തിരുവനന്തപുരം: കേരള കേഡറിലെ രണ്ട് മുതിർന്ന എഡിജിപിമാർക്ക് സ്ഥാനക്കയറ്റം. ക്രൈംബ്രാഞ്ച് മേധാവി ടോമിൻ ജെ തച്ചങ്കരിക്കും എസ്‌പിജി ഡയറക്ടറായി കേന്ദ്ര ഡപ്യൂട്ടേഷനിൽ പ്രവർത്തിക്കുന്ന അരുൺ കുമാർ സിൻഹയ്ക്കുമാണ് ഡിജിപി റാങ്ക്. റോഡ് സേഫ്റ്റി കമ്മീഷണർ എൻ ശങ്കർ റെഡ്ഡി വിരമിച്ച ഒഴിവിലേക്കാണ് നിയമനം.

1987 ലെ കേരള കേഡർ ഐപിഎസ് ഉദ്യോഗസ്ഥരാണ് ഇരുവരും. ലോക്‌നാഥ് ബെഹ്റ, ഋഷിരാജ് സിങ്, ആർ ശ്രീലേഖ എന്നിവരാണ് ഡിജിപി റാങ്കിലുള്ള മറ്റുള്ളവർ. ടോമിൻ തച്ചങ്കരിയുടെ നിയമന ഉത്തരവ് പ്രത്യേകം പുറപ്പെടുവിക്കുമെന്നും ചീഫ് സെക്രട്ടറി വിശ്വാസ് മേത്ത പത്രക്കുറിപ്പിൽ വ്യക്തമാക്കി.