തിരുവനന്തപുരം: വർക്കലയിൽ സഹോദരങ്ങൾ സഞ്ചരിച്ച ബൈക്ക് നിയന്ത്രണം തെറ്റി പ്ലസ് വൺ വിദ്യാർത്ഥി മരിച്ചു. ഒരാൾക്ക് ഗുരുതര പരിക്ക്. ചെറുകുന്നം കണ്ണങ്കര വീട്ടിൽ നൗഷാദിന്റെ മകൻ അബ്ദുൽ സമദ് (16) ആണ് മരിച്ചത്. ബുധനാഴ്ച പകൽ മൂന്നിന് പാലച്ചിറ സ്കൂളിന് സമീപമാണ് അപകടം. 

ബൈക്കിന് പുറകിലിരുന്ന് സഞ്ചരിച്ച അബ്ദുൽ സമദിന്റെ മാതൃസഹോദരി പുത്രൻ നഹാൽ(14)നെ ഗുരുതര പരിക്കുകളോടെ മെഡിക്കൽ കോളെജ് ആശുപത്രിയിൽ പ്രവേശിപ്പിച്ചു. വടശ്ശേരിക്കോണത്ത് നിന്നും പാലച്ചിറയിലേയ്ക്ക് വരുമ്പോഴാണ് അപകടം. 

ബൈക്കില്‍ വരുന്ന വഴിയിൽ ഇവർ സഞ്ചരിച്ച ബൈക്ക് മറ്റൊരു ബൈക്കിൽ തട്ടി. എന്നാല്‍ വാഹനം നിര്‍ത്താതെ ഇവര്‍ ഓടിച്ച് പോന്നു. ഇതിനിടെ ബൈക്ക് നിയന്ത്രണം തെറ്റി മറിയുകയായിരുന്നു. അപകടത്തില്‍ തലയ്ക്ക് ഗുരുതര പരിക്കേറ്റ യുവാക്കളെ അടുത്തുള്ള സ്വകാര്യ ആശുപത്രിയിലും തുടർന്ന് മെഡിക്കൽ കോളെജ് ആശുപത്രിയിലും പ്രവേശിപ്പിച്ചെങ്കിലും അബ്ദുൽ സമദ് മരിച്ചു. മൃതദേഹം മോർച്ചറിയിലേക്ക് മാറ്റി.