തിരുവനന്തപുരം: കൊവിഡ് -19 പകർച്ചവ്യാധിയെ തുടർന്ന് പ്രതിസന്ധി നേരിടുന്ന വിനോദ സഞ്ചാര മേഖലയ്ക്ക് ആശ്വാസ തീരുമാനവുമായി സംസ്ഥാന സർക്കാർ. വ്യക്തികൾ താമസിക്കുന്ന വീട്ടിൽ തന്നെ ‌വിനോദ സഞ്ചാരികൾക്ക് താമസ സൗകര്യം നൽകുന്ന കെട്ടിടങ്ങളെ സർക്കാർ റസിഡൻഷ്യൽ ഹോം സ്റ്റേ വിഭാ​ഗത്തിൽ ഉൾപ്പെടുത്തി.

ഇതുസംബന്ധിച്ച വിശദമായ വിജ്ഞാപനം സർക്കാർ പുറപ്പെടുവിച്ചു. ഇനി മുതൽ ഈ വിഭാ​ഗത്തിൽ ഉൾപ്പെടുന്ന ഹോം സ്റ്റേകൾക്ക് ​ഗാർഹിക ആവശ്യങ്ങൾക്കായുളള നിരക്കിൽ വെള്ളം, വൈദ്യുതി എന്നീ സേവനങ്ങൾ ലഭിക്കും. റസിഡൻഷ്യൽ ഹോം സ്റ്റേകളുടെ വസ്തു നികുതി നിരക്കുകളിലും സർക്കാർ മാറ്റം വരുത്തി. ന​ഗരസഭകളിലും കോർപ്പറേഷനുകളിലും ഹോം സ്റ്റേകൾക്ക് ഇനി മുതൽ ഏകീകൃത നിരക്കായിരിക്കും. 

മുൻപ് ന​ഗരസഭകളിൽ വസ്തു നികുതി നിരക്ക് ചതുരശ്ര മീറ്ററിന് 40 രൂപയും കോർപ്പറേഷനുകളിൽ ഇത് 60 രൂപയും ആയിരുന്നു. ​ഗ്രാമപഞ്ചായത്തുകളിൽ കുറഞ്ഞത് 30 രൂപയും പരമാവധി 40 രൂപയുമായിരുന്നു. ഇനിമുതൽ ന​ഗരസഭകളിലും കോർപ്പറേഷനുകളിലും നിരക്ക് 15 രൂപയും പരമാവധി 35 രൂപയുമായിരിക്കും. പഞ്ചായത്തുകളിൽ ഇത് 10 രൂപയും പരമാവധി 25 രൂപയും ആയിരിക്കും. 

എന്നാൽ, നിലവിലുളള സ്വകാര്യ ഹോസ്റ്റൽ/ ഹോം സ്റ്റേ എന്നിവയ്ക്ക് ഈ പുതിയ നിയമം ബാധകമല്ല.