തിരുവനന്തപുരം: വിദേശത്ത് ജയിലിൽ തുടരുന്ന വ്യവസായി അറ്റ്ലസ് രാമചന്ദ്രന്റെ മോചനത്തിനായുള്ള ശ്രമങ്ങൾ തുടരുകയാണെന്ന് ബിജെപി സംസ്ഥാന അധ്യക്ഷൻ കുമ്മനം രാജശേഖരൻ.
അദ്ദേഹത്തിന്റെ പേരിലുണ്ടായിരുന്ന പതിനൊന്നോളം കേസുകളിൽ ഭൂരിപക്ഷവും ഇതിനോടകം ഒത്തുതീർപ്പാക്കിയിട്ടുണ്ട്. രണ്ടോ മൂന്നോ പേരുമായി മാത്രമാണ് ഇനി ധാരണയിലെത്താനുള്ളത്. അവരും കൂടി സഹകരിച്ചാൽ അദ്ദേഹത്തിന് ജയിലിൽ നിന്ന് പുറത്തിറങ്ങാമെന്നും കുമ്മനം രാജശേഖരൻ പറഞ്ഞു.
വിഷയത്തിൽ ഇടപെടാൻ ആരും തയ്യാറാവാതെ വന്നതോടെയാണ് താൻ ഇൗ വിഷയത്തിൽ ഇടപെട്ടതെന്നും സഹായം തേടി അറ്റ്ലസ് രാമചന്ദ്രന്റെ ഭാര്യ തനിക്ക് കത്ത് തന്നിരുന്നുവെന്നും അദ്ദേഹം വ്യക്തമാക്കി. തന്റെ മോചനത്തിന് തടസ്സം നിന്നതാരൊക്കെയാണെന്ന് അറ്റ്ലസ് രാമചന്ദ്രൻ ജയിൽ മോചിതനായ ശേഷം വെളിപ്പെടുത്തും, അദ്ദേഹത്തിന്റെ കുടുംബത്തിനും ചില കാര്യങ്ങൾ വെളിപ്പെടുത്താനുണ്ട് - കുമ്മനം രാജശേഖരൻ പറയുന്നു.
