Share Market Today: നിക്ഷേപകർ ആവേശത്തിൽ; വിപണിയെ തളർത്തി റിലയൻസ്, കൈപിടിച്ച് എച്ച്‌ഡിഎഫ്‌സി
ഓഹരി വിപണിയിൽ സെൻസെക്സും നിഫ്റ്റിയും നേട്ടം തുടരുന്നു. വിപണിയിൽ പ്രതിരോധം തീർത്ത് മുന്നേറിയ ഓഹരികൾ ഇവയാണ്
മുംബൈ: ഇന്ത്യൻ ഇക്വിറ്റി ബെഞ്ച്മാർക്കുകളായ സെൻസെക്സും നിഫ്റ്റിയും നേട്ടം തുടരുന്നു. എച്ച്‌ഡിഎഫ്‌സി ബാങ്ക്, എച്ച്‌ഡിഎഫ്‌സി, ലാർസൻ ആൻഡ് ടൂബ്രോ, ഐസിഐസിഐ ബാങ്ക് എന്നിവയാണ് സൂചികകൾക്ക് താങ്ങായത്. അതേസമയം റിലയൻസ്, ടാറ്റ മോട്ടോഴ്‌സ്, അൾട്രാടെക്, എസ്ബിഐ എന്നിവ സൂചികയെ തളർത്തി.
ബിഎസ്ഇ സെൻസെക്‌സ് 390 പോയിന്റ് ഉയർന്ന് 61,045.7ലും നിഫ്റ്റി 112.1 പോയിന്റ് ഉയർന്ന് 18,165.4ലുമാണ് വ്യാപാരം അവസാനിപ്പിച്ചത്. വ്യാപാരത്തിന്റെ ആദ്യ 30 മിനിറ്റിലെ വ്യാപാരം മന്ദഗതിയിലായിരുന്നു. നിഫ്റ്റിയിലെ 50 ഓഹരികളിൽ മുപ്പത്തിയഞ്ച് ഓഹരികൾ ഈ ദിവസം ഉയർന്നു. ഹിൻഡാൽകോ, ടാറ്റ സ്റ്റീൽ, ലാർസൻ ആൻഡ് ടൂബ്രോ, യുപിഎൽ, വിപ്രോ, കോൾ ഇന്ത്യ, എച്ച്‌ഡിഎഫ്‌സി ബാങ്ക്, എച്ച്‌ഡിഎഫ്‌സി, ഭാരതി എയർടെൽ, ജെഎസ്‌ഡബ്ല്യു സ്റ്റീൽ തുടങ്ങിയ ഓഹരികൾ 1.3 ശതമാനത്തിനും 2.9 ശതമാനത്തിനും ഇടയിൽ നേട്ടം കൈവരിച്ചു.
മറുവശത്ത്, ടാറ്റ മോട്ടോഴ്‌സ്, അദാനി എന്റർപ്രൈസസ്, എച്ച്‌ഡിഎഫ്‌സി ലൈഫ്, അൾട്രാടെക് സിമന്റ്, ബിപിസിഎൽ, ഇൻഡസ്ഇൻഡ് ബാങ്ക്, നെസ്‌ലെ, ബജാജ് ഫിൻസെർവ്, ഐഷർ, സിപ്ല എന്നീ ഓഹരികൾ 0.4 ശതമാനത്തിനും 1.6 ശതമാനത്തിനും ഇടയിൽ ഇടിഞ്ഞു.
നിഫ്റ്റി മിഡ്‌ക്യാപ്, നിഫ്റ്റി സ്‌മോൾക്യാപ് സൂചികകൾ യഥാക്രമം 0.5 ശതമാനവും 0.1 ശതമാനവും ഉയർന്നതോടെ വിശാലമായ വിപണികളും ശക്തമായി. പോളിപ്ലെക്സ്, ജസ്റ്റ് ഡയൽ, ആൽകാർഗോ, ടിടിഎംഎൽ, ആർവിഎൻഎൽ എന്നിവ അഞ്ച് ശതമാനത്തിനും 11.7 ശതമാനത്തിനും ഇടയിൽ ഉയർന്നു. മറുവശത്ത്, മിൻഡ കോർപ്, സ്റ്റാർ ഹെൽത്ത്, ബാങ്ക് ഓഫ് ഇന്ത്യ, ഐസിഐസിഐ ലോംബാർഡ്, ഡെൽറ്റ കോർപ് എന്നിവ 3.8 ശതമാനത്തിനും 5.4 ശതമാനത്തിനും ഇടയിൽ ഇടിവ് രേഖപ്പെടുത്തി.
ബിഎസ്ഇയിൽ 1,942 സ്റ്റോക്കുകൾ ഉയരുകയും 1,573 നഷ്ടം നേരിടുകയും ചെയ്തു. കറൻസി മാർക്കറ്റിൽ ഡോളറിനെതിരെ രൂപയുടെ മൂല്യം 52 പൈസ അഥവാ 0.6 ശതമാനം ഉയർന്ന് 81.24 ൽ അവസാനിച്ചു.
