തിരുവനന്തപുരം: സെക്രട്ടറിയേറ്റ് മാര്ച്ചിനെത്തിയവരുമായി പോയ വാഹനം പാറ്റൂരില് അപകടത്തില്പ്പെട്ട് ഒരാള് മരിച്ചു. കഠിനംകുളം സ്വദേശിയും ഐ.എന്.ടി.യു.സി മണ്ഡലം പ്രസിഡന്റുമായ അജയനാണ് മരിച്ചത്. അംഗന്വാടി ജീവനക്കാര് ഉള്പ്പെടെ 16 പേര്ക്ക് പരിക്കേറ്റു.
അംഗന്വാടി ജീവനക്കാരുടെ സെക്രട്ടറിയേറ്റ് മാര്ച്ചിന് കഠിനംകുളം മേനംകുളം ഭാഗത്തുനിന്നും എത്തിയവരാണ് അപകടത്തില്പ്പെട്ടത്. മാര്ച്ച് കഴിഞ്ഞ് യാത്രക്കാരുമായി തിരിച്ചുപോകവെ പാറ്റൂരില് വെച്ച് വാഹനം നിയന്ത്രണം വിട്ട് ഡിവൈഡറില് ഇടിക്കുകയായിരുന്നു. വാഹനത്തിലുണ്ടായ അജയന് പുറത്തേക്ക് വീണ് വാഹനത്തിനടയിലായി. തലക്കു ഗുരുതരമായ പരിക്കേറ്റ അജയനെ മെഡിക്കല്കോളജ് ആശുപത്രിയിലെത്തിച്ചപ്പോഴേക്കും മരിച്ചിരുന്നു. പരിക്കേറ്റ 16 പേരില് ഒരാളുടെ നിലയും ഗുരുതരമാണ്. യാത്രക്കാരില് ഭൂരിഭാഗവും സ്ത്രീകളായിരുന്നു. പരിക്കേറ്റവര് മെഡിക്കല് കോളേജിലും ജനറല് ആശുപത്രിയിലും ചികിത്സയിലാണ്.
