വഴക്കിട്ട പ്രതികാരം തീർക്കാൻ സ്ത്രീ അയൽവാസിയുടെ കുഞ്ഞിനെ തലക്കടിച്ചുകൊന്നു
ദില്ലി: വഴക്കിട്ട പ്രതികാരം തീർക്കാൻ സ്ത്രീ അയൽവാസിയുടെ രണ്ട് വയസുള്ള മകനെ അടിച്ചുകൊലപ്പെടുത്തി. മക്കൾക്കൊപ്പം കളിക്കാൻ വീട്ടിലേക്ക് വിളിച്ചുവരുത്തിയായിരുന്നു കൊലനടത്തിയതെന്ന് പൊലീസ് പറയുന്നു. തെക്കുപടിഞ്ഞാറെ ദില്ലിയിലെ ഉത്തംനഗറിലാണ് ദാരുണ സംഭവം. ആരോപണ വിധേയയായ സ്ത്രീ രണ്ടാം നിലയിൽ വാടകക്ക് താമസിക്കുകയായിരുന്നു. അവിടെ വെച്ച് കുട്ടിയുടെ തലക്കടിച്ചുകൊലപ്പെടുത്തിയെന്ന് പൊലീസ് പറയുന്നു.
കൊല്ലപ്പെട്ട കുട്ടിയുടെ അമ്മയുമായി ആരോപണ വിധേയയായ സ്ത്രീ ഏതാനും ദിവസം മുമ്പ് വാക്ക് തർക്കമുണ്ടായിരുന്നു. കുട്ടിയെ കുടുംബാംഗങ്ങൾ അന്വേഷിക്കുകയും അയൽവാസിയായ സ്ത്രീയുടെ വീട്ടിൽ പരിക്കേറ്റ നിലയിൽ കണ്ടെത്തുകയും ചെയ്തു. ഉടൻ തന്നെ ആശുപത്രിയിൽ എത്തിച്ചെങ്കിലും മരണപ്പെട്ടിരുന്നു. സ്ത്രീയെ പൊലീസ് അറസ്റ്റ് ചെയ്തു.