കേരളത്തിന്റെ തെക്കേയറ്റത്ത് തമിഴ്നാടിനോട് അതിർത്തി പങ്കിടുന്ന പാറശ്ശാല മണ്ഡലത്തിൽ ഇത്തവണ പോരാട്ടം പ്രവചനാതീതമാണ്. രാഷ്ട്രീയ പാരമ്പര്യവും വികസന ചർച്ചകളും ഒരുപോലെ മാറിമറിയുന്ന ഈ മണ്ഡലത്തിൽ എൽഡിഎഫും യുഡിഎഫും നേർക്കുനേർ എത്തുമ്പോൾ ശക്തമായ സാന്നിധ്യമായി ബിജെപിയും രംഗത്തുണ്ട്.
പാറശ്ശാല: കേരള രാഷ്ട്രീയത്തിന്റെ വിധി നിർണ്ണയിക്കുന്നതിൽ എന്നും നിർണ്ണായക സ്ഥാനമുള്ള പാറശ്ശാല നിയോജക മണ്ഡലം ഇത്തവണ ഉറ്റുനോക്കുന്നത് ഒരു തീപാറുന്ന പോരാട്ടത്തിനാണ്. ഹാട്രിക് വിജയം ലക്ഷ്യമിട്ട് എൽഡിഎഫ് സ്ഥാനാർത്ഥിയായി സി.കെ. ഹരീന്ദ്രൻ വീണ്ടും ജനവിധി തേടുമ്പോൾ, മണ്ഡലം തിരിച്ചുപിടിക്കാൻ കെപിസിസി സംഘടനാ ജനറൽ സെക്രട്ടറി നെയ്യാറ്റിൻകര സനലിനെയാണ് യുഡിഎഫ് കളത്തിലിറക്കിയിരിക്കുന്നത്. വോട്ടുവിഹിതം കുത്തനെ ഉയർത്തുക എന്ന ലക്ഷ്യത്തോടെ അഡ്വ. ഗിരീഷ് നെയ്യാർ എന്ഡിഎയ്ക്ക് വേണ്ടിയും പോരാട്ടത്തിനിറങ്ങുന്നു.
വികസനം ഉയർത്തി എൽഡിഎഫ്; മാറ്റത്തിനായി യുഡിഎഫ്
കഴിഞ്ഞ രണ്ട് തവണയും മികച്ച ഭൂരിപക്ഷത്തിൽ വിജയിച്ച സി.കെ. ഹരീന്ദ്രന് മണ്ഡലത്തിലെ വികസന പ്രവർത്തനങ്ങൾ തന്നെയാണ് പ്രധാന ആയുധം. മലയോര ഹൈവേ, കുമ്പിച്ചൽക്കടവ് പാലം, പാറശ്ശാല താലൂക്ക് ആശുപത്രിയുടെ വികസനം എന്നിവ വോട്ടായി മാറുമെന്നാണ് ഇടതുപക്ഷത്തിന്റെ കണക്കുകൂട്ടൽ. എന്നാൽ, കരമന-കളിയിക്കാവിള പാതയുടെ വികസനത്തിൽ വന്ന താമസം ഹരീന്ദ്രനെതിരെ യുഡിഎഫ് പ്രചാരണ ആയുധമാക്കുന്നുണ്ട്. നെയ്യാറ്റിൻകര സനലിന്റെ സംഘടനാ മികവും താഴെത്തട്ടിലുള്ള യുഡിഎഫിന്റെ ഉണർവും മാറ്റത്തിനായുള്ള ജനങ്ങളുടെ ആഗ്രഹവും മണ്ഡലം തിരിച്ചുപിടിക്കാൻ സഹായിക്കുമെന്ന് കോൺഗ്രസ് വിശ്വസിക്കുന്നു.
മുന്നണികളുടെ പ്രതീക്ഷകൾ
പാറശ്ശാലയിലെ തെരഞ്ഞെടുപ്പ് രാഷ്ട്രീയം അതീവ സങ്കീർണ്ണമാണ്. എൽഡിഎഫിന്റെ സംഘടനാ ശക്തിയും വികസന നേട്ടങ്ങളും സി.കെ. ഹരീന്ദ്രന് കരുത്തേകുമ്പോൾ, പരമ്പരാഗത വോട്ടുകൾ ഏകീകരിച്ച് വിജയം ഉറപ്പിക്കാനാണ് നെയ്യാറ്റിൻകര സനലിന്റെ ശ്രമം. 2011-ൽ കേവലം പതിനായിരത്തോളം വോട്ടുകൾ മാത്രമുണ്ടായിരുന്ന ബിജെപി കഴിഞ്ഞ രണ്ട് തെരഞ്ഞെടുപ്പുകളിലും അത് മുപ്പതിനായിരത്തിന് മുകളിലേക്ക് എത്തിച്ചിട്ടുണ്ട്. അഡ്വ. ഗിരീഷ് നെയ്യാറിലൂടെ ഈ വളർച്ച തുടരാനാകുമെന്ന ആത്മവിശ്വാസത്തിലാണ് എൻഡിഎ.
Related Articles
നിർണ്ണായകമായ വോട്ടുബാങ്കുകൾ
വൈവിധ്യമാർന്ന സാമൂഹിക ഘടനയാണ് പാറശ്ശാലയിലുള്ളത്. തീരദേശ മേഖലകളിലെ മത്സ്യത്തൊഴിലാളികളുടെയും ഉൾനാടൻ ഗ്രാമങ്ങളിലെ കർഷകരുടെയും നിലപാടുകൾ ഫലത്തെ നേരിട്ട് സ്വാധീനിക്കും. തമിഴ് സംസാരിക്കുന്ന വലിയൊരു വിഭാഗം ജനതയുടെ വോട്ടുകളും ഇവിടെ നിർണ്ണായകമാണ്. ഔദ്യോഗിക സ്ഥാനാർത്ഥികളെക്കാൾ ഉപരിയായി വ്യക്തിപ്രഭാവമുള്ള സ്വതന്ത്രരെ പോലും വിജയിപ്പിച്ച ചരിത്രമാണ് പാറശ്ശാലയുടേത്. 2011-ൽ 505 വോട്ടുകൾക്ക് മാത്രം യുഡിഎഫ് ജയിച്ച മണ്ഡലത്തിൽ 2021-ൽ ഹരീന്ദ്രന്റെ ഭൂരിപക്ഷം 25,828 ആയി ഉയർന്നിരുന്നു. ഈ ഭൂരിപക്ഷം നിലനിർത്താൻ എൽഡിഎഫിന് സാധിക്കുമോ അതോ നെയ്യാറ്റിൻകര സനലിലൂടെ യുഡിഎഫ് അട്ടിമറി നടത്തുമോ എന്നാണ് രാഷ്ട്രീയ കേരളം ഉറ്റുനോക്കുന്നത്. ഏപ്രിൽ ഒൻപതിന് നടക്കുന്ന വോട്ടെടുപ്പിൽ വികസനവും രാഷ്ട്രീയവും ഒരുപോലെ പാറശ്ശാലയുടെ വിധി നിശ്ചയിക്കും.
