനുള്ളിൽ വടക്ക് പടിഞ്ഞാറൻ ബംഗാൾ ഉൾക്കടലിനു മുകളിൽ ചക്രവാതച്ചുഴി ന്യൂനമർദമായി ശക്തി പ്രാപിക്കാൻ സാധ്യതയുണ്ടെന്നാണ് കാലാവസ്ഥ വകുപ്പ് പറയുന്നത്. ഈ സാഹചര്യത്തിൽ കേരളത്തിൽ അടുത്ത 5 ദിവസം മിതമായ / ഇടത്തരം മഴക്ക്‌ സാധ്യതയും ഇന്ന് (2023 സെപ്റ്റംബർ 18) ഒറ്റപ്പെട്ട സ്ഥലങ്ങളിൽ ശക്തമായ മഴക്കും സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പ് അറിയിച്ചിട്ടുള്ളത്.
ഏഷ്യാനെറ്റ് ന്യൂസ് വാർത്തകൾ തത്സമയം കാണാം
