ഒക്ടോബർ 15 മുതൽ യുപിഐ വഴിയുള്ള വ്യാപാര ഇടപാടുകൾക്ക് 0.4 ശതമാനം എംഡിആർ ഈടാക്കാൻ തീരുമാനിച്ചിരുന്നു. എന്നാൽ ഇത് സാധാരണക്കാരെയും ഭൂരിഭാഗം ചെറുകിട വ്യാപാരികളെയും ബാധിക്കില്ലെന്ന് എൻപിസിഐ വ്യക്തമാക്കുന്നു. 2000 രൂപയ്ക്ക് മുകളിലുള്ള ഇടപാടുകൾക്ക് മാത്രമാണ് പുതിയ നിരക്ക് ബാധകമാകുക.
ദില്ലി: യുപിഐ ഇടപാടുകൾക്ക് മെർച്ചന്റ് ഡിസ്കൗണ്ട് റേറ്റ് (MDR) ഏർപ്പെടുത്തിയത് രാജ്യത്തെ ഭൂരിഭാഗം വരുന്ന വ്യാപാരികളെയും ബാധിക്കില്ലെന്ന് നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യ (NPCI). അധിക ജിഎസ്ടി ബാധ്യത എല്ലാവരെയും ബാധിക്കുന്ന ഒന്നാകില്ലെന്നും എൻപിസിഐയുടെ വിശദീകരണം. ഒക്ടോബർ 15 മുതൽ പ്രാബല്യത്തിൽ വരുന്ന പുതിയ നിയമപ്രകാരം ചില പ്രത്യേക യുപിഐ ഇടപാടുകൾക്ക് 0.4% എംഡിആർ ഈടാക്കാൻ സർക്കാരും എൻപിസിഐയും തീരുമാനിച്ചിരുന്നു. ഇതിനെത്തുടർന്ന് വ്യാപാരികളുടെ നികുതി ബാധ്യത ഉയരുമെന്ന ആശങ്ക ശക്തമായ സാഹചര്യത്തിലാണ് എൻപിസിഐയുടെ വിശദീകരണം.
പുതിയ മാറ്റങ്ങൾ സാധാരണക്കാരായ ഉപഭോക്താക്കളെ ബാധിക്കുന്നതല്ല. യുപിഐ വഴി പണം അയക്കുന്നവർക്ക് ഇതൊരു അധിക ചാർജ് ആയി മാറില്ലെന്നും കേന്ദ്രം വ്യക്തമാക്കിയിരുന്നു. വ്യക്തികൾ തമ്മിൽ നടത്തുന്ന (P2P) പണമിടപാടുകൾ തുടർന്നും തികച്ചും സൗജന്യമായിരിക്കും. വ്യക്തികളിൽ നിന്ന് വ്യാപാരികളിലേക്ക് (P2M) നടത്തുന്ന 2,000 രൂപയ്ക്ക് മുകളിലുള്ള ഇടപാടുകൾക്ക് മാത്രമാണ് 0.4% എംഡിആർ ബാധകമാകുക. ഒരു ഇടപാടിൽ പരമാവധി ഈടാക്കാവുന്ന തുക 300 രൂപയായി നിജപ്പെടുത്തിയിട്ടുണ്ട്.
അതേ സമയം, യുപിഐ ക്യുആർ കോഡ് (UPI QR) വഴി പ്രതിമാസം ഒരു ലക്ഷം രൂപ വരെ മാത്രം വരുമാനമുള്ള ചെറുകിട വ്യാപാരികളെ ഈ പരിധിയിൽ നിന്ന് ഒഴിവാക്കിയിട്ടുണ്ട്. രാജ്യത്ത് നടക്കുന്ന യുപിഐ വ്യാപാരി ഇടപാടുകളിൽ 96 ശതമാനവും 2,000 രൂപയിൽ താഴെയുള്ളവയാണെന്നാണ് കേന്ദ്രത്തിന്റെ കണക്ക്. അതിനാൽ ഭൂരിഭാഗം ഇടപാടുകൾക്കും എംഡിആറോ അതിന്മേലുള്ള ജിഎസ്ടിയോ ബാധകമാകില്ല. എംഡിആർ നിരക്കുകൾക്ക് മേൽ 18% ജിഎസ്ടി ഈടാക്കുമെങ്കിലും, രജിസ്റ്റർ ചെയ്ത വ്യാപാരികൾക്ക് ഇത് ഇൻപുട്ട് ടാക്സ് ക്രെഡിറ്റ് (Input Tax Credit) വഴി തിരിച്ചുപിടിക്കാനാകും.
Related Articles
ഇന്ധനം, ഇൻഷുറൻസ്, ടെലികോം, റെയിൽവേ തുടങ്ങിയ പ്രത്യേക മേഖലകളിലെ ഇടപാടുകൾക്ക് നിശ്ചിത നിരക്കിലുള്ള മറ്റൊരു എംഡിആർ ഘടനയായിരിക്കും ബാധകം. യുപിഐ ശൃംഖലയുടെ സുസ്ഥിരത ഉറപ്പാക്കാനും കൂടുതൽ വ്യാപിപ്പിക്കാനുമാണ് ഈ പുതിയ സാമ്പത്തിക ചട്ടക്കൂട് കൊണ്ടുവരുന്നതെന്ന് അധികൃതർ വ്യക്തമാക്കി. 2026 ഓഗസ്റ്റിലെ കണക്കനുസരിച്ച് 29.82 ലക്ഷം കോടി രൂപയുടെ 24.51 ശതകോടി ഇടപാടുകളാണ് യുപിഐ പ്ലാറ്റ്ഫോം വഴി മാത്രം പ്രോസസ് ചെയ്തത്.
