ചാലക്കുടി ലോഡ്ജില് യുവാവും യുവതിയും മരിച്ച നിലയിൽ; ആത്മഹത്യാ കുറിപ്പ് കണ്ടെത്തി
അനിതയുടെ കൂടെ ലോഡ്ജില് ഉണ്ടായിരുന്ന രണ്ട് കുട്ടികളെയും അടുത്തുള്ള ശിശു സംരക്ഷണ കേന്ദ്രത്തിലേക്ക് മാറ്റി.
തൃശ്ശൂർ: ചാലക്കുടിയിലെ ലോഡ്ജില് യുവാവും യുവതിയും തൂങ്ങി മരിച്ച നിലയിൽ. മരോട്ടിച്ചാൽ സ്വദേശി സജിത്തും ഈറോഡ് സ്വദേശിനി അനിതയുമാണ് തൂങ്ങിമരിച്ചത്. മുറിയിൽ ഉറങ്ങിക്കിടന്നിരുന്ന അനിതയുടെ രണ്ട് കുട്ടികളാണ് വിവരം പുറത്തറിയിച്ചത്. രാവിലെ 7 മണിയോടെ ഉറക്കമുണർന്ന കുട്ടികളാണ് മൃതദേഹങ്ങൾ കണ്ടത്. ഒരു കയറിന്റെ രണ്ട് അറ്റത്ത് തൂങ്ങിയ നിലയിലായിരുന്നു മൃതദേഹങ്ങൾ.
ഇരുവരും ഒരുമിച്ച് താമസിക്കുകയായിരുന്നുവെന്നും വിവാഹിതരല്ലെന്നും പൊലീസ് പറഞ്ഞു. മുൻപ് ആലപ്പുഴയിൽ താമസിച്ചിരുന്ന ഇവർ കഴിഞ്ഞയാഴ്ചയാണ് ചാലക്കുടിയിലെത്തിയത്. വാടകയ്ക്ക് വീട് ശരിയാകുന്നത് വരെ മുറി വേണമെന്നാണ് ലോഡ്ജ് അധികൃതരോട് പറഞ്ഞിരുന്നത്. മുറിയിൽ നിന്ന് ആത്മഹത്യ കുറിപ്പ് കണ്ടെത്തി.
ഈറോഡിലുള്ള അനിതയുടെ ഭർത്താവിനെയും തൃശ്ശൂരിലുള്ള സജിത്തിന്റെ കുടുംബത്തെയും വിവരമറിയിച്ചിട്ടുണ്ട്. പത്തും പന്ത്രണ്ടും വയസ്സുള്ള അനിതയുടെ കുട്ടികൾ ഇപ്പോൾ പൊലീസ് സംരക്ഷണത്തിലാണ്. ബന്ധുക്കൾ എത്തി തുടർനടപടികൾ തീരുമാനിച്ച ശേഷം കുട്ടികളെ വിട്ട് നൽകുമെന്ന് പൊലീസ് അറിയിച്ചു.