ഏറ്റുമാനൂരിൽ വാഹനാപകടം: കുട്ടിയടക്കമുള്ള അയ്യപ്പഭക്തർക്ക് പരിക്ക്
അയ്യപ്പഭക്തർ സഞ്ചരിച്ചിരുന്ന ടെംപോ ട്രാവലറാണ് അപകടത്തിൽ പെട്ടത്. എതിരെ വരികയായിരുന്ന കോട്ടയത്തേക്ക് പോകുന്ന കെഎസ്ആർടിസി ബസ്സുമായി ടെംപോ ട്രാവലർ കൂട്ടിയിടിക്കുകയായിരുന്നു.
കോട്ടയം: ഏറ്റുമാനൂരിൽ അയ്യപ്പഭക്തർ സഞ്ചരിച്ച വാഹനം അപകടത്തിൽ പെട്ടു. ട്രാവലറിലുണ്ടായിരുന്ന 7 അയ്യപ്പഭക്തർക്ക് പരിക്കേറ്റിട്ടുണ്ട്. പരിക്കേറ്റവരിൽ ഒരു കുട്ടിയുമുണ്ട്. വണ്ടി ഓടിച്ച ഡ്രൈവറടക്കമുള്ള ചിലരുടെ നില ഗുരുതരമാണെന്നാണ് പ്രാഥമികമായി ലഭിക്കുന്ന വിവരം.
കോട്ടയത്തേക്ക് പോകുന്ന കെഎസ്ആർടിസി ബസ്സുമായാണ് ടെംപോ ട്രാവലർ കൂട്ടിയിടിച്ചത്. എതിർദിശയിൽ നിന്ന് വന്ന കെഎസ്ആർടിസി ബസ്സ് ടെംപോയുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ ട്രാവലറിന്റെ പകുതിയോളം ഭാഗം പൂർണമായും തകർന്നു.
തുടർന്ന് ആളുകൾ ഓടിക്കൂടി രക്ഷാപ്രവർത്തനം തുടങ്ങി. വാഹനം വെട്ടിപ്പൊളിച്ചാണ് പരിക്കേറ്റവരെ പുറത്തെടുത്തത്. മന്ത്രി വി എസ് സുനിൽകുമാറും പരിസരത്തുണ്ടായിരുന്നു. അദ്ദേഹവും നേരിട്ടെത്തി രക്ഷാപ്രവർത്തനത്തിന് നേതൃത്വം നൽകി.
പരിക്കേറ്റവരെ തൊട്ടടുത്ത ആശുപത്രിയിൽ പ്രവേശിപ്പിച്ചിരിക്കുകയാണ്.