നിയന്ത്രണം വിട്ട് കാർ കടയിലേക്ക് ഇടിച്ചുകയറി; കാറും കടയും തകർന്നു
ഹ്യുണ്ടായ് ഐ ട്വന്റി കാറാണ് അപകടത്തിൽ പെട്ടത്. ഇടിയുടെ ആഘാതത്തിൽ കടയുടെ ഒരു വശവും കടയിലെ ഉപകരണങ്ങളും നശിച്ചു.
ഹരിപ്പാട്: നിയന്ത്രണം വിട്ട് കാർ കടയിലേക്ക് ഇടിച്ചുകയറി കാറും കടയും തകർന്നു. വന് അപകടത്തില് നിന്നും യാത്രികർ അത്ഭുതകരമായി രക്ഷപ്പെട്ടു. വീയപുരം പോളത്തുരുത്തേൽ ഷരീഫിന്റെ ബിരിയാണി കടയിലേക്കാണ് കാർ ഇടിച്ചു കയറിയത്. ഇന്ന് പുലർച്ചെ മൂന്നരയോടെയായിരുന്നു സംഭവം. കാർ നിയന്ത്രണം തെറ്റി കടയിലേക്ക് ഇടിച്ചു കയറുകയായിരുന്നു .
ഹ്യുണ്ടായ് ഐ ട്വന്റി കാറാണ് അപകടത്തിൽ പെട്ടത്. ഇടിയുടെ ആഘാതത്തിൽ കടയുടെ ഒരു വശവും കടയിലെ ഉപകരണങ്ങളും നശിച്ചു. ഏകദേശം മുപ്പതിനായിരം രൂപയുടെ നാശനഷ്ടം സംഭവിച്ചതായി കടയുടമ ഷരീഫ് പറഞ്ഞു.
കൊല്ലം കാക്കനാട് പ്രവീൺസദനത്തിൽ കൃഷ്ണനും മറ്റു രണ്ടു പേരുമായിരുന്നു കാറിലുണ്ടായിരുന്നത്. കാറിന്റെ മുൻവശം പൂർണ്ണമായും തകർന്നു. ഇടിയുടെ ആഘാതത്തിൽ എയര് ബാഗിന്റെ സംരക്ഷണം ലഭിച്ചതിനാലാണ് അപകടം കൂടാതെ യാത്രികർ രക്ഷപെട്ടത്. വീയപുരം പൊലീസ് സ്ഥലത്തെത്തി തുടര്നടപടികള് സ്വീകരിച്ചു.