വെറും ആറ് മിനിറ്റ്, വായ്പ റെഡി; സൗകര്യമൊരുക്കി ഒരു സർക്കാർ സ്ഥാപനം
ഇ–കൊമേഴ്സ് രംഗത്തെ വമ്പൻമാർക്കു ബദലായാണ് ഓപ്പൺ നെറ്റ്വർക്ക് ഫോർ ഡിജിറ്റൽ കൊമേഴ്സ് കേന്ദ്ര സർക്കാർ അവതരിപ്പിച്ചത്. ഇത് വഴി ഇനി വായ്പയും ലഭ്യമാക്കുന്നതോടെ കുറഞ്ഞ സമയത്തിനുള്ളിൽ വിദൂര പ്രദേശങ്ങളിൽ പോലും വായ്പ ലഭിക്കും
 )
അപേക്ഷ സമർപ്പിച്ച് ഒരു ചായ കുടിച്ച് തീരുമ്പോഴേക്കും ലോൺ തുക അക്കൗണ്ടിലെത്തുന്നതിനെ കുറിച്ച് ആലോചിക്കാൻ പറ്റുമോ? എന്നാൽ സംഗതി സത്യമാണ്. വെറും 6 മിനിറ്റിനുള്ളിൽ ലോൺ ലഭ്യമാക്കുന്നതിനുള്ള സൗകര്യവുമായി ഒരു സർക്കാർ സ്ഥാപനം രംഗത്തെത്തിയിരിക്കുന്നു. പറഞ്ഞു വരുന്നത് ഓപ്പൺ നെറ്റ്വർക്ക് ഫോർ ഡിജിറ്റൽ കൊമേഴ്സ് (ONDC) എന്ന സർക്കാർ പ്ലാറ്റ്ഫോമിനെക്കുറിച്ചാണ്. 2021 ഡിസംബർ 31-ന് ആരംഭിച്ച ഒഎൻഡിസി രാജ്യത്തെ 1000 നഗരങ്ങളിലും പട്ടണങ്ങളിലുമായി സേവനം എത്തിക്കുന്നു . ഈ പ്ലാറ്റ്ഫോമിൽ ഡിജിറ്റൽ ആയി അപേക്ഷ നൽകിയാൽ 6 മിനിറ്റിനുള്ളിൽ വായ്പ അനുവദിക്കും.
ഇ–കൊമേഴ്സ് രംഗത്തെ വമ്പൻമാർക്കു ബദലായാണ് ഓപ്പൺ നെറ്റ്വർക്ക് ഫോർ ഡിജിറ്റൽ കൊമേഴ്സ് കേന്ദ്ര സർക്കാർ അവതരിപ്പിച്ചത്. ഇത് വഴി ഇനി വായ്പയും ലഭ്യമാക്കുന്നതോടെ കുറഞ്ഞ സമയത്തിനുള്ളിൽ വിദൂര പ്രദേശങ്ങളിൽ പോലും വായ്പ ലഭിക്കും. വായ്പ ലഭ്യമാക്കുന്ന 9 ആപ്പുകളുമായും മൂന്ന് സ്ഥാപനങ്ങളുമായും സഹകരിച്ചാണ് പദ്ധതി നടപ്പാക്കുന്നത്. ഈസി പേ, പൈസ ബസാർ, ടാറ്റ ഡിജിറ്റൽ, തുടങ്ങിയ ആപ്പുകൾ ഇതിൽ ഉൾപ്പെടുന്നു. ഇതിനുപുറമെ, ആദിത്യ ബിർള ഫിനാൻസ്, ഡിഎംഐ ഫിനാൻസ്, കർണാടക ബാങ്ക് തുടങ്ങിയ വലിയ സ്ഥാപനങ്ങളും ഈ പ്ലാറ്റ്ഫോമിന്റെ ഭാഗമാകും. കൂടുതൽ കമ്പനികളും ബാങ്കുകളും ഈ വായ്പാ വിതരണ സൗകര്യത്തിൽ ചേരാൻ ആഗ്രഹം പ്രകടിപ്പിച്ചിട്ടുണ്ട്.
വായ്പാ സൗകര്യം ആരംഭിച്ചതിന് ശേഷം ഈ പ്ലാറ്റ്ഫോമിൽ ഇൻഷുറൻസ്, മ്യൂച്വൽ ഫണ്ട് തുടങ്ങിയ ഉൽപ്പന്നങ്ങൾ ലഭ്യമാക്കുകയാണ് ഞങ്ങളുടെ ലക്ഷ്യമെന്ന് ഒഎൻഡിസി അറിയിച്ചു. വ്യക്തിഗത വായ്പാ സൗകര്യം ആരംഭിച്ചതിന് ശേഷം ജിഎസ്ടി ഇൻവോയ്സിന്റെ അടിസ്ഥാനത്തിൽ വായ്പകൾ വിതരണം ചെയ്യാനും ഒഎൻഡിസി പദ്ധതിയിടുന്നുണ്ട്. സെപ്റ്റംബർ അവസാനത്തോടെ ഈ സൗകര്യം ആരംഭിക്കും. ചെറുകിട വ്യവസായികൾക്കും ഇതിന്റെ പ്രയോജനം ലഭിക്കും. ഇത് മാത്രമല്ല, കർഷകർക്ക് വായ്പയും ക്രെഡിറ്റ് കാർഡും നൽകുന്ന സൗകര്യവും ആരംഭിക്കും. ഈ സൗകര്യങ്ങൾ കൂടി വരുന്നതോടെ ഈ പ്ലാറ്റ്ഫോമിലെ പ്രതിദിന ഇടപാടുകളുടെ എണ്ണം ഒരു കോടിയിലെത്തും.
അപേക്ഷയ്ക്ക് ആവശ്യമായ രേഖകൾ
6 മിനിറ്റിനുള്ളിൽ ലോൺ സൗകര്യം ലഭിക്കുന്നതിന്, അപേക്ഷകന് ചില പ്രധാന രേഖകൾ ഉണ്ടായിരിക്കണം . ഡിജിലോക്കർ അല്ലെങ്കിൽ കെവൈസിക്കുള്ള ആധാർ, ലോൺ പേയ്മെന്റ് നടത്തുന്നതിന് ഇ-നാച്ചുമായുള്ള അക്കൗണ്ട് കണക്ഷൻ, ആധാറിന്റെ ഇ-സൈൻ എന്നിവ ആവശ്യമാണ്.
