കണ്ണൂര് കൊലപാതകങ്ങള്: സംഘര്ഷം വ്യാപിക്കാതിരിക്കാന് നടപടിയെടുക്കുമെന്ന് മുഖ്യമന്ത്രി
- ഒരു കൊലനടക്കുന്നത് ഏത് ഏത് സാഹചര്യത്തിലും അഭികാമ്യമായ കാര്യമല്ല
തിരുവന്തപുരം: മാഹിയില് രണ്ട് പേര് കൊല്ലപ്പെട്ട സാഹചര്യത്തില് ഫലപ്രദമായ നടപടി സ്വീകരിക്കണമെന്ന് ഡിജിപിയോട് ആവശ്യപ്പെട്ടതായി മുഖ്യമന്ത്രി പിണറായി വിജയന് അറിയിച്ചു.
രണ്ട് കൊലപാതകങ്ങള് നടന്നതില് ഒന്ന് പുതുച്ചേരിയുടെ ഭാഗമായ മാഹിയിലാണ്. അവിടുത്തെ പോലീസാണ് കേസ് അന്വേഷിക്കുന്നത്. അവര്ക്കാവശ്യമായ സഹായങ്ങള് നല്കണമെന്ന് നിര്ദേശിച്ചിട്ടുണ്ട്. കൂടുതല് സംഘര്ഷം ഉണ്ടാവാതിരിക്കാന് വേണ്ട കാര്യങ്ങള് ചെയ്യണമെന്നും ഡിജിപിയോട് പറഞ്ഞിട്ടുണ്ട്.
സംസ്ഥാനത്തെ ക്രമസമാധാനമേഖല തകര്ന്നിരിക്കുകയാണെന്ന പ്രതിപക്ഷ വിമര്ശനം ശ്രദ്ധയില്പ്പെടുത്തിയപ്പോള് ഒരു കൊലനടക്കുന്നത് ഏത് ഏത് സാഹചര്യത്തിലും അഭികാമ്യമായ കാര്യമല്ലെന്നും അത്തരം സംഭവങ്ങളുണ്ടാവരുതെന്നാണ് എല്ലാവരുടേയും ആഗ്രഹമെന്നും മുഖ്യമന്ത്രി പറഞ്ഞു. സമാധാന ചര്ച്ചകള് നടക്കുമോ എന്ന ചോദ്യത്തിന് ഇപ്പോള് അതേക്കുറിച്ച് പറയേണ്ട സന്ദര്ഭമലല്ലോ എന്നായിരുന്നു മുഖ്യമന്ത്രിയുടെ മറുപടി.