ചൊവ്വാഴ്ച നടക്കാനിരിക്കുന്ന പരീക്ഷകളില് മാറ്റമില്ല
ചൊവ്വാഴ്ച സംസ്ഥാനത്ത് പ്രഖ്യാപിച്ച ഹര്ത്താലില് പരീക്ഷകള്ക്ക് മാറ്റമില്ല. രണ്ടാംപാദ വാര്ഷിക പരീക്ഷകള് മുന്കൂട്ടി നിശ്ചയിച്ച പ്രകാരം നടക്കുമെന്ന് അധികൃതര് അറിയിച്ചു.
തിരുവനന്തപുരം: പൗരത്വ നിയമ ഭേദഗതിയ്ക്കെതിരെ വിവിധ സംഘടനകള് ചൊവ്വാഴ്ച (17-12-2019)ന് സംസ്ഥാനത്ത് പ്രഖ്യാപിച്ച ഹര്ത്താലില് പരീക്ഷകള്ക്ക് മാറ്റമില്ല. രണ്ടാംപാദ വാര്ഷിക പരീക്ഷകള് മുന്കൂട്ടി നിശ്ചയിച്ച പ്രകാരം നടക്കുമെന്ന് പൊതു വിദ്യാഭ്യാസ ഡയറക്ടര് അറിയിച്ചു.
സര്വകലാശാലകള് നടത്താനിരുന്ന പരീക്ഷകളിലും മാറ്റമില്ല.നാളത്തെ കേരള ടെക്നോളോജിക്കൽ യൂണിവേഴ്സിറ്റി പരീക്ഷകൾക്ക് മാറ്റമില്ല. എ പി ജെ അബ്ദുൾ കലാം ടെക്നോളോജിക്കൽ യൂണിവേഴ്സിറ്റി ഡിസംബർ 17 ന് നടത്താനിരുന്ന പരീക്ഷകൾക്ക് മാറ്റമില്ലെന്ന് പരീക്ഷ കണ്ട്രോളര് അറിയിച്ചു. അതേ സമയം തങ്ങള്ക്ക് കീഴിലുള്ള സ്കൂളുകളില് നാളെ നടത്താനിരുന്ന പരീക്ഷ മാറ്റിവച്ചെന്ന് കേരള സെല്ഫ് ഫിനാന്സ് സ്കൂള് ഫെഡറേഷന് അറിയിച്ചു.
അതേസമയം നാളത്തെ ഹര്ത്താലില് മാറ്റമില്ലെന്നും യാത്ര ഒഴിവാക്കി സഹകരിക്കണമെന്നും സംയുക്ത സമര സമിതി അറിയിച്ചു. ഹര്ത്താലിന്റെ മറവില് അക്രമം നടത്തുന്നവര്ക്കെതിരെ കര്ശന നടപടി സ്വീകരിക്കുമെന്ന് പോലീസും വ്യക്തമാക്കി.
അക്രമ സാധ്യത മുന്നില് കണ്ട് സമരസമിതി നേതാക്കളെ കരുതല് തടങ്കലില് ആക്കി. എറണാകുളത്ത് നിരവധി നേതാക്കളെ പോലീസ് കസ്റ്റഡിയിലെടുത്തു.
ഹര്ത്താല് ദിവസം പൊതു സ്ഥലങ്ങളില് കൂട്ടം കൂടി നില്ക്കാന് അനുവദിക്കില്ല. പൊതുമുതല് നശിപ്പിച്ചാല് കേസെടുക്കും. സമരവുമായി ബന്ധപ്പെട്ട് ഉച്ചഭാഷിണികള് ഉപയോഗിക്കരുതെന്നും പോലീസ് അറിയിച്ചിട്ടുണ്ട്.