സ്വാദൂറും ചിക്കൻ പുലാവ് ഉണ്ടാക്കാം
- സ്വാദൂറും ചിക്കൻ പുലാവ് വീട്ടിലുണ്ടാക്കാം.
- തയ്യാറാക്കിയത് : ബീന വിനോബ്
വീട്ടിൽ ചിക്കൻ പുലാവ് എന്ന വിഭവം വളരെ രുചിയോടെ ഉണ്ടാക്കാനാകും. വളരെ എളുപ്പം ഉണ്ടാക്കാൻ പറ്റുന്ന ഒന്നാണ് ചിക്കൻ പുലാവ്. കുട്ടികൾക്ക് ഏറെ ഇഷ്ടപ്പെടുന്ന വിഭവങ്ങളിലൊന്നാണ് ചിക്കൻ പുലാവ്. സ്വാദുള്ള ചിക്കൻ പുലാവ് വീട്ടിലുണ്ടാക്കുന്നത് എങ്ങനെയെന്ന് നോക്കാം.
ഉണ്ടാക്കാൻ വേണ്ട ചേരുവകൾ:
ബോൺലെസ്സ് ചിക്കൻ -900 ഗ്രാം
ബസുമതി റൈസ് -3 കപ്പ്
ഉള്ളി -1 എണ്ണം
പച്ചമുളക് -3 എണ്ണം
വെളുത്തുളളി -10 എണ്ണം
ഇഞ്ചി - വലുത്
ഉരുളക്കിഴങ്ങ് -1( ചെറിയ കഷ്ണങ്ങൾ ആക്കിയത് )
മഞ്ഞൾ പൊടി -3/4 ടീസ്പൂൺ
മുളക് പൊടി -1/2 ടീസ്പൂൺ ( സാധാരണ മുളക് പൊടി+കാശ്മീരി മുളക് പൊടി )
മല്ലി പൊടി -2 ടീസ്പൂൺ
ജീരക പൊടി - 1ടീസ്പൂൺ
ഓയിൽ -3 ടീസ്പൂൺ
ബെലീഫ് -1
ഗ്രാമ്പൂ - 4 എണ്ണം
ഏലക്ക - 3 എണ്ണം
കറുവ പട്ട -1 എണ്ണം
മല്ലി ഇല - ആവശ്യത്തിന്
ഉണ്ടാക്കുന്ന വിധം :
ബസ്മതി റൈസ് 20 മിനിറ്റ് കുതിർത്തു വെക്കുക. ശേഷം ഇഞ്ചി വെളുത്തുളളി നല്ലതു പോലെ അരച്ച് പേസ്റ്റ് രൂപത്തിലാക്കിയെടുക്കുക. കഴുകി വൃത്തിയാക്കിയ ചിക്കൻ ചെറിയ കഷ്ണങ്ങളാക്കിയതിന് ശേഷം 1 ടീസ്പൂൺ ഇഞ്ചി വെളുത്തുളളി പേസ്റ്റ് , 1/4 ടീസ്പൂൺ മഞ്ഞൾ പൊടി ,1 ടീസ്പൂൺ മുളക് പൊടി, ഉപ്പു ഇവ ചേർത്ത് നന്നായിട്ടു മിക്സ് ചെയ്തു വെക്കുക. 15 മിനിറ്റ് ചിക്കനിൽ മസാല പിടിച്ചതിനു ശേഷം ,ഒരു പാനിൽ എണ്ണ 1 1/2 ടീസ്പൂൺ ഒഴിച്ച് നാലോ അഞ്ചോ മിനിറ്റ് വരെ ഫ്രൈ ചെയ്യുക.
ചിക്കൻ പകുതി വെന്തതിനു ശേഷം മാറ്റിവയ്ക്കുക. ഒരു ബിരിയാണി പോട്ടിൽ 1 1/2 ടീസ്പൂൺ ഓയിൽ ഒഴിച്ചു ബെലീഫ് , ഗ്രാമ്പൂ ,പട്ട ,ഏലക്ക എന്നിവ ചൂടാക്കുക . പച്ചമുളക് , ബാക്കി ഇഞ്ചി വെളുത്തുളളി പേസ്റ്റ് ഇവ ചേർക്കുക .ഇതിലേക്ക് ഉരുളക്കിഴങ്ങു കഷ്ണങ്ങൾ ചേർക്കുക. കൂടാതെ 1/2 ടീസ്പൂൺ മഞ്ഞൾ പൊടി ,1 ടീസ്പൂൺ മുളക് പൊടി,മല്ലി പൊടി ,ജീരക പൊടി ഇവ ചേർത്ത് ചൂടാക്കുക. ഇതിലേക്ക് കഴുകി വൃത്തിയാക്കിയ അരി ചേർക്കുക. ശേഷം നന്നായിട്ടു മിക്സ് ചെയ്യുക.
6 ഗ്ലാസ് തിളച്ച വെള്ളം ചേർക്കുക .1 ഗ്ലാസ് അരിക്ക് 2 ഗ്ലാസ് തിളച്ച വെള്ളം അതാണ് അളവ് .പാകത്തിന് ഉപ്പു ചേർത്ത് അടച്ചു വച്ച് 4-5 മിനിറ്റ് മീഡിയം തീയിൽ വേവിക്കുക . അരി പകുതി വെന്താൽ പകുതി വേവിച്ചു വച്ച ചിക്കൻ ഗ്രേവിയോട് കൂടി അരിയുടെ മുകളിൽ ചേർക്കുക. കുറച്ചു മല്ലിയില വിതറുക. അതിനു ശേഷം അടച്ചു വെച്ച് 8-9 മിനിറ്റ് വരെ ചെറുതീയിൽ വേവിക്കുക .ഉരുളക്കിഴങ്ങും ചോറും ചിക്കനും എല്ലാം പാകത്തിന് വെന്തു കിട്ടുമ്പോൾ ചൂടോട് കൂടി ഒനിയൻ റൈത്തയുടെ കൂടെ വിളമ്പാം .
തയ്യാറാക്കിയത് : ബീന വിനോബ്
