മഞ്ചേരിയിൽ 14കാരനെ പ്രകൃതിവിരുദ്ധ പീഡനത്തിനിരയാക്കി; എട്ട് പേര് അറസ്റ്റില്
മഞ്ചേരിയിൽ 14 വയസുള്ള ആൺകുട്ടിയെ പീഡിപ്പിച്ച എട്ട് പേരെ അറസ്റ്റ് ചെയ്തു. പിടിയിലായവരിൽ 22 വയസുകാരൻ മുതൽ 53 വയസുള്ള മധ്യവയസ്കൻ വരെ ഉൾപ്പെടുന്നു.
മലപ്പുറം: മഞ്ചേരിയിൽ 14 വയസുള്ള ആൺകുട്ടിയെ പീഡിപ്പിച്ച എട്ട് പേരെ അറസ്റ്റ് ചെയ്തു. മഞ്ചേരി പുല്ലാരപ്പറമ്പ് സ്വദേശികളായ മുഹമ്മദ്, മുഹമ്മദലി, മുഹമ്മദ് ഹനീഫ, പൂക്കൊളുത്തൂർ സ്വദേശികളായ അബ്ദുൽ ഗഫൂർ, അഫാൻ, മുഹമ്മദ് ഹനീഫ, സജീറലി, ഷറഫുദ്ദീൻ എന്നിവരാണ് അറസ്റ്റിലായത്.
മഞ്ചേരി പുല്ലാരപ്പറമ്പ് സ്വദേശിയായ 14 വയസുകാരനാണ് പീഡനത്തിനിരയായത്. ഒമ്പതാം ക്ലാസുകാരനായ കുട്ടി പഠനത്തിൽ പിന്നോക്കം പോയതോടെ കൗൺസിലിംഗിന് വിധേയനാക്കുകയായിരുന്നു. കഴിഞ്ഞ രണ്ട് വർഷമായി എട്ട് പേർ പീഡിപ്പിച്ചെന്ന് ചൈൽഡ് ലൈൻ അധികൃതരോട് പറഞ്ഞു. ബന്ധുവിന്റെ വിവാഹത്തലേന്ന് രാത്രിയിലാണ് കുട്ടി ആദ്യം പീഡനത്തിനിരയായത്. 2017 ലായിരുന്നു സംഭവം.
സുഹൃത്തുക്കളായ പ്രതികൾ എട്ട് പേരും പിന്നീട് പല തവണ പീഡിപ്പിച്ചെന്നും കുട്ടി മൊഴി നൽകി. വിവരങ്ങൾ ചൈൽഡ് ലൈൻ മഞ്ചേരി പൊലീസിന് കൈമാറുകയായിരുന്നു. സി ഐ എൻ ബി ഷൈജുവിന്റെ നേതൃത്വത്തിലുള്ള പൊലീസ് സംഘമാണ് പ്രതികളെ പിടികൂടിയത്.