സാമ്പത്തിക മേഖലയുമായി ബന്ധപ്പെട്ട വിവിധ പ്രശ്നങ്ങളെ സംബന്ധിച്ച് ചര്ച്ച നടത്തിയെന്ന് ബാലഗോപാല്.
തിരുവനന്തപുരം: ഉത്തര്പ്രദേശ് ധനകാര്യ വകുപ്പ് മന്ത്രി സുരേഷ് കുമാര് ഖന്നയും മന്ത്രി കെഎന് ബാലഗോപാലും തമ്മില് കൂടിക്കാഴ്ച നടന്നു. കെഎന് ബാലഗോപാലിന്റെ ഓഫീസിലായിരുന്നു കൂടിക്കാഴ്ച നടന്നത്. സാമ്പത്തിക മേഖലയുമായി ബന്ധപ്പെട്ട വിവിധ പ്രശ്നങ്ങളെ സംബന്ധിച്ച് സുരേഷ് കുമാറുമായി ചര്ച്ച നടത്തിയെന്ന് ബാലഗോപാല് അറിയിച്ചു.
ഓണാഘോഷം: ഭക്ഷ്യസുരക്ഷ സ്പെഷ്യല് സ്ക്വാഡ് പരിശോധന നാളെ മുതല്
പാലക്കാട്: ഓണത്തോടനുബന്ധിച്ച് ഭക്ഷ്യസുരക്ഷാ വകുപ്പിന്റെ സ്പെഷ്യല് സ്ക്വാഡ് പരിശോധന നാളെ 22 മുതല് 26 വരെ നടക്കും. പാലക്കാട് ജില്ലയിലെ 12 സര്ക്കിള് പരിധികളിലും പരിശോധനകള് നടത്തുന്നതിനായി മൂന്ന് സ്പെഷ്യല് സ്ക്വാഡുകള് രൂപീകരിച്ചിട്ടുണ്ടെന്ന് വകുപ്പ് ഉദ്യോഗസ്ഥര് അറിയിച്ചു. ഹോട്ടലുകള്, റസ്റ്റോറന്റുകള്, ബേക്കറികള് നിര്മ്മാണ യൂണിറ്റുകള്, വഴിയോര കച്ചവടസാധനങ്ങള്, മാര്ക്കറ്റുകള് എന്നിവിടങ്ങളില് പരിശോധന നടത്തും. പാല്, ഭക്ഷ്യ എണ്ണകള്, പപ്പടം, പായസം മിക്സ്, ശര്ക്കര, നെയ്യ്, പച്ചക്കറികള്, പഴവര്ഗ്ഗങ്ങള് എന്നീ ഭക്ഷ്യ വസ്തുക്കളുടെ സാമ്പിളുകള് ശേഖരിക്കുമെന്ന് ഉദ്യോഗസ്ഥര് അറിയിച്ചു.
വാളയാര്, മീനാക്ഷിപുരം എന്നീ ചെക്ക്പോസ്റ്റുകള് കേന്ദ്രീകരിച്ചുള്ള പരിശോധനകളും സാമ്പിള് ശേഖരണവും നടത്തും. ഓണക്കാലത്ത് വിതരണം ചെയ്യുന്ന അരിപ്പൊടിയുടെ ഗുണനിലവാരവും സുരക്ഷയും ഉറപ്പുവരുത്തുന്നതിനായി ജില്ലയില് എട്ട് യൂണിറ്റുകളില്നിന്ന് എട്ട് നിയമാനുസൃത സാമ്പിളുകളും സര്വൈലന്സ് സാമ്പിളുകളും ഗുണനിലവാര പരിശോധനക്കായി അയച്ചിട്ടുണ്ട്. ഓണക്കാല പരിശോധനകളില് കണ്ടെത്തുന്ന ക്രമക്കേടുകള്ക്ക് കര്ശന നിയമ നടപടികള് സ്വീകരിക്കുമെന്ന് ഭക്ഷ്യസുരക്ഷാ അസി. കമ്മീഷണര് വി. ഷണ്മുഖന് അറിയിച്ചു.
അരിപ്പൊടിയുടെ ഗുണനിലവാരം ഉറപ്പുവരുത്തുന്നതിനായി കഴിഞ്ഞദിവസങ്ങളില് ഭക്ഷ്യ സുരക്ഷാ വകുപ്പിന്റെ നേതൃത്വത്തില് സംസ്ഥാന വ്യാപകമായി അരിപ്പൊടി നിര്മ്മാണ യൂണിറ്റുകളില് പരിശോധന നടത്തിയിരുന്നു. ലഭ്യമാകുന്ന ചില അരിപ്പൊടി ബ്രാന്ഡുകളില് കീടനാശിനി അവശിഷ്ടം നിശ്ചിത അളവില് കൂടുതലായി കാണപ്പെടുന്നു എന്ന് പരിശോധനയില് കണ്ടെത്തിയതിന്റെ അടിസ്ഥാനത്തിലാണ് സംസ്ഥാന വ്യാപകമായി പരിശോധനകള് നടത്തിയതെന്നും കഴിഞ്ഞദിവസം മന്ത്രി വീണാ ജോര്ജ് പറഞ്ഞിരുന്നു.
ഇന്ത്യന് കോഫീ ഹൗസ് തൊഴിലാളികളുടെ ബോണസ് തര്ക്കം ഒത്തുതീര്പ്പാക്കി; 13,000 രൂപ വരെ നല്കും
