കാസർകോട് ഇരട്ടക്കൊലപാതകം: വൈകുന്നേരത്തോടെ അറസ്റ്റ്?
നാട്ടുകാരായ നിരവധിപ്പേർ പൊലീസ് കസ്റ്റഡിയിലുണ്ടെന്നും ചോദ്യംചെയ്യൽ പുരോഗമിക്കുകയാണെന്നും ജില്ലാ പൊലീസ് മേധാവി അറിയിച്ചു. ഇന്ന് വൈകുന്നേരത്തോടെ അറസ്റ്റുണ്ടാകുമെന്നാണ് പ്രതീക്ഷയെന്നും പൊലീസ്.
കാസർകോട്: കാസർകോട്ടെ യൂത്ത് കോൺഗ്രസ് പ്രവർത്തകരുടെ ഇരട്ടക്കൊലപാതകത്തിൽ ഇന്ന് വൈകുന്നേരത്തോടെ അറസ്റ്റ് രേഖപ്പെടുത്തിയേക്കുമെന്ന് കാസർകോട് ജില്ലാ പൊലീസ് മേധാവി എ ശ്രീനിവാസ് പറഞ്ഞു. ക്രൈംബ്രാഞ്ച് ഡിവൈഎസ്പിയുടെ നേതൃത്വത്തിൽ രൂപീകരിച്ച അന്വേഷണ സംഘം വിവിധ സംഘങ്ങളായി തിരിഞ്ഞ് ഊർജ്ജിതമായ അന്വേഷണം തുടരുകയാണ്. ഇന്നലെ രാത്രി കൊണ്ട് അന്വേഷണത്തിൽ നല്ല പുരോഗതി ഉണ്ടായിട്ടുണ്ടെന്നും എസ്പി ഏഷ്യാനെറ്റ് ന്യൂസിനോട് പറഞ്ഞു.
നാട്ടുകാരായ നിരവധിപ്പേർ പൊലീസ് കസ്റ്റഡിയിലുണ്ട്. ഇവരുടെ ചോദ്യംചെയ്യൽ പുരോഗമിക്കുകയാണ്. ചോദ്യം ചെയ്യലിൽ നിർണ്ണായക പുരോഗതി ഉണ്ടായാൽ ഇന്ന് വൈകുന്നേരത്തോടെ അറസ്റ്റുണ്ടാകുമെന്നാണ് പ്രതീക്ഷ. കൊലപാതകം നടന്ന കല്ലിയോട് കേന്ദ്രീകരിച്ചാണ് അന്വേഷണസംഘം ഇപ്പോൾ ക്യാമ്പ് ചെയ്യുന്നത്. അതേസമയം കർണ്ണാടകയിലേക്കടക്കം അന്വേഷണസംഘം നീങ്ങിയിട്ടുണ്ടെന്നും എസ്പി അറിയിച്ചു.